Franco Miseria e Stefania Rotolo nel 1976
Milano, 6 luglio 2019 - Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.
Serada fiacca a la television, eppur l'offerta l'è varia per vess Agost. In prima linea quella evocativa ciappada dai Tèch Rai e ciamada tecchetecchete. Da on ann a questa part hann decis de fa' trasmission tematich nel senso che ona sera la dedichen a on cantant, ona sera a on personagg, ona sera a on grup, ona sera anziché vint minut la dura on ora e mezza e nasconden la tiritera mandand in onda titol divers. Me riferissi no al contenuto ma al nomm de la trasmission. El tecchetecchetè el diventa varietà e improvvisamente ancamò tecchecc. Ona barba, ona noia, ona menada. Te cambiet canal, te vet da la concorrenza e te troeuvet istess personagg che t'è vist prima. Second mi se metten d'accord. “Adess rompom i ball al telespettador. Mi ai noeuv e mezza mandi in onda el Ranieri e ti ” “ Mi ai 9.40 mandi in onda Ranieri, ma cont on'altra canzon.” E inscì per el varietà.
Poeu van in onda i poliziesch. Quei paren compagn d'on pòmm tajaa in duu . La trama la se differenzia pocch da la pontada che vegn prima. Istess protagonist, special effètt che se poden copià per pussè volt, tant l'è vera che hoo pensaa che i e giren i e mis'cen i e fan ancamò , primm pian che poden montaj in 'sta storia, in on altra, in on altra ancamò, inseguiment in car che se differenzien minga, prima avanti lee, poeu avanti l'altra, poeu ferma voeuna al semaforo, poeu l'antagonista che la passa ona ferroria, sotta a on camion, quella dei noster che la se ribalta. Te stet nanca a guardà se chi l'è in macchina el gh'ha ona faccia diversa da quel de la settimana passada. Poeu gh'hinn i fiction in doa i attor sann no parlà. Bej facc, ma tutt lì. Quand derben la bocca gh'è de ciappà el telecomando e schiscià a cercà on film vecc, dobbiaa come se dev, magari in bianc e negher, cont attor ch'hinn attor e che reciten senza fass condizionà dai regist che disen, intanta che gh'è la laorazion, “naturalezza mi raccomando” E i attor per vess natural disen 'ti amo e ti odio' cont la stessa vòs soffiada, se incassen de faccia e minga de vòs, e diventen colorii domà quand entren de propotenza al pronto soccorso.
Andemm avanti. Rivom ai ballett. Come semm lontan da quej coreografà dal Franco Miseria, dal Don Lurio. Adess tutti mann in alt, moeuves de brasc, spall che fann scherz de posizion, gamb che vann nanca insema, trenta second al massim perché pensen de stufì, ma stufissen anca s'hinn curt, costumm che tenden a vessigh minga, tanti ciapp, tanti tett, tanti decoltèe davanti e de drè, tanti lato bi e poca fantasia, domà moviment meccanich e cù, cù, cù e tett. E poeu passom ai presentador ciamà conduttor perché tiren innanz on baraccon che el fa fadiga a moeuves. Se se tratta de ona trasmission giornalistica riessi anca a levamm el cappel, ancaben i personagg intervistà sien semper quej, i argoment quej, i dibattiti quej, i conversazion che se capissen no perché vun el parla de sora dell'alter e el conduttor i e ferma no, anzi el ghe va sora anca lù e el se fa inquadrà cont el sorris sornion de “adess tel metti …lì, te incastri mi” . E a la fin riven i opinionist che dovarissen opinionà ma opinionen no. Semper quei. Da ona part (Rai) e dall'altra (Mediaset), che te troeuvet anche a La 7, e in tutti i privaa. Disen nient, se sormonten, riden di robb che riessen a dì, se parlen addoss, inventen, creden de vess spiritos, hinn sussiegos.
L'altra sera in la trasmission del maester di talk show, ghe n'era almen vott straconossù che faseven a gara a fass capì no nel dì pirlad. M'hann fa' vegnì in ment quand i pirlad eren el pan che se mangiava in cabaret e che hoo miss in “Attenti al Gufo” ediz. Meravigli. Burocrazia: “Signor Ministro, per fare un po' di spazio in archivio, posso bruciare i fascicoli più vecchi di dieci anni ? “ Ottima idea, però, per sicurezza, fa' prima le fotocopie.” Considerazione: “Più stanno a sinistra più abitano in centro.” Povertà: “Io appartengo a una famiglia povera. Ricordo che da piccolo i miei mi mandavano in una colonia di bambini così poveri che, sulla spiaggia, invece dei castelli di sabbia facevamo le case popolari.” Massima: “I funerali dovrebbero essere fatti nelle paludi. Anche i vivi al seguito del morto devono trovarsi in difficoltà.” Megalomania: El mobiler brianzoeu el voreva scritturà per ona battuda de caccia I Corni di Canzo. brivio.roberto@yahoo.it