Sipario di un teatro
Milano, 29 marzo 2020 - S'eri a drè a scriv l’articol per domenega quand ricevi ona telefonata da Roberto Marelli che cont mi’ l’ha faa operetta, cabaret e teater e l’ha scritt ona donzena de canzon, per cuntamm che l’attrice Anna Priori l’era partida per on viagg senza ritorno. “Te la conossevet ?” el me fa “ Come no... L’avevi anca invidada quand hoo inaugurà el teater estiv de Villa Clerici perché la recitass in “Milanin MIlanon”, ma l’era impegnada” “L’ha laorà ona vita al teater Gerolamo” el va avanti Marelli. “Ma come l’è morta? Virus o…” “So no. Sont ròtt (affranto)”. Con Roberto Marelli l’era d’obbligh parlà milanes. “Pensa, Marelli, che mi l’hoo vista al Gerolamo che l’era ona tosetta nel “Zio Matt”. La part del zio la faseva quell baloss del Borghi.” “Quell che l’aveva tra’ in pè la prima baracca- teater del dopoguerra in piazza Vetere. L’aveva ciamada Carlo Porta”. “Mi s’eri andà a intervistall propri in quell teater per la rivista Orizzonti Italiani, quand cominciavi a scriv insema al Gigi Vesigna.
” Ricordi on particolar de l’intervista. Avevi appena vist l’Amleto, al Lirich, cont Gassman. El Borghi quand ghe l’hoo dit el me fa “T’el set come l’hoo giudicà mi nel me notiziari? Minestra di fagioli in pentola”. Al Zio matt, sont andà a fa’ i compliment a lu e alla Priori per la nevoda scema interpretada cont bravura. Gh’el tiri a ment. El me rispond “S’eri ciocch quel dì che hoo dit ‘na roba simil”. L’hoo vista, la Priori, al Gerolamo in tanti alter commedii cont la regia de la Pitta de Cecco e del Carletto Colombo che l’è sta’ insema al Remigio Paone vun di impresari de I Gufi. Franco Friggeri, amministrador de la compagnia del Teater Milanes el gh’aveva ona stima particolar de la Priori. Sont andà al so’ funeral a Trezzan sul Navili e la gh’era anca lee. “Ciao, ciao. Se te fett on quaicoss che te gh’heet bisogn de ‘na sciantosa sunt a disposizion.” “Marelli. Gh’èmm commemorà l’Anna Priori. L’era chi, viva, in mezz a numm. L’è bell anca ricordalla in su la scèna cont la Borghi, la Pogliani, el Varisco, l’Allegranza, el Scotti, el Mazzarella, el Flauto, el Renda e tucc i alter attor scompars. I “milanes” d’ona compagnia che come quella ghe ne sarà pu.