La bacchetta magica... l’è minga assé

Milano, 19 luglio 2020 - S e bastass on colp de bacchetta magica per fa’vinc ona squadra on quaj mago anca de nomm l’avariss dissotterrà quella de Houdinì, ma, disgrazia la voeur che ne bastarien nanca trii a fa’ vinc ona squadra quand i giogador hinn imprecis, se metten no d’accord nel passass el balon, fan tiri che van a voeuj e se permetten de segnà no quand gh’è la fortuna d’on rigor. Quest in general. In particolar, mi, profano, osservi, gioeughi con lor davanti al schermo, me schisci el fidigh, foo forza, vosi “noo” quand se fan robà la balla, quand passen all’avversari, quand seguten a sta’ minga in pè,quand tiren a sproposit e quand, depoeu avè perdù cerchen giustificazion ai intevist. Nissun el dis “Gh’emm giugà mal, de vergognass” “Gh’emm fa’ schivi, altro che partida!” Quest in general. La solfa la val per tucc, per tutti i squader. In particolar poeu demm on’oggiada all’Inter, la squadra del coeur a dispett che la me faga incazzà.

Ricordi on articol de Umberto Simonetta (paroliere, umorista, scrittore, giornalista) tanti ann fa, che la criticava per el so’ comportament “anomalo” e in del stess temp el professava on amor profond. Ghe l’hoo anca mi’ sto amor, fin dai temp del Franzosi porter che se po’ no desmentegass, del Lorenzi veleno, del Marchi e Passalacqua. Me fasevi accompagnà da mia mamma in vial Tunisia angolo via Lazzaretto, in doa gh’era el bar cont el lor nomm. Appena finida la guerra sui ruvin de la la ca’ dirimpettaia distrutta dai bomb, aveven fa’ ‘na baracchetta cjamada pomposamente cinema. El cinema Stella, trasferìì poeu pussè avanti in ona traversa de la via Melzo e ciamà “Delle Stelle”. Chissà se l’Inter el gh’avess vinciù col Verona me sarìen vegnù in ment ‘sti immagin. Immagin associaa cont la sbeffa de tucc quej che creden no a la ripresa de ona squadra che l’ha dit la soa, la fa’ tremà i alter, anca in Europa, anca nel mond e che forsi la gh’ha on po’ de bauscia intorna.

Bausceria che la ciappa anca i calciador, pagà e strapagà e che hann impara a mettesela addoss anca i cines. Duu Nadal fa sont andà a la Pinetina per ona specie de spot in doa fasevi el spotiv ch’el commentava cinq o ses partid domà con i “Oh” “Ah” “Noo” “Sii”. Pussè de dusentcinquantamila visitazion. On’idea. Me s’eri ciamà “L’interista incazzato”. Beh, gh’è de vessel e credi de interpretà la vos de tanti come mi che creden ancamò in ona squadra che quand l’è el so’ moment la te fa “crodà” i brasc.