Ciappa ciàppa per on pan mòll

Milano, 23 maggio 2019 - Sabet sera i me amis Eleonora e Vittorio Sacchi m’aveven invidà cont la Raimondi ai festeggiament per el compleann del Vittorio. Ai ses (18) s’erom giamò pront per saltà in macchina e andà fina a Trezzan sul Navili quand la Grazia Maria che la gh’aveva giamò on freggior de spaccà el nas e la paura de taccal a quaivun present a la festa, magara ai padron de ca’, la proeuva la fever. Trentott e mezz. Decision immmediata de moeuves no de ca’, suratutt per peggiorà minga la situazion e mett in pericol i spettacol de la prossima settimana.

Nel noster mestee se stà fermi anca on para de mes e poeu salten foeura i partecipazion, de colp e tutti insema. Ghe vorariss la settimana longa 15 dì cont duu sabet, trii venerdì e duu domenigh. Già gh’èmm i dubbi per el temp. Dovarissen vess i primm spettacol come disen adess ‘open’, a la serèna. Se pioeuv o fa’ frecc t’el devet rimandà cont el ris’c de avegh no la partecipazion del pubblic informà e predispòst a frequentà la sera del maltemp.

E allora semm sta’ a ca’ e cont l’occasion gh’emm dà on’ogiada a la cantada tipo Niagara dell’Eurovision Song Contest. Vintises cantant, giovin da provà invidia, pien de vitalità, cont la voeuja de rivà primm. Gh’era anca l’Italia cont el vincitor del San Remo 2019. L’è rivà second. El speaker l’ha dit che dal 1990 gh’è mai stada ona squas vittoria inscì vistosa. A proposit del speaker f.c. ghe n’era vun minga mal insema all’Insigna che l’era propri mal. El parlava sbrodolent, el cercava de vess spiritos, el commentava in romanesch, el borbottava e se capiva on trenta per cent di magher comment ch’el faseva. Me immagini el direttor de red intant che ghe diseva “Te mandi a tel Aviv (ma l’è poeu andà?

O l’ha commentà da Roma?) perché sont sicur che te faret comment spiritos.” Ohi, gh’emm ridù tutte el temp! Possibil che ‘sta benedetta RAI la metta mai in discussion la comprensibilità de certi presentator, pardon, conduttor? Bastaria, a volt, dighel. Ma la fama fa’ tasè funzionari e registi, i unich che podarissen fa’ osservazion ai personagg che pirlen in ona tramission, anca se hinn diventà mega al ponto de dit de fa’ i affari to’.

E i affari me e quej de tutti i telespettator hinn de capì i discors, i riferiment, i battud, i spiritosaggin, i comment e, insomma, la part, leggiuda, a memoria o improvvisada e sorattutt sbaglià no el congiuntiv. “Che io …sono, che io posso, che io dico, el se dis nanca se te dann on premi!”. E a proposit de premi l’è bell vedè combatt per aveghen vun. In qualsiasi campo la competizion, senza sofismi, l’è quella che tegn in pè on progett de canzon, sportiv e anca de cultura. Gh’è ona particolarità. Di 26 canzon ricordi nanca ona nota. Me sont domandà se tutta quella meraviglia di proiezion, de scenografii, de coreografii, de ambientazion la poda noeus.

Senza tutta quella roba meravigliosa, i canzon starien in pe’? Quand l’è vegnù foeura quel cantant cont la ghitarra squas acustica gh’è sta’ un moment de solliev.Poeu hann comincià anca cont lu a moeuv i fari, a sferzà l’aria cont i laser, a proiettà l’impossibil, a riprend ogni moviment del corp, a sbatt sul video primm piann, davanzal, gamb che se slarghen, moviment sensual tant che se la TC podess la entraria fina a fa vedè i tonsill. E intant te perdet el motiv, i paroll, el senso de la canzonetta.

Ecco, me sont lassà ciappà dal foeugh de la critica e a momenti me desmentegavi de la Barona. Gh’hinn paroll de ona filera de strofett in milanes che miren ai prevost. “A gh’è el prevost de San Lorenz che quand la fa, el spussa d’incens” “A gh’è poeu quel de Villapizzon ch’el… l’ughetta per fa’ i panetton” “a gh’è el prevost de la stadera ch’el ghe pienta la bandera” “a gh’è poeu quell de la Barona che quand la fa’ el par ch’el trona” ecc. per circa 20 prevost. La Barona sicchè la gh’è in tutta la soa popolarità.

Gh’è el Teater Barrio’s, gh’è on para de osterii in doa fam spettacol a la manera del Praticello, gh’è ona cassina che se ciama Monterobbio e gh’è La Magolfa. Minga quella del Navili, in piena Movida, visina al Museo Merini, quella de via Modica 8 (vott). La coop l’è del ‘46, formada da partigian appena tornà da la montagna. La se ciama Ettore Satta, pròppi per onorà vun de quei che gh’hann lassà la vita. L’è semper stada on sit de aggregazion, cont el so’ bell camp de bòcc, on spazi per impienì el temp liber di soci, fa’ cultura e attività social.

Adess, però, l’è pu come ‘na volta. I vecc a poch a poch van vers i nivol, i giovin frequenten no e la cooperativa, President Armando Sandretti e el Vice Gianluigi Mauri, la se da’ de fa’ per mett insema ona noeuva generazion de soci con trii obiettiv: dagh a quii del quartier, singol, familii, associazion e giovin, spazi e motiv per la frequentazion; fa’ iniziativ de cultura (perchè se quaivun le sa no, la cultura l’è a la base de qualsiasi progress); fa’ ona campagna informatica e de strada per trovà gent de associà.

Magara cont l’aiutt del Municipi ses. E come han decis de comincià i soci? Con trii o quatter inconter e cunt el pever nel… sèdes. Inscì le motiva Carlo Casalini, agente teatral, che ved long anca senza i oggiai del Viganò pari pubblicitariament ai poltronn sofà artigiani de la qualità. Come cominciaran ? Cont el Cabaret. Ona bella conferenza spettacol che sto’ no a descriv perché gh’è tutt in la locandina. L’è minga el solit.

Quell sacranon del Brivio l’ha decis de fa’ comicità con i canzon di Gufi, con el raccont precis di ann ‘60, quand l’Enrico Intra el gh’ha avù l’idea de fa’ el Jazz insema a la canzon milanesa, ai battud dell’epoca, ai scenett (ciamà anca sketch), che attor de provada esperienza hann portà nel local del Bongiovanni, ciamà cont on nomm che disi mai: “Intra’s Derby Club”, rivaa sul coo di milanes come ona ventada de aria fresca, on colp de tramortì, ona voeuja de frequentall tutti i ser. Che el sia el destin de La Magolfa duu?