Per vess natural bisogna fa’ i attor

Milano, 27 novembre 2018 - Se dovarissom dà on significà al moeud de dì “parla de striscia” e inveci de mett la S maiuscola usà la “s” minuscola , podarissom considerà l’immagin de vun ch’el parla sottil, svelt, arcuà, semovent (el disaria Renato) come una striscia o lingua de carta che la se moeuv, come ‘na bissa, on serpentell longh e col corp tutt ‘na curva.

Ma se lassom la parola in de per lee (da sola) cont la maiuscola semm davanti a on sostantiv, on nomm. Parla (verbo) de Striscia. Striscia cos’è? La Notizia! Quand i velin eren postinn portaven ai do’ conduttor i notizi, sui rodei de corsa, che eren minga i scarp a ponta da mett al sabet per andà a ballà, ma propri i pattini a rodei. Adess, ma depoeu tanti ann, hann lassà in archivio i letter sul gabarèt e i coreografi se divertissen a inventà moviment fantasios per mostrà, on kamasutra de gamb, ciapp, man, brasc, squas asèttich, tant che i e poden vedè anca i fioeu in attesa del Gabibbo. ‘Na volta l’era Gero Cardarelli. Mimo che se ispirava a la scola de Marise Flash come Cobelli, Corti, Jesurum, Magni e l’Infinito Ferruccio Soleri ch’el succedeva al Marcello Moretti in quel personagg che l’è stà e l’è ancamò el capostipite del Piccolo Teatro: Arlecchino, immortal. E chi semm a la commedia dell’Arte. Se esageri no, sia l’Ezio Greggio che l’Enzo Jacchetti, hinn, tutti i dì grand Commediant de l’Arte! Ghe basta on cannovaccio per inventà moviment, moeud de parlà, de ridd, de presentà, de sostegnì a volt testi ch’hinn nient e che diventen grand per l’interpretazion improvvisada anca se studiada.

COSSA EL VOEUR DÌ? Mi quand insegni recitazion disi semper ai allev che se te gh’heet denter on quaicoss basta on batt de cili per fall vegnì foeura. Ma el ven foeura perché te ghe l’heet denter. L’è on insema de sofferenz, de patiment, de esperienz, de savè, de bravura. Basta che ghe sia on’ inviada e tracchete t’el vedet de per tutt, su la pell, in di oeucc, nel gest, col portament e in l’espression. L’è na qualità che la te quatta o la te esalta i difett, che la mett in mostra on “sprint” ona forza interna de impieni tutt, palchscenich, video e schermo. L’è la famosa Vis, per dilla a la latina.La forza. E lor (i do E, Ezio ed Enzo) ghe l’han. Te la vedet natural, senza sforz. E per aveghela inscì occorr costruilla con sforz.

L’È LA GRAN TEORIA del Piero Mazzarella: per vess natural e ciappà el pubblich bisògna fa’ i attor. L’è la mia teoria e quella del Walter Chiari: per vess natural te devet semper recità la naturalezza. E lor, i do EE, la fann. L’è stada la forza del Petrolini, del Ferravilla, del Govi, l’è quella di Legnanes. L’esplod, di volt, ‘me on vulcano. E inscì el ven foeura el success de Striscia la notizia, che de là dell’Idea, eccellent, del Ricci (m’hann dit che l’era la vos del Gabibbo! Me risultava de no, ma tutt el po’ vess), trasformen el Quotidiano de denuncia e de evasion, el Magazzin (legg Magasìn), in Quotidiano de evasion che denuncia e informa. Me sembra de vess el Marzullo. Omm umil e modest che inveci l’è ona forza. Per mi el se lassa tropp toeu in gir. In la tavolada faziosa de la domenega ghe n’è troppi che seguten a ridd di robb che fann ridd domà lor intanta che (mentre) certi domand del Marzullo i e metten cont i spall al mùr. E se te guardet ben Striscia, la maggior part di personagg che sbilzen dai servizi, se sconden, voeuren no vedè, no savè, no sentì (come i scimmiet, illustrà da I Gufi in “Non so non ho visto se c’ero dormivo”el success de Luigi Lunari, autor, commediografo tra i primm in Italia e nel mond). A hinn comprimari necessari a la reussida de ‘na commedia che la presenta quatter, cinq, ses argoment, intervallaa da moment de relax, rappresentà da critich, sberlèff e mila facc, che dann moeud de creà on distacch dai argoment principal, dai denonz, dai docudisaster de ‘sta Italia che, come el dis Dante, l’è serva e ostello de dolor, nav senza guida in la tempesta, minga donna de provincia, ma bordell, e nel stess temp ( e quest le disi no domà mi) l’è el paes pussè bell del mond e come ormai disen giusta (appunto)nel mond, l’è tutta on Brand.

HOO LEGGIÙ che dai primm de Dicember EE faran ‘na pausa. Sperèm che la sia corta. Minga per i delfin (successori) che, ghe n’è vorsù de temp, hinn su la lor strada e, credevi no che ghe rivassen. Se ved che gh’hann denter on quaj coss che el gh’ha permis de passalla (percorrerla), ma perché sarìa bell vede’ la trasmission completada par EE da on libello pussè cattiv. A onor del Ricci, la trasmission l’è ormai ‘na pietra de paragon in di discors de la gent: “te denonzi a striscia la notizia” “ te set bon per striscia” “l’è on argoment da striscia” “te parlet come quej de striscia” “ l’è on carrozzon come quell de striscia la notizia” “ si’, adess femm striscia…” “ e se ti te set striscia… mi sont la notizia” “ Te vet giust ben per striscia…” “Ecco, l’è rivada la striscia, adess spettom la notizia…” e via de… striscia la notizia. Forsi ghe manca on po’ de intellettualità ma per fa’ i grandi numer de ascolt credi che l’andaria minga ben, anca se giornai come Candido, Marcaurelio e pussè avanti El Travaso, insegnaven che l’umorismo l’hann semper faa i studios, che la satira l’è minga quella del Vernacoliere, e che el sarcasmo e l’ironia, forz che poden trà giò ‘na qualsessia (qualsivoglia) dittatura, stan de ca’ nel teater, in certi film, in di liber e nel cervell di artist, scrittor, drammaturghi, musicisti, filosofi e intellettual. Però, ona giontina…