Semm ne l’era di giudes

Milano, 13 gennaio 2019 - AI ME TEMP se diseva che la television la condizionava chi la vardava e l’ordin l’era quell de fa’ di robb che doveven vess comprensiv a tucc. Quand te parlavet cont on dirigent televisiv la prima roba ch’el te diseva l’era, la volti in milanes, “ ‘Sto schèrmo el varden anca i pastor sardi, de dì e de sera”. A part el fatto che i pastor de dì éren a pascolà i pegor, sperdù in mezz ai grand praa, in collina, in pianura, e la sera dormiven cont i animal, scaldà da la lana che gh’aveven anmò indoss, e per i apparecc televisiv gh’eren no i attacch. Avarien dovù lassà el gregge e andà in di osterii di paes, ammès e no concess che i negozi fudessen avert e gh’avessen el televisor. L’è innegabil però che la TV l’ha contribuì a la divulgazion de la lengua italiana. Ona lengua compagna per tucc. Sont andà in Sardegna, in Abruzzo, nell’alto Friuli, in doa gh’eren i ròsc al pascol e tucc i pegoré parlaven ‘sto italian “Ahò, che sei venudo a fa’? Noi pasdori assisdiamo alle transumanze de le pegore con er massimo rigore. La lana è un bene brezioso. Berò se gàbida un temborale siamo duddi brondi a gorrere ar ribaro nelle grodde, negli anfraddi, nelle casemadde. Le pegore bossono sdare fuori berchè ora che l’acqua benetra attraverso la lana ge ne bassa der tembo, anzi si (z e s aspre) lava”… eggedera, eggedera…

POEU GH’È STADA la television de la rivista, d’i canzon. E i pastor cantaven e ballaven in sui praa insema ai pegor. I pastor vestì a la macho cont i pettoral denudaa e i pel rasaa. I pegor cont el tutù e i scarpettin per ballà in su la ponta. Dent per dent ona quaivuna la se incaprizziava del so ballerin e se le faseva senza tanti preambol, cont i laver inrossettaa. Hann mai vorsù vedè i programm di master chef per la paura de finì in graticola. Infatti per Pasqua gregg inter se imboscaven per minga partecipà ai banchett di italian golos de berin e de cavrett. E on quai secol passaa partecipaven mal volentera ai cerimoni religios per via dei sacrifizi e di offert all’Altissim per faà rivà la sluscia (acquazzone), falla desmett quand la esagerava, fa’ nass formentòn, fa’ cress i pomm de tèrra, la verdura, la frutta, fa’ guarì on fioeu, se l’era no l’oggett del sacrifizi. Veramente i oggett eren tucc fèmmin. Ma dato che l’era dura trovà anca a quei temp ona vergin, hann applicaa ‘sti telethon sacrifical ai bestii. Adess i organizzazion religios spenden on sacc de danèe per convincet a lassaghi el 3 o el 5 per mila in la dichiarazion di redditi. Sacrifizi senza l’ara cont l’iva. E semm rivàa cont quest al dì d’incoeu. L’era di Giudes. Se ghe n’è minga trii per programma i direttor de rete hinn no sodisfaa. In tutti i trasmission i giudes deven minga esprimm domà on giudizi e votà el mej (gh’è giamò el televoto), gh’hann de giugà, taccà lit, crea’ problematich per fa’ parlà i Gossip.

L’È ONA REGOLA che la stà de sora tutti i trasmission, che la obbliga i conduttor a studià el scandol cont ona quaj parolascia per fa’ saltà in su la cadrega quej del Vaticano. Propri el contrari del famos “manuale Cencelli” ch’el obbligava a fa’ quest, minga quell, a parlà in on moeud, a proibinn on alter, a cantà ona canzon e a interdì on altra. On manual de censura. Adess gh’è quell de la s’censura. I giudes hinn ai zenn de beneficenza e anca de laor. Metten ona taola, come quella di spos, cont trii post . I scoll hinn a drè a organizzass per avegh trii insegnant-giudes in sall col plafon foeura pericol. L’è on moeud come on alter per impiegà tucc quej insegnant precari che spetten de montà in cattedra, magara senza fass capì. Perché insegnant, conferenzier, pret, gh’hann la pretesa de vorè parlà senza savè come se fa’ per fass intend de tucc. E già che hoo parlà di pret, sarann in trii a confessà. E San Peder in “quest l’è dent e quest l’è foeura” final per el Paradis el gh’avarà a fianc duu angiol o duu sant che faran insema a lù el trio.

EL MOND EL SE SLARGA. Trii President del Consili, trii de la Repubblica, trii Papa, trii de tutt. Ecco risòlta la disoccupazion. Squas squas ghe scrivi al Beppe Grillo. Scommettomm che el firma anca ‘sta noeuva idea politica? Trii l’è el numer perfett. E senza difètt el diventa se vun di trii l’è la Majonchi. Simpatica anca quand la dis de no. Pronta a taccà lit e a mett pas. La dovaria sdoppiass, triplicass, centoplicass. E la gente a esclamà “ Cass…gh’è la Maionchi! L’è ‘na garanzia!” I alter depoeu tanti ann de giudizi gh’hann pù paroll. Fan i classifich malvolentera. Hinn tutti cantant che se troeuven insema ai concert, ospitat, tour estiv, serad in teater. Professionist che disen “la mia musica” come fudessen Chopin, Beethoven, Vivaldi, i Beatles. E i ascoltador? I statistich disen 30 vun, 40 l’alter, 70 quii là e quand fann la cunta salta foeura el 140 per cent. Hann rinnovà tutta l’arte, disen, anca se i attor e i personagg hinn semper quej. Anca el moeud de parlà, natural, in dialett del Sud, salvo el toscan. Però se capiss pocch de quel che disen. Scommettom che s’hinn miss d’accord cont i venditor de apparecc per sord, pardon “non udenti”? Sì’, perché l’è minga colpa de la cattiva sillabazion di attor, con bej facc ma tutt lì. L’è colpa de chi capiss ‘na madocina. Se ved che i Ruggeri, i Ricci, i Lionello, i Buazzelli, i Carraro, i Santuccio, i Cervi, i Gassmann, i Albertazzi, i Salerno, le Sarah Ferrati, le Lina Volonghi, le Anna Proclemer, le Andreina Pagnani, le Lilla Brignone, le Eva Magni, i Toto’, i De Filippo, i Rascel, i Walter Chiari e i grand del secol passaa (podi no nominai tucc)... hann insegnà nient.