Ona cazzurada de pever

La gent la gh’ha bisogn de sognà quell che l’è no, ma quand l’è tropp...

Amadeus (Ansa)

Amadeus (Ansa)

Milano, 5 marzo 2019 - Meno mal che sabet sera de la settimana passada l’è finì l’incubo de la trasmission “Ora o mai più”. Prossimamente sperem domà “mai più”. Me dispias per Amadeus, on scior de la television, ch’el sa’ sorrid, el se incazza no, el tira avanti on trabiccol che, senza de lu, el staria minga in pè anca ben cont la presenza de tanti nomm de la canzon.

Parli no per invidia. Mi savaria no cantà come canten lor, nel ben e nel mal.  Ma quej che me lassen perplèss hinn i giudizi che dann ai lor colleghi. Basta no el voto. Ghe metten denter anca i ghiribizz a proposit de l’interpretazion, de la canzon, del testo, de la musica, dell’arrangiament, dell’orchestra. Inscì canzon che varen pocch hinn celebraa come se fudessen capp d’òpera e quand sann no cossa cantà, perché, disemmel cjar, el repertori l’è minga semper de prima scelta ( gh’è, come la polpa, la seconda, la terza, i scart), quand appunto sann no cossa cantà passen ai grand success de la lor vita artistica, quej che tucc sann, che tucc canten e che senza sarien nanca diventà grand personagg.

ME PIASARIA fa’ conoss ai lettor tutt el moviment che gh’è dedrè a ona canzon: quand se tratta de portalla in sala de registrazion, quanti voeuren firmalla per divides i Diritti d’Autore, cossa bisogna fa’ per falla cress in classifica. Attenzion. Va’ sù on ripescaa, giamò el termin e me fa andà el sang per travers perché se tratta semper de cantant che hann fa’ el bell temp, el canta la canzon che la soa guida (disemm inscì perchè me par del legg on legger sfottò quand le cjamen maester) el gh’ha impostà e poeu el s’colta i giudizi de collega che sann tusscòss, bauscia che ‘na volta eren compagn de palchsecnich, de serad, de fortuna o de sfortuna. “Ti do un bell’otto.” “ L’hai cantata divinamente.  Voto sei.” Figuremes se l’avess cantada diabolicamente. “non faccio giudizi sul tuo patrigno, ripescatore, consigliere. Lui sa come mettere i fiati, come rapirci, come appassionarci alla sua musica…” e giò cont l’incens, el miel, i sviolinad per minga parlà mal del giudes che el sta’ visin al so’ “alliev” in la kermess. Tutt per consumà i chili de insulina che all’inizi de la trasmission riven da i ca’ farmaceutich in regal, senza pretes de scambi pubblicitari. “Ma l’è on gioeugh!” “Ti che te critichet tant, come te farisset la trasmission, ed “ecco a voi” e i solit canzon? I giudes hinn el pever che contrasta la monotonia de ona canzonetta drè a l’altra.” “ L’è vera. Mi me pias de sentì el….o la…. o, i… ” “ E anca vedej che litighen intra de lor, o cont i cantant miss sotta giudizi”. E a mi me pias desquattà i debolèzz che gh’hann, la suss su la musica e i test che componen o hann compost. “E’ proprio una bella canzone!” disen, a volt mentendo per la gola. El me par on inconter de contaball. Hoo tolt appòsta la virgola depoeu “ a volt”.

QUELLA BISCÈTTA basta cambiagh de post perché i paroll gh’abbien on alter significaa. Es. “Quella cantante, el dis el giudes, la capiss nient” l’è divers da “quella cantante dice, il giudice non capisce niente” e “Sono vivo e vegeto” l’è divers da “Son vivo, vegeto” e “ non ho nessuno scopo e sono felice “ l’è divers da “ non ho nessuno, scopo e sono felice”.  A mi m’è sembraa che nissun di giudes el fudess all’altezza ironica de questa disquisizion. Ma l’umorismo tènten de mettell, tant l’è vera che riden tra lor e sperèm minga de quej che fann la part di cantant de recuperà . Fatto sta’ che la trasmission l’è finida ma parlen giamò de fann on’altra cont i lyric. E chi ghe sarà de ridd perché se i e ciappen noeuv tutt el sarà giustificaa ma se i concorrent deven vess soprano, tenor , contralt, baritoni e bass de provada esperienza, la sarà dura.

TE LA VEDET ona riqualificazion de la Ricciarelli? o el giudizi su on Placido Domingo? Magari cont el Volo in giuria? Voeuri propri vedè s’ el seguta a vess placido quand on quaivun el ghe dirà, sbroffànd grand competenza “ Perché te proeuvet no a cantà la part del cont d’Almaviva anziché segutà a fa’ el perrucchèe?”. Mi al so’ post ghe rispondarìa “O mama mama mama, sont andà in del barbè, e l’era sabet e l’era pienn de gent, o mama mama mama mi sont tornà indrè. Sabetesabetesabete saa.” (Patruno/Svampa) Basta! Hoo giamò parlà tropp de la television. Gh’è semper el criticon ch’el me scriv “te set minga on esperto, parla d’alter”.

E CHI SEMM nel discors final: la competenza. Quand te nasset pret anca se te spreten per ona reson qualsiasi, se dis che te restarett semper pret. E inscì el bagatt, l’ortolan, el maester de scola, la massera, el ferrotranvier, l’aviator, perfinna el delinquent. El nass cont i caratteristich somatich e el resta cont quej, senza speranza de podè cambià. Domà per i cantant la storia l’è diversa. Poden minga lassà el canto, anca se i cord vocal risponden pu, anca se i acuti diventen vers guttural. Hann vorsù fa’ i cantant? Deven, disi deven, segutà a fa’ i cantant. Pitturen? Fan i cartonaa, disegnen copertin, scriven liber su la vita passada, fann fioeu e deciden de seguii fina a quand gh’hann bisogn del genitor, del tutor? Nient. Poden no. Inventen trasmission per inglobai, per tirai foeura, per fai tornà a la vita, e quand comparissen , gh’è pront on scandol per sbattii in prima pagina. L’è la nemesi di artist e l’è difficil sottrass.

La gent la gh’ha bisogn de sognà quell che l’è no e che la podaria vess. “Vess o vess minga, quest l’è el problema”. L’è el me monologo voltà dall’ Amleto, in doa el mond se rivela in tutta la soa verità. In doa gh’è la dimostrazion che la movida cominciada in tenera età, anca se la gh’ha avù ona quai divagazion, la po’ ripetess   E allora in su la lapide, robi l’idea all’Alberto Patrucco, ghe sarà scritt: L’è nassù per viv fina a la mort ona vita che l’ha portà giust a la mort. Hoo dit Patrucco? Scusa Alberto, ma questa l’è roba del Marzullo.

 

è arrivato su WhatsApp

Per ricevere le notizie selezionate dalla redazione in modo semplice e sicuro