Parlàa e fass capì, par facil ...

Milano, 24 novembre 2019 - De tant in tant mi torni sull’argoment perché me fa’ rabbia vedè e soratutt sentì la gent che la parla mal, che se esprimm cont i verbi come vegnen, cont i pronomm sbagliàa. Di pret in gesa che fann l’omelia comprensibil ghe n’è ben pocch. Parli no di concett, ma di moeud de prononzià, de finì i paroll, de parlà con vos spiegada, cont oratoria e no sbassà el ton, fall diventà confidenzial, senza dagh ona spinta de diaframma, de potenzià l’emission propri perché se voeur dà on tono sommesso.

Ma i pret hinn minga attor. E allora spieghìmi perché quand preghen porten la vos, la alzen de tono, fann capì l’orazion ch’hinn a drè a proferì. Ona mattina, finida la Messa a voo dal pret e ghe disi. “El sa che hoo capii on vint per cent de quel che l’ha dit?” El m’ha respondù “ Perché? Funzionaven minga i altoparlanti? L’è el primm che me fa questa osservazion” “Per forza“ hoo insistì “dormiven tucc. Lu el gh’aveva on tono conciliante col sonno”. El m’ha guardaa e el s’è miss a ridd “Ma chi semm in Gesa minga in d’on cabaret”. Capìi? L’ha vorsù nascondes de drè a ona battuda per minga ricognoss ch’el parlava sottvos. Ier mattina s’eri a on convegn a la Terrazza Martini. Gh’eren ses relator sentà giò a semicerchio. Davanti, ona platea de ona quarantina de personn. Moderator on giornalista da la vos cjara, parlada comprensibil anca quand el diseva nomm e cognomm. I relator eren President de Enti, ommen e donn. Mi s’eri in ultima fila. Lor se parlaven addoss. Ona sciora l’ha ciappà anca on applauso foeura temp.

L’è restada cont la frase a mezz, l’ha faa per riprend, poeu vist che l’applauso insisteva l’ha desmiss lassand el concett per aria. On alter l’ha fa’ on discors, capì domà da quei de la prima fila, cont el microfono poggià sul pube. Invece de alzal cont la man el sbassava el co’. Sont andà in ona scola a sentì la lezion de on professor. El vosava domà per dì ai allev de sta’ cito. Per el rest el spiegava la storia cuntandola a sé medemm. E on alter, la matematica. La Preside, mia amisa, l’ha miss foeura on cartel cont scritt “Cors de parola per i professor”. Risposta general: “On cartell inscì l’è offensiv! Figuremes se numm, professor, semm minga parlà!”