Ora legal, ona tragedia tutti i volt: l'angolo di Milano dei Duperdu

Per num milanes, semper de pressa, l’è ona tragedia tutti i volt

Migration

Milano - La torna l’ora legale per num milanes, semper de pressa, l’è ona tragedia tutti i volt: perd addirittura on’ora de temp! L’idea l’è vegnuda al Franklin, el geni del parafulmin: risparmio energetico giammò in del ‘700! In Italia l’ora legal la gh’è del 1916 e inscì, in la nott de l’ultima domenega de marz, el ‘riva puntual el cambio. I milanes hinn semper staa a la vanguardia in tuttcos, anca cont i orelogg. Per mettes d’accord su l’orari, in del 1306 el prim orelogg meccanic pubblic d’Italia l’era in Sant’Eustorgio, ciamaa la Calcatrappola. Anca i Viscont per minga mancà i appuntament, metten on orelogg denter al campanil de San Gottardo in Corte: l’admirabile meccanismo, regordaa anca in la cronaca del Galvano Fiamma.

Per castigà i ritardatari, el batocc el sonava bell fort, tant che lì visin la gh’è anmò la Via delle Ore. In del 1875 Milan l’è la prima cittaa che la vanta on sistema elettrico de Tic Tac, tutt sincronizzaa cont el pendolo de Brera, incoeu hinn pussè de 1300, posizionaa a 300 meter vun de l’alter, del centro fin a la periferia. Bej, rotond, verd ‘me i vedovell e semper precis! Hinn comandaa via radio de Mainflingen: precision teutonica! Allora, milanes, tiremm su el nas del telefonin per vardà i orelogg public! Lor hinn semper lì a indicà l’ora collettiva, segura, democratica che ne fa sentì tucc istess in del mezz del gibilè del traffic de la nostra cittaa.

 

è arrivato su WhatsApp

Per ricevere le notizie selezionate dalla redazione in modo semplice e sicuro