L’è semper ona question de tram

Oera lu, propri lu, el M° Morricone. El me dava, giovin mi, giovin lu, el me testo de ‘na canzon musicada da lu

Tram

Tram

Milano, 12 luglio 2020 - Oera lu, propri lu, el M° Morricone. El me dava, giovin mi, giovin lu, el me testo de ‘na canzon musicada da lu. Gh’avevom fa’ la lacca, se diseva inscì a on dischett stampà per proeuva, fermavom la gent per vendel. Peu serom andà al bar de via Corridoni, visin al Pitagora, scola per ragionatt, per mett la lacca in del Juke Box. Come la taccava la musica el M° se settava giò e stava a sentì la soa composizion. Mi, in silenzi, cont el linguaggio di sordomut, disevi ai avventor che i paroll eren me e che la musica l’era soa. Riva el barista, se mett de drè al Juke Boxe, le derba, ranfa su el 45 giri, va’ dal M°e gh’el dà insema a on sanduicc. Me sont sveglià de colp. Peccà. On sogn inscì, ver ch’el pareva ver, te stupiss. Hoo mai conossù l’autor de cinqcent colonn cinematografich, de canzon bon de superà i confin d’Italia e dilagà all’ester come fann certi motiv che vegnen chi da altri paes. Gh’è mai stada nanca l’occasion e me dispias, soratùtt de avegh minga conossù el so’ calor uman e la soa simpatia. Per quindes ann me sont desmentegà di canzon, di canzonett, dell’impegn che se podeva fa’ anca cont la musica commercial. La sembra ‘na brutta parola inveci el fatto de vess per tutti contribuiss a fa’ sta’ in pè anca l’altra musica. Chissà quanti dirann “ma chi l’è quell lì ch’el pontifica?”. Vun che, vista l’età certa, el po’ fass el mea culpa. In primis perché l’è minga sta bon de tegnì insema i so’ amis, i Gufi, e de fai segutà el discors che aveva appassionà tanti fans; in secondis perché podeva, e Morricone insegna, andà avanti a dì la soa e trovà on post precis nel commercial de protesta, cercand de fa’ poca “nicchia”e tanta divulgazion; in terzis perché el gh’a avù no la forza, la cultura, la voeuja, l’interess de derbì i oeucc, guardass in gir, de andà avanti inveci che fermass e aspettà on quajcoss dall’alt. Caro Ennio, scusa se te do del ti, se me ciappi quella confidenza che m’è mancada, t’è minga compost domà l’eccellenza, arrangià mej del mej, portà la toa musica de per tutt, te set anca on esempi de serietà, de amor vers la vita. Basta vedet quand te sollevet la bacchetta e cont l’orchestra te se perdet in di nòt che ti medèmm t’è miss in sul pentagramma. Grazie de tutt. Grazie per i to’ merit. Quanti? Tanti.  

è arrivato su WhatsApp

Per ricevere le notizie selezionate dalla redazione in modo semplice e sicuro