I veggett se contenten no

Milano, 14 ottobre 2018 - MIA SORELLA MARIA, quand la fa no l’annonziatrice per beneficenza (per lee che l’ha faa i annonz per radio e television tucc i dì per pussè de 35 ann, avvertì no la gent de quell che succed in giornada l’è on continuo soffrì) la va in friùl in doa stava la me mamma. L’è on paesin da la bassa furlana lontan 13 km da Casarsa, Patria de Pasolini, cont el dialett che l’è visin al furlan de la alta. Ogni volta che la va giò la torna su (l’è minga ona marca de caffè) e la me porta specialmente in ‘sta stagion, i tomates. Te sembra de mangià el rosolio tant hinn bon. Coltivà come gh’èmm vist in “L’albero degli zoccoli”, gh’hann el savor genuin de la campagna. Chissà chi gh’ha mis in del co’ all’Olmi, quel moment del nonno che somena la piantina. L’è on moment de ona delicatezza che la fa s’cèss (commuove).

STÈSSA COMMOZION che te vegn anca nel legg el liber de Cesare Marchi “Quando eravamo povera gente” che el te cunta story e memory di contadin veneti, istess che se fudessen bergamasch o brianzoeu. Me sont commos quand el me amis Renato Dal Compare, President di Donatori de Sang dell’Ospedal Sacco, el m’ha portà ona cassetta de tomates tirà su dal so’ òrt in on paesin su i riv del Tisin, in doa quand l’è in secca, de acqua se ne ved minga perché la passa sotta al greto, ma quand l’è in bagna, che Dio el salva i spond perché se de no el capp di Donator dev corr a tra’ foeura l’acqua da la ca’. Quaivun l’è bon de dì che mi laori de fantasia. Ve assicuri che l’è propri inscì. Mi l’hoo vista la ca’ allagada. E come el se da’ de fa’ per svoeuialla e nettalla, senza ciamà amis ma cont l’aiut de on quai visin e tra la soa ca’ e quella del Renato se sa mai quant’acqua la tira foeura. L’ha provà el De Compare a domandà al Comun de sbassagh la bolletta dato che l’acqua che l’ha porta gratis el fiumm, ma l’autorità preposta la fa’ ‘na gran ridada. Roba de ciappai a sidellad d’acqua nella quantità dell’allagament.

SONT PARTÌ DALL’ACQUA per rivà al sang e minga per fa’ andà el sang in acqua ma per sottolineà el dass de fa’ che el gh’ha el President per la raccolta (come se dis per l’acqua piovana) del sang dai Donator del Sacco. L’inventa i gir cont i tram, quell cont i cavaj, i bivacc in piazza Castell, i spettacol sui piazz, l’ann che ven anca sui sagràa, e cartej, e liber, e canzon, e spettacol cont tanti artist. El se contenta no de vun, de duu, de trii, quatter, cinq, ses…insomma vint rappresentazion. E voeur andà a tegnì viv el spirit e la ment di veggioni de la baggina. Veggioni? Veggett! (pl Veggetes?). Ghe fuss on vacabolari ch’el disess come se scriv Veggettes (donne)! Se gh’è on quaicoss de maschiliste l’è el vocabolari. Tutt singolar. El plural l’è trattaa cont difficoltà. El femminil vun vocabol su mila. I grammatic sorvolen e te disen no come voltal, completal, usal, el maschil.

COME AL SOLIT Renato Dal Compare l’ha faa i robb in grand. L’ha programmà per el spettacol del dopo mezzdì, incoeu, per l’Azienda de servizi ai personn del Pio Albergo Trivulzio ben 12 artist. ‘Sto chi a fa nanca i nomm. Podìì leggei sulla locandina pubblicada cont l’articol. Su no se hinn tutti milanes Doc, ma l’è ona domanda che i ospiti del Pat (appunto Pio Albergo Trivulzio) se pònnen minga. Chi gh’è gh’è, basta che el sia conossù. Beh, quanto a vess notòri el va de lusso. Chi per ona reson chi per l’altra, l’ha faa la soa part, nel canto, ne la recitazion, in di presentazion. Disen che i vecc se contenten. Minga tanto. Troeuvi inveci che hinn esigent, che voeuren sentì, vedè, toccà, savè, rendes cont, perché tanti a hinn sta’ idol del la lor giovinezza. E vedel sulla pedana del salon di intratteniment i a faa piang.

Mi capissi nocome fa el noster organizzator a metten insema dodes anca se i cottaria (gruppi) hinn noeuv. E se incassen tucc se te mettet on limit a la partecipazion. Mi disi do canzon a testa, Renato ne vorariss trii, i protagonist quatter e magara cinq. Trii l’è el numer giust. Trii per quatter minut a canzon compresa la presentazion, rivum a dòdes moltiplicaa noeuv fa 108 minutt, 54 per temp cont la gionta de un dodes minut complessiv per el presentador, rivom a 2 or. Beati i primm a passà perché i ultimm a hinn penalizzaa. La gent la comincia a sfollà. I ospit gh’hann i cùr, i parent che vann via, gh’hann de cambiass el pannolon, de lavass, de preparass in del refettori perché ai ses (18), riva el carrel del mangià. Operazion che per i ses e nezza (18.30) la dev vess finida, semper per via del personal che l’è scars. Donca el spettacol el dev finì prima di cinq.

HOO DIT PRIMA che el Dal Compare l’è bravo? Pussè. Bravissim. Uei l’ha fa’ i cùnt e l’ha ciamà artist che per ona reson o per l’altra poden no donà el sang. Forsi trii su dodes. I alter anca se vorarissen, nisba. Inscì hinn a la pari anca lì. Se de no la sariss ona corsa continua all’ambulatori a fass cava’ tri o quatter siringad. Inveci la corsa on quaidun e anca on quaiduu la fa’ in bagn. A fa’ cus’èe? A…lavass i dent. E anca lì ghe sarìa de dì.