Adess gh'hinn pu i testi, el pubblic el se sganassa e mi capissi no perché

Milano, 8 ottobre 2017 - "Mes dames et messieurs, bonsoir. Je vous salus tous le quants. Je veux vous recconter de la fabbrication de le Champagne, ou Champignon che dir si vueile. Je m’excuse si je parle le francais, ma je vien de la France, où je etudiè le francais a la Sorbonne, a Pàris. Je rentrontrè a Paris un ami milanois. Il etudiè francais dans un autre universitè: la Santè, ou le professeurs sont le questurin de France. Il s’appelle les Flits parce que en schisciand le chappeau il vient feur le rutten. Mais passons a la fabbrication de le champagne. Innanzitutt, innanzitutto, vou devais savuar qu’an France il y a une radure…radure…radura! contornè par de coulinettes, des petites coulens; ca n’est pas le petite coulapaste revoltè avec le cù de sure, c’etais vremant des coulens, petite mountagne, montagnettes….” On lettor de la pagina “L’angolo di Milano” el m’ha scritt: “Caro Brivio, grazie per gli articoli in milanese. Li leggo e ne faccio raccolta. Me recordi quand te avevet derbì el Refettorio. I Gufi s’eren appena dislenguà (Sciolti. Lu el scriv in italian ma per minga tradì el me compit foo la traduzion seduta stante) e ti nell’affrontà el pubblic te dovevet rangiass, presentà i to’ canzon macabro-cimiterial, parlà, e cuntà a tucc che ve serov sciolt perché l’era Agost e el faseva cald (a dì la verità l’era ona risposta che el Mazzotti - me pianist de allora - l’aveva inventaa per fa’ front ai domand de la gent, stuff de sentimm cuntà semper la stessa storia. Compliment, Giovann, latore de la lettera. Te gh’heet ona memoria fantastica). 

La lettera la va avanti a recordà quel che fasevi in quel temp. L’è vera. Mi avevi derbì, quasi per disperazion el Refettorio, cabaret cont annesso ristorante, in ona cantina de via San Maurilio. El proprietari l’era on certo Moretti appassionàa de cabaret e anca de aerei. El guidava on idrovolant e ogni tant el me portava a fàa on gir su la Brianza. Ona volta l’hoo fàa anca con la mia promessa sposa (Maria Grazia Raimondi in arte Grazia Maria) che la moriva de paura. Atterraggio nel lac de Lugan cont i motovedett de la guardia Svizzera che vegniven incontra al velivolo sicur che fudessom contrabbandier. L’emm scansada cont ona sculattada, a paroll. Eren pocch dì che avevi fà on programma su la Tv svizzera, m’hann riconossù e han capìì che serom turist sprovvedù. Ma siccome el proprietari-pilota l’avariss dovu segnalà l’amaragg, segnalazion restada ne la gesa di proposit, el me amis Moretti l’ha ciappà ona multa salada. El Refettorio! El cabaret intellettual de Milan. L’hoo dit in on alter articol. Avevi scritturà mia sorella Maria, annunciatrice al Gazzettino Padano e alla Tv, per legg e fa on spettacol scritt dal giornalista Barigazzi (guarda cas propri de Il Giorno) e intitolàa “I osterii de Milan”, registràa per la television svizzera, appunto. L’è ’na storia appassionada perché la ciappa dent on periodo intenso di creatività. 

Allora se podeva minga improvvisà i battud e i moeud de recità de adess, che fan ridd ma a la fin te resta nient. Dovevom avè testi che restasser ne la ment del pubblic, che magari el tornava per sentij anmo’ e recordaj, e comprà i disc, vinile, se i avevom incis, registràa. Quell de Le Champagne, l’era nassù al “Casina di lettura” de Parma. On nomm che el derivava propri da ona piccola ca’ (casina) in doe almen da vint’ann faseven intratteniment intellettual. El tema de la serada l’era “ I cabaret letterari” che avevom inventàa cont el Renzo Cortina in la soa Galleria d’Art sotta la libreria Cavour davanti al palass di Giornaj dell’omonima piassa. Cossa eren? Ciappavi on liber (Stefanino di Palazzeschi, Poema a Fumetti di Buzzati, on Vocabolari, el liber de la fabbrication de Le Champagne, ecc. ecc)le sceneggiavi per circa on quart e poeu lassavi el pubblic cont la bocca insoddisfada e disevi “…se volete sapere il seguito, comprate il libro nella libreria soprastante. L’amico Renzo vi farà lo sconto”.  Ne vegniva de gent! anca quand hoo trasferì el Cabaret al citato Refettorio. Ed ecco el senso de la mail inviada dal Giovan.

I testi, adess, gh’hinn pu. El cabarettista d’incoeu el dis robb divertent, che fan sganassà el pubblic (el regista inquadra gent che se piega dal ridd, e numm con tanti alter se domandom perché?! Tant de pensà a inquadradur preordinàa), che fan ridd, come el diseva Michele di Gino & Michele, ogni des second. L’è vera la gent la se divert, la derba la bocca, squas la se rotola…per nient. La sarà la bravura dell’intrattenitor, el moeud de stà in pè, de gesticolà (solitament cont el colp de man sul brasc opposto, o cont l’indice e il pollice di duu man a formà on rotond, o cont ona finta pendulada del bacino), de mett la faccia… riessi minga a capì. Ma capissi che manchen i “testi”, e quand te ne diset vun umoristic, de autor, in teater, perché in Tv hinn proibì, te vedet i espression sconcertà di spettator ch’hinn disabituà a capì e voeuren divertiss d’istinto. Ghe n’è vun, e disi no el nomm per delicatezza, el Crozza, che el “dis polid, che l’è sarcastic, ironic e che el gh’ha on seguit notevol de appassionàa. Ecco, el Crozza (che sincerament invidi), quand l’è no ripetitiv sui personagg del gossip politich, esprimm, fa intend, comunica concett anca general che picchen, sgarbellen, ingloben el mond e minga la suocera, i vigil, i carabinier, el marì frustràa e via col liscio, robetta de avanspettacol giamò fada dai grand comic del passàa prima che diventassen grand. Ed ecco la conclusion de Le Champagne. Gent interessada, Mazzotti al pianofort, mia sorella ai lettùr (se dà el cas che la sia ona lettrice de prima), mi cont el liber dedicàa a la fabbricazion de Le Champagne.  Me accorgi che el pubblic l’e’ minga tant partecip, l’è on poo disattent, e me metti a voltà in frances miscià col milanes la champagnada. Hoo vist el pianista andà sotta el pian a coa, la sorella Maria cercà ona sortida de sicurezza e el pubblic piegass e batt i man squas a ogni pausa. L’ho tegnu come monologo. L’hoo ripetuu al Filodrammatici in on spettacolo con Paolo Gozolino e Elena Sedlak (i do primm ballerin de la television italiana) intitolàa “Meglio bastardi che mai”. semper esaurì. La mia compagna Maria Grazia Raimondi l’era in camerin cont Federika, la me terza, a ninalla, tant piscinina che l’era. La podeva no entrà in scena: la tosetta l’era ai so’ primm vagiti. Foeura ferveva la campagna per el divorzi. Num, in piena convivenza, gh’avevem no ’sto problema. Ma de quest ve parli al prossim articol perché insema a Pier Carpi, on giornalista, scrittor e regista, avevi sfidà do personagg al Giudizio di Dio, all’Ordalia del foeugh. 

brivio.roberto@yahoo.it