Hann decis de derbì i navilj, mah

Milano, 25 marzo 2018 - Milan l'è invidiosa ? Quand l’ha savù che l’Alto Patronato del President de la Repubblica el s’è come Patrocinant del Labirinto D’Acque a Fontanellato (Parma), l’ha rispolverà la memoria di ann glorios de la spussa, di ratt che adess hinn indoor ma prima se vedeven in bella vista, di sfèrla (pertugi), di cà fatiscent, di cavaj, prima, e macchin, dopo, che faseven fadiga a passa’ da on pont all’alter, di strèccieur (viottoli) in doa entrava a fadiga ona carrossa col so’ brumista, di lavanderi che faseven la bugada nell’acqua che Ivan Della Mea ciama “marscia, scarigh pubblic, cess de ruera”, di cantinn in doa finiva appunto la ruera de ca’ che prima de tiralla su, i spazzit, doveven mettela in di gerli respirand i miasmi (l’era minga el temp de la differenziazion ma quell de la decomposizion sotta i pe’), memore de tutta ‘sta poesia che, hoo leggiùu, l’aveva colpì el Stendhal tant de fall sentenzià che el se trovava in la pussè bella città- d’Europa (chissà come eren i alter! bastarìa rilegg el Dickens), han decis de derbì i navilj, che l’è de quand hann avù la sana covertura hann comincià a vosà nel rumor del traffic “Voeurom vess derbì” “Voeurom che i milanes, tucc, e quej che frequenten la città de dì e che gh’hann pressa, osserven, magnifichen, osannen, esalten la nostra acqua, bella ciara e netta, per dagh moeud de sbatt denter bottili, lattin, preservativ, vèder, biccer, biciclett (n’hann trovà pussè de cinquanta), cartascia, frutta e verdura, avanz de mangia’, barattol de vernis, cest, cassett, pellicol, cornis de quader, liber, giornaj, mùcc, pacchet voeuj de sigarett e tutt quell che te vedet quand i e svoeujen per nettaj.

Mi pensavi che la passass ona draga e la tirass su quel ben de dio de roba che i cittadin educaa hann pensà de sbatt in l’acqua anca se a du pass de lor gh’eren i portaruff. N’ho vist on para che giogaven a pallacanestro cont on po’ de bottili in plastica. Quand riessiven a entrà in del bus del cestell se batteven i man. Peu a la fin, n’eren restà on para in terra. Invece de tiraj su e sistemaj nel contenidor dell’Amsa, gh’hann dà ona pesciada e i hann sbattù nel Navili. G’hoo domandà “Perché?” “Perché cosa?” “ Perché sbattej in de l’acqua? Quand gh’avevi la vostra età me s’eri comprà ona pistola che la tirava fort, buttavi des bottili in aria e cercavi de minga faj borlà gio’ e de sostegnii cont i colp. “Non puoi parlare in italiano?” el m’ha rispondu vun in giargianes. I u guardà cont commiserazion “ Pirla, savì quel che voeur dì?” “Perché ci vuoi dare del pirla” “No, sbagliato. El davi a mi, a me. Perché sto chi a parlà con vialter. Me senti on pirla. Fa’ dell’umorismo. Puift. Se vedom.” No, la draga la passa no e el ruff el diventa da discarica. Hoo vist anca on materass squartàa, el resta al so’ post, sutt suttent e pront per impieniss d’acqua.

A te fann vedè il progetto in disegn bell, nett senza pensà che i vandali in duu dì, ‘na volta inaugurà, a hinn pront a rovinà tutt. Ah, l’è bell, indubbiamente. On piano genial. On ripristino che el gh’avarà bisogn de manutenzion affidada a ona quaj ditta che la farà laorà anca senza librett, tant, disen, fatta la legge trovato l’inganno. Peu metteran i guardian, se j e metterann. rispolverà la memoria di ann glorios de la spussa, di ratt Gh’è ogni tant la polizia locale (i vecc ghisa) che la passa in macchina e la ved no quel che succed sui marciapè, sui prà, de drè ai alber, dato che manchen i vespasiani. I bar te fann no entrà se te consumet minga. On dì che s’eri on po’ in anacquament hoo dovu bev ona donzena de caffè. “Ma gh'è giamò el progett” “El sindich l’ha faa ona promessa” “Adess l’è el moment de mategnilla” “Scior Sindich che la mantegna no, la preghi. Se ne femm di Navilj scovert? On’area D in doa te ciappet la multa se te camminet con i scarp de cuoio? E el barbon de Jannacci in doa el mettom? Sì, la diventerà bella, ma in quanti ann? Adess, la città inscì me l’è, la me pias. Cambiamela in mej. Ghe n’è vun che l’ha dit ch’el ved no l’ora de scarligà in acqua cont ona barca, on motoscafin, on gommon, on pedalò, de camminà cont ai pè du savagente e tegniss su cont i racchet de sciì, farann anca i campionà, i cors de fondo navili. Peu cominciaran a trovà cadaver per el commissari Montalbano in trasferta. El sarà pussè facil trovaj in del Navili invece che nel so’ paesin piscinin ma sede de on assassinio alla settimana! (ghe n’è do de paesin, el so’ e quel del Don Bicicletta, al secol Terence Hill. Sincerament, l’ha dit me cugnàa Gian Franco, du mort la settimana me paren tropp) Va ben, gionti mi, che cont el cost di funeral sbandierà sui mur: base 1099, cont tutt 1299, particolar 1499, de lussu 3299, se incentiva la gent a morì.

E dato che s’eri el cantamacabro de I Gufi so’ anca i battud che inventavi per ammorbidì la satira di canzon: “Ieri mattina è stato trovato nel Naviglio il cadavere di un’ottuagenaria. Non sembrava in possesso di tutte le sue facoltà mentali” “ Oggi un carro funebre si è ribaltato nel Naviglio. Gli occupanti sono illesi” e vist che i cimiter (Bagg, Bruzzan, Ciaravall, Greco, Lambrà, Monumental, Maggior) hinn insufficient a tegnì i inquilitt, mettaran davanti all’entrada on cartell cont la scritta “cimitero riservato ai morti che vivono nel Comune”. Hoo ditt ‘sta battuda perché me par de avegh leggiù che han trovà ona baretta da cener voeuja in Ascanio Sforza, a la chiusa semper chiusa, piena de sporcizi. In l’altra l’acqua la cor de fa’ paura. Ma in quella cont la chiusachiusa (se la podeva vess ona chiusa? chiusa!) gh’è de tutt, anca i cassett de mort. Ma allora se g’hann i danèe per desquattà i Navilj perché hann no accettà la mia proposta. La se ciama ancamò Teatropoli e la consist in on area che ho individuada in Forze Armate. In quell grand spazi che el consili de zona, ciamà pomposament Municipi, el dis che voeur bonificà ma che l’è semper lì’ a disposizion come cess, come spazi per drogass, come “location” per fa fa i bisogn ai can, come deposit de roba varia, come discarica provvisoria. Hoo fa on progett cont el me amis Angelo Favro musicist, giugador de Hockey sul giazz, allestidor de spettacol, tecnico del suono, espert in di permess che on ente el gh’a de rilassàa ai giostrèe, ai luna park, ai teater ambulant, ai circhi. M’aveven dit che in quella Banca che la gh’a l’hula hoop che te gira intorna, gh’eren possibilitàa de sponsorizzazion. Sont andàa portà dall’Aldo Colonnello (filosofo de la Merini).

La prima volta m’han dit che finanziaven progett cont on minim de on para de milion de euro. La seconda gh’ho portà on progett complett che ne costava 2 e 200mila. M’han ridù in faccia. Impossibil, l’’ha ditt ona segretaria solerte e precisa. El massim che podom finanzià a hinn 20.000 euro. E allora invece de 6 teater de 1200 post, quatter ristorant, tenda per i baby, tendon magazzin, ona tenda gesa, e quaranta tend negozi, on spazi per on teater all’aperto, on teater de 6.500 post per i cantant, hoo presentà el progett de ona tendina de 200 post per on teatrin adatt ai fioeu. Hann guardà tutt, hann vorsù el progett stampàa, l’era el 2013, semm al ‘18, gh’è passa’ l’Expo, la Brexit, e la risposta la dev ancamò rivà. Perché ridimensionen no la sponsorizzazion a on francoboll, ona busta e on feuill formato Uni?