On bel gioeugh el dura pocch

Milano, 10 febbraio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Incoeu me rimangi ona quaj osservazion circa i canzon che hoo sentì mej a la radio. Ciula, i CD a hinn curà in sala de registrazion! Al festival gh’era la diretta con i so’ emozion, i so’ scagg, ingredient che limitaven la vos. Mercoldì. Hoo rivalutà la canzon, per esempi, de la Tatangelo, hoo assegnà ona bona votazion a quella della Bertè (anca ben la sia stada sòtta a l’interpretazion de la prima sera), e la m’è minga dispiasuda la canzon del Cristicchi. I alter, compres el Silvestri hinn ancamò nel color ross. Colp maester la Mannoia, ospite. L’ha cantà ona canzon cont i paroll da prèmi. L’ha cantada anca ben e se capiva tutt quell che la diseva. Ospite lee come el Cocciante, bravo, semper bej canzon ma interpretà a la manera dell’Esmeralda: ona Margherita piangina. Su no perché quej duu che hann fa’ ridd, Pio e Amedeo, fasessen ridd. El dialett forsi? Ona quaj battuda bona? El battibech cont Baglioni? La simpatia sforzada? El ritmo? Ecco. El ritmo!

Se, però, fudessen durà la metà el sarìa sta’ mej per tucc compres el ritmo. El gioeugh l’era bell ma se dis anca “on bel gioeugh el dura pocch” e “gioeugh fòrza” el diventa ripetitiv. Modesta la scenètta della Virginia cantante d’opera e l’Habanera de la “Carmen de Bizet”. Me rendi cunt che certi nomm se poden no legg singolarment. Hinn nassù inscì e inscì deven restà. Es: Mottura & Fontana, D’anzi e Bracchi, Billi e Riva, Carmen de Bizet e Manon de Massenet, Forza e Coraggio, Cjar e Fort, Can e Gatt, e per conclud i re del binomio: Scarp e Sciavatt. Giusta i do’ paroll per mett insema on San Remo “come il faut” (usi el frances lassand perd i battùd su i visin de la capital di fior frastornaa dal cognàcch napoleon). Giovedì Sont andà a fa’ ‘na cantada al compleann de on me amis che el gh’ha ‘na offelleria in via Mac Mahon. Se cjama Giovanni, l’ha faa i 80. El se fa’ ciamà Vanni second el principi che scorta’ el nomm voeur dì slonga’ la vita. Miee siciliana, tacchen a laorà cont i fioeu ai cinq per desmett ai noeuv e vend i past fresch. Gh’hann on moviment de faa paura. El negozi semper pien( Mi ghe giontaria on’idea: vend i past insema a ona confezion de Insulina). Per comprà te devet mettes in coa come i macchin che la mattina percorren el pont de la Ghisolfa. Gh’era la Face Standard, ‘na volta. Le so perché andavi a fa’ spettacol per i operari. Me cjamava semper on dentista che l’aveva fa’ fortuna cont i bocch di lavorador. Musicista, el se diseva. Per mi, bej dent e musica andante. L’aveva registrada e la metteva come sòttfond quand usava el trapano, che ‘na volta el faseva vosà. Torni a ca’ ai dodes (24), pizzi el TV e vedi Lu (l’è come per Celentano, se dev scriv con la majuscola) ch’el canta.

Voo in cusina a famm el caffè, torni e vedi Lu ch’el canta ‘naltra canzon, voo in studio a scriv, torni e l’è semper Lu ch’el canta cont el Cocciante e poeu ancamò cont on alter. Disi “Viva Baudo che el presentava senza cantà” e te vedi Lù con Pippo. Ma questa l’è on autocelebrazion, disi. Certo. I canzon renden Diritti d’Autore. Se ved che la paga la basta no, me disi intant che sughi i lacrimm del me portafoeuj. Telefoni a on me amis giornalista per domandagh on parer. Riferissi no quell che el me dis anca a proposit d’on urùrsketc fa’ tra i duu B.B. Foo in temp a vedè la partecipazione de la Hunziker. Beh, ‘nantra roba: vivacità e sorris a bocca larga. Hoo leggiù che parlen de fagh presentà a la Virginia San Remo che ven, el 70esim. Meno mal, spettavi domà quella notizia per comprà duu cussitt noeuv e schisciagh ‘na dormida per cinq ser de fila. Vorevi vess sicur che el me giudizi el fodess condivis anca dai visin. Soni a la porta. “Avanti” me vosen. Entri, hinn tucc stravaccaa sul Divani e Sofà che dormen. Voo de sora, soni all’inquilin che de solit el laora de nott, e me venn a derbì cont on sbadiglio long me tutt l’appartament. “Dormivi. Ho miss el canal nazional, quell de San Remo e poeu me sont lassà andà.” “ E i canzon t’hinn piasu?” “ I hoo minga sentii: dormivi! Per mi S.Remo l’è el Mogadon, el Rho Ipnol, la Valeriana. Resisti no a ona canzon intera.” Se dovevi fa’? sont andà in lett. “Ne parlaroo cont la pontada de Venerdì sera e me adegui ai visin. Voo a dormì. Venerdì Inizi cont Lù che canta in mezz a on ballett. Semm in Eurovision. I danèè di diritti hinn decuplicaa. Scomincia la kermess. ‘Sta volta i titolar canten insema ad alter che i discografich deven mètt anmò in gioeugh. Bravi ma cont on ma e certi volt anca duu. Esempi: vestida de passamaneria, riva Nada. Vòs stremida aspett impaurii. Inveci de “che freddol fà” la par dì “che fifa gh’hoo!” e a la fin, per nanca scaldalla, entra el Conduttor massimo, immobil come l’Immobil quand el voeur minga giugà e i duu coadiutor che squittissen i numer per el televoto di coppii. Se per on colp de fortunna gh’avessi la direzion darìa al pubblich certi informazion almen in des manèr different. Sont andà in ona scola che la insegna a fa’ i presentador a prezzi elevaa. Per on’ora fann alter che fa ripèt ad alta vos “Via al televoto” “Stop al televoto” e subit depoeu per on altra ora “… ed eccooooooo gianettiniiiiiiii…” “ …. Ed eccooooo fornichettiiiiiiiii….” . Poeu insegnen a sbrodolass, a parlass addoss, a mangià i paroll. I conduttor o fiancheggiator a la conduzion, ne la firma del contratt hann affermaa “sont on attor voeuri fa’ on quajcoss de lassà el pubblich a bocca averta.”. Ed ecco che in ‘sta scola insegnen a faa on monologo impegnaa. “Con quest te farett on colp de teater talment fort da dissedà i spettator che dormen con la TV a tutto volume…” vist che anca la Rai, in certi moment, la difetta nell’apertura di microfoni. brivio.roberto@yahoo.it