Aneddoti che fermen ‘na battalia

Milano, 22 ottobre 2019 - Intant che gh’era la rivoluzion del 1848, on ròsc de giovin l’era andaa a la ca’ de Lamartine vosand, “abbasso Lamartine, voeurom la soa testa”. El poeta el va’ foeura e i affronta. “Voeurì el me co’? Ve faress comod eh’ tegnill in sui spall per vess pussè ragionevol?!” I rivoluzionari se guarden in faccia e scoppien in ‘na ridada. Da quel moment guai a chi el toccava Lamartine. Ona roba del gener l’è capitada anca a mi. Gh’avevi el Refettori, on cabaret in via San Maurilio. L’era arredà con mobil comprà a Vailate e usavi i cadreghin de gesa cont el sedil fa’ de paja. Se podeven minga comperà. Eren tucc a fitt. Ricordi che duu esattor passaven in temp de messa a tirà su i lirett per el nolegg, parlaven fort quand gh’era de da’ el rest e disturbaven la funzion.

Ona sera, el barista l’era malaa, depoeu el spettacol, vers la voeuna, me metti al bar a fa’ i caffè. Davanti al bancon duu, tacchen a rattellà. On offesa tira l’altra, seguida da la classica rusada in su la spalla da sbatt el sbuttonà contra el mur. Senza dì nè a e nè ba el tira foeura da la saccoccia on cortell. El slarga i gamb, se passa el cortell da ona man a l’altra, e invida l’avversari a fass sotta. Quest guarda el banch in doa stava ona bottiglia de wisky, la ciappa, la spacca a metà sul marmo, mi de drè del banch che me domandavi cossa podevi fa’ per faj desmett cont ‘sto western casarengh. Me vegn l’idea fulminante. Vosi: “Gh’avii la tessera? Quest l’è on club privaa.” S’hinn guardà, m’ hann guardà e hann taccà a ridd, come i rivoluzionari cont Lamartine. El pensee che da “soci” podeven anca copass i a miss al tappee. S’hinn poggiaa al banch ordinand de bev per trii. Lor duu e mi. Semm diventa’ amis. Vegniven giò tutti i ser per “proteggem”, mangià, bev e fa’ sta’ citto chi l’alzava la vos. Per on poo me sont sentì John Uaine e Woodause insema.