Bocca larga, man stretta

Quand se tratta de faa quajcoss vann tucc a scundess

Luciana Rossi premio D’Anzi nel 2010

Luciana Rossi premio D’Anzi nel 2010

Milano, 18 ottobre 2018 - Gh'è chi el seguta a fass bell cont el sostegnì che el dialett milanes el dev minga morì, che i tradizion van tegnù in pè, che se dev operà in moeud che la città la perda no la soa identità. El cunta domà ball per mettes in mostra, ma al lato pratico se ne sbatt altament del milanes, di milanes, de quej che voeuren tegnill viv. Podaria fa’ nomm e cognòmm, ma quest l’è no on Gossip. Chi voeur capì el capiss. Se el voeur minga capì ch’el lassa stà. Me piasaria savè a quaj fini la gent, i rappresentant dell’amministrazion comunal e regional, se fann la bocca larga quand sembra che parlen a difesa de la milanesità e quand ghe sarìa el moeud per tegnila in pè lassen perd squas provassen vergogna nel fass vedè e sentì milanes. Ma el Domm in doe el sta? E La Scala? E el Castell?, Sant’Ambroeus, la Borsa, San Sir, la tor Velasca, el cosiddetto, a la veggia manera, Centro Direzionale, la Stazion central i, fra pocch, cinq linii del Metrò, el Passante ferroviario, la Madonna di Grazii, el Cenacol, la Fera, i Stilist, Brera, la Statoa de Napoleon del Canova cont i ciapp, pardon lato B, al so’ e a la lùna, el Piccolo Teatro, e centenn de sit preparà per la vista di comun mortal…

E el premio d'anzi? Ma le sann i amministrador chi l’era el D’Anzi? La massima autorità cittadina in fatto de musica! Gh’han miss la targa all’inizi o in fond second i pont de vista, a la Galleria del Corso, e magari hinn a drè a pensà de trasferilla al Monumental, posto che sappien cossa l’è el Monumental! Lunedì mattina, perché la giornada lavorativa, sciori, la comincia la mattina prest e la settimana puranca (proprio) dal Lunedì, s’eri in riunion proppi davanti a la targa, in Galleria del Corso n° 4, sèst pian, a la Curci, cont Alberto Anelli, Angelo Truffi, Renato dal Compare, Gino Fròjo di amis de la musica, el M° Tarallo de la Ciar, la ca’ che la fa’ el disco, e Tony Martucci, a scernì i canzon rivà per el Premio. Fasevom tucc part de la Giuria, quella della prima scèlta, come la polpa. Gh’emm ascoltà ben 117 canzon (semm vegnù foeura per “andà a ca’” come diseva el Gino vers i vott (20) cont la testa piena de motiv. Gh’emm faa quatter fermad de mezzora l’una per disintossicass ascoltand musica classica: Chopin, Beethoven, Segovia e per ultim on concert de flauto traverso contrabbass e piano, fantastich: quatter strument sonà domà da ona persona sola. On gioin che tucc cjamen Andrea e che el promett ben sonand polito e cont grand fantasia.

I giovin voren ben a la musica e amen anca Giovanni D’Anzi el primm grand che quand hoo faa l’esam per podèmm iscrivess a la DOR (drammatica operette riviste), a Roma, el m’ha telefonà per dimm (i Gufi gh’eren giamò) “Uei Brivio, te set stà promoss. Attento, adess. Porta con onor el fatto de vess iscritt a la Siae, fa minga di gabol per aumentà i to’ proventi, firmand canzon che t’è minga faa. E quand te cantet quej di alter pronuncia fort e cjar el nomm de chi l’ha scritta e segnel sul bollettin. Paroll, musica, drammi, operett e riviste a la Siae, dischi a la Sedrim”. Hoo partecipà anca mi a on Premio D’Anzi e l’hoo vinciù cont la canzon Ovej Ovej( Oè Oè )testo de Brivio musica de Mazzotti. “ Oè, oè m’han dà ona ca’/ m’han dà ona cà senza bidè/ e ades comè / adess come faroo/ a lavass i pè senza el bidè/ Quel negher d’on sciostrè, el fioeu del cervelè, disen come te fet senza bidè/la donna del strascè, el fioeu del prestinè/ me ciamen el voncion/ perché me spussa i pè/ Oè Oè m’han dà ona cà /senza el bidè / Al scior Pelè ch’el gh’ha i danè/ gh’hann dà ona ca’ cont duu bidè/ Voo a vend el me gilè/ coi foder a pichè/ e cori giò de trott a giogà al Lott/ L’è vegnù foeura el dès/ el trii e l’ottantott/ e adess mi de bidè ne comperi desdott/ Oè Oè me lavi i pè/ cont dès bidè/ in di alter vott foo el ris cont el purè/ invidi el prestinè, la dona del strascè, el fioeu del cervelè, e anca el scior Pelè/ ghe foo mangià el risott in del bidè.”

A Milan, come in tutt el rest del noster benedett paes, gh’è la mania, inveci de fa’ pussè grand quel che giamò l’è important, de fòppal (affossarlo), fina a la distruzion per poeu piangegh sora. Va ben semm pienn de stranger, me sembra l’invasion di Unni quand hann occupà tutt el territori e hann spaludà el famos lagh Gerundo. Circa on milion, che a la fin diventeran milanes. E allora demighi ona man a fall in pressa. inutil sta’ lì a pensà come faj tornà al paes, mettemii in condizion de integrass in primis cont el linguagg, in secundis a rispettà el soeul, in terzis a vantà minga domà diritt ma anca impegnass in di dover, per fa’ che el passagg el sia costruttiv. Inscì magara on quaivun, se el riva in post de responsabilità al Comun o a la Region el pensa anca al D’Anzi e al so’ Premi. Che significà el gh’ha tegnill in pè domà cont la bona volontà del Martucci e de quej che ghe gira intorna come numm, quand, lassem perd la manina corta per i danè, te dann nanca on teater, tipo el Dal Verme, per fall, per inglobà la gent che la voeur sentì el milanes? Milanes che domà Il Giorno sostegn coi me articol (M-G-D, trii la settimana!)?! E allora, per toeu a quei che in bocca gh’hann domà paroll su la milanesità, ògni responsabilità, e faj content, anca se responden mai o foeura temp come l’è ormai costum consolidaa in tutta Italia, la mia proposta l’è: femmel No.

 

è arrivato su WhatsApp

Per ricevere le notizie selezionate dalla redazione in modo semplice e sicuro