La Rosetta, incoeu e semper

L’angiol coppà da la guardia e el liber-inchiesta dell’Ardemagni

Un'immagine d'epoca

Un'immagine d'epoca

Milano, 22 luglio 2018 - Me ciama el portinar, che adess se dev nominà custode, per dimm che in guardiola (ciamamela no portineria e la miè del portinar portinara perché se de no se offenden); mettemess in bocca i appellativ del moment: lu, custode titolar, lee custoda aggiunta. Perché Custoda? Disen Assessora! Presidenta! Professoressa! Dottora! Donca Custoda. El loeugh in doa lavoren, riceven inquilinn, raccomandàa, posta, visitator, official giudiziari, adetti al gas e a la lus, lettor de contator, ghisa e a volt carruba ciamamel sala de visitazion. Parlatori el fa’ tropp galera, parlament, l’è minga quell lì, parlador se confond cont lavador, sala d’attesa l’è de ‘na stazion ferroviaria, salle a manger l’è quella de la bocca, sala pocch se no el ven tropp salaa le dis anca el Canavacciuolo, incassaa me on negher (chissà perché i negher deven vess semper su de rigol) quand l’insegna a cusinà i rezipe. «Signur Brivio, gh’è qui un pacchetto...».

Da quand l'ha savù che scrivi in milanes el cerca, lu che l’è de Castrovillari (CS), de parlà in dialett «…portad da lo postinne» «Je viens…», s’eri tentà de rispondegh in frances, peu hoo lassà perd: «Vegni subit . Gh’è on quajcoss de pagà?» Scommetti che le sa no quell che hoo ditt «…’no gò capìo …» savevi mi. L’ha ciappà el milanes per venet «ch’el faga no fadiga a rispond, vegni subit» peu, pentìi perché lu el gh’aveva cercà on apertura vers de mi, anca cont on milanes strampalà (Porcaro e Abatantuono ne sann on zicchin, specie el second che el s’è costruì ona popolarità propri cont el linguagg sbalonaa) gh’hoo giontà « salti in ascensoeur e corri ‘me on curètta» «Cossa vol dir curètta?» «Scoiattolo: Cùretta, ch’el cor». El pacch l’era on liber. Edizioni Libreria Sportiva Eraclea. El liber «Ultime notizie della Rosetta. Milano, 1913 -Morte di una ragazza», di Marco Ardemagni, poètta , autor e conduttor radiotelevisiv (Caterpilar AM - Rai Radio 2), interista come mi. Hoo capì. Avevi partecipà a la presentazion de ‘sto liber cont Giorgio Cazzola, cabarettista, cantant, chitarrista e anca laureà che el laora per la Region Lombardia. El so’ temp liber le passa in bicicletta, in sala d’incision, a fa’ serad cont on trio. El so’ nomm d’arte l’è Tabacco Bruciato. Me l’ha spiegaa ma me recordi pu’ perché. Gh’era anca l’ Ardemagni e on giornalistA che el tegniva in pè la discussion. Mi gh’avevi el compit de cantà la Rosetta ne la version de I Gufi. “Il sedici di Agosto/ in una notte scura/ commisero un delitto/ gli agenti di questura/ hanno ammazzato un angelo/ di nome la Rosetta/ era di piazza Vetra/ battea la colonnetta/ chi ha ucciso la Rosetta/ non è della liggera/ forse viene da Napoli/ è della mano nera/…” Intant comincia subit ‘na discussion su la data. La version de la Milly, sostegnuda anca dal Roberto Marelli (me ricordi la presentazion de on so’ liber sull’argoment), l’è “Il ventisei di Agosto/ in una notte scura/ hanno trovato un corpo/la squadra di questura/”. Subit men cattiva de quella che cantom numm. Là i famos agent han coppà on angiol, chi hann l’hann trova’ bell’è mort.

E minga on angiol, “un corpo”. Come in on giall, el Marco Ardemagni el comincia a fa’ i ricerch per convalidà l’intera storia. El va a scartabellà i giornal (Corriere della Sera e Avanti) che hann portà la notizia, el fa’ ona ricerca personal su la giovina de dersett ann, pugnalada da ona guardia, el rileva che la povera donna la podeva andà insema a cent omen men che a vun in divisa de polee, che se refudava de vedell, de stagh insema, el va a cercà la ricostruzion de Leonardo Sciascia “milanes” del Sud che ha trattà l’argoment, el rivela che la tosetta (dersett ann e 360 dì) minorenne anca se fudessen sta’ 365 perché la maggior età l’era ai 21 ann, l’è stada copada dopo che la s’era rifada la vita cont vess scritturada in ona compagnia de rivist a fa’ la sobrettina. Pass per pass, avanti e indrè nel temp, squas semper cont i giornai a la man Marco el passa da la mort ai avventur de malavita, da on furto per el qual l’era stada scagionada a la scoverta de chi l’aveva scritt i testi per el so’ debutto in teater: el futurista Marco Ramperti, scrittor apprezzaa da Gabriele D’Annunzio, Ugo Ojetti e Ezra Pound. Uei, la tosa la recitava “Scarliga” e el Ramperti l’era sta’ pagaa cont 20 lire (men de 80 euro). E depoeu i piantinn geografich dell’epoca, i supposizion de l’Avanti, i amis che vosaven ‘si è avvelenata’, el razzismo di agent in di confront de ona mondana “ammazzatela è una prostituta”. E ancamò la figura del pader de Rosetta, l’autopsia, l’intervent de l’autorità giudiziaria, l’agonia cuntada da la sorella, el parer d’on dottor, i process a la malavita depoeu la mort de Rosetta, i ribellion vott mes passaa da la mort. Ona storia incredibil, seguida pass per pass da quell che l’è stà pubblicaa. On lavor de certosin. Perfina che la canzon l’aveva daa motiv giudiziari dopo l’incisione de Farassino, conossù come Gipo, cont l’editor Pigini. L’inchiesta penal i e metteva sotta accusa per l’oscenità de Porta Romana e vilipendio ai forz armaa de la Rosetta. I conclusion de la magistradura, giudes istruttor Giorgio Bernardi, l’ha mandaa prosciolti gli imputati per Porta Romana “probabilmente ignoravano il contenuto della canzone, che descrive un convegno amoroso”. Per la povera Rosetta el giudes istruttor l’ha decis ona general assoluzion.

El dis che «si fa riferimento ad alcuni agenti calabresi come responsabili dell’uccisione della Rosetta di piazza Vetra, è evidente che non si è inteso vilipendere l’intero corpo di polizia, ma soltanto alcuni suoi appartenenti. I presupposti del reato, quindi, vengono completamente a mancare». Varda ti che gibilèee l’è andà a cercà coi so’ indagin el bravo Marco Ardemagni. E mi me lassi scappà l’occasion de fa’ on musical? Le vedi giamò. Ona procession interminabil al funeral incombent per tutt el spettacol. I malavitos vesti de ner, i puttann de bianc, i process, i notizi giornalistich, i strillon di giornal, la gent che la intervenn, i busii, i fals, i document che parlen, i dottor che avalen, la gent che la se moeuv, che la deventa giudes, che la condanna, che la perdona, che la incattiviss. L’opinion pubblica manovrada, i riferiment a la vita de adess. Material che se ghe l’avessen in man i american ne tirarien foeura on spettacol de fa’ esaurii(sold out) per almen vint ann compresa l’esportazion in tutti i continent. Avanti, finanziador, semmm chi che spettom! Ona colletta che adess ciamen Crowd Founding e l’è fada. La Povera Rosetta de Marco Ardemagni- Roberto Brivio- Roberto Marelli. Musiche di Enrico Intra. Regia di Roberto Brivio. Cast? Demm i danè e ve metti in fila quatter nomm da sball, on ballet de prima, on’orchestra primaria come i elezion, e canzon che van per tutt el mond. Perchè mi all’ “Elvira Andressi alias Rosetta” , ghe credi.

brivio.roberto@yahoo.it

è arrivato su WhatsApp

Per ricevere le notizie selezionate dalla redazione in modo semplice e sicuro