Marta Marangoni
e Fabio Wolf
El 27 de luj del ann passaa hemm perduu on grand amis e on gran milaneson. El Piero Lenardon l’era minga domà on attor comic o on pajass - come se dis - l’era pussé. On istrion straordinari cont ona mimica pazzesca. La soa l’è stada ona carriera ultraquarantennal e luu l’ha passada soratutt cont i collega de semper Valerio Bongiorno, Carlo Rossi, Bano Ferrari: la mitica Filarmonica Clown. Se gh’avii minga avuu la fortuna de vedej in sul palch, ve consijomm de fà on bel gir sul YouTube, restarii cont la bocca averta. Spalancada! Comincen in del 1978 – quand la naseva la Marangoni. Poeu la collaborazion cont el famos regista ceco Bolek Polivka, che el firma i pussé gran success de la Filarmonica. Capolavor de poesia e comicità l’è el “Don Chisciotte”, rappresentaa per ben 22 ann, dal 1990 al 2012.
El Pieron, inscì le ciamaven per la soa bella stazza, l’ha lavoraa cont i pussé important del teater milanes, de Branciaroli a Sarti. L’è staaa anca autor, regista e insegnant. Appassionaa de Teater Social, l’ha fondaa cont nialter l’associazion Minima Theatralia. L’haa faa film cont el Virzì e l’Archibugi. L’ha recitaa in Europa e in del mond e a Milan l’ha calcaa financa el Piccolo e el Carcano. El sò amor per el dialett milanes, per luu furlan de origin, l’è staa travolgent e luu le metteva in scena cont l’attor Marino Zerbin, el “magister milanesorum”. Per nialter Duperdu el Pieron, cont el sò sorris malinconic, l’è staaa on maester, on amis, on immens attor de teater.
Per ricevere le notizie selezionate dalla redazione in modo semplice e sicuro