'Navolta l'è ancamò adess

Milano, 12 agosto 2018 - M’è semper piasù fermamm in ona libreria e vardà vun per vun i liber, sfojandoi, legend pòcch righ (te entret semper in contatt cont paroll che te colpissen), fa passà i covertin, individoà el prezzi, se gh’è on scont, se gh’è minga, cercà on argoment particolar, domandà de on titol che te set nanca se esist e meravigliass se el libree t’el troeuva magara in ona vegia edizion, comprann vun e accorgess che l’e’ propri quel che te pensavet de comprà. L’alter dì s’eri a al negozi “La Fiera del libro” in cors XXII Marz, a Milan. Ogni mes, quand rivi visin, la mattina, ghe foo ona visita e ogni mes troeuvi l’interno e i vedrin rifaa. Ona volta m’eren capità in man duu liber de calligrafia che insegnaven come scriv, cont in la pagina el post per i esercizi. Vun el partiva addirittura dai ast de cara memoria. Quand s’eri fioeu e me toccava de faj trovavi che eren ‘na barba infinida. Adess capissi perché i maester de la mia epoca ne daven pagin e pagin de compilà. Perché te stabilizzaven la man mentre la faseva i segn, perché te insegnaven a tegnì la matita o la penna ne la manera giusta. Adess, la scrittura de la maggioranza di fioeu la par fada cont la sciampa de gaina. La maestra di elementar la dev vess brava e i professor di medii pussè ancamò per capì quella scrittura che nanca on medegh el riess a faa. Ghe voeur el decifrador di geroglifich per capì quell che hann scritt. E tutt cont el linguagg di telefonin. I hoo comprà tucc e duu ma spetti el moment che capita a taj per daghii ai me nevod.  ‘St'ultima volta sont entrà e hoo domandà se gh’era per cas on liber che parlava de tucc i santuari d’Italia e magara d’Europa. Uso? Voeuri regalaghel a mia sorella che la fa’ ‘na ricerca per on settimanal religios. Giri on quaj scaffal e vedi on liber ch’el me colpiss: Rosvita, dialoghi drammatici. Prèzzi €12,50. Rarità. El tiri foeura dal confanett contenitor e vedi che a manzina l’è scritt in latin e a drizza in italian. Voltada squas letteraria. Me aveva attirà el nomm, ma l’è stada ona curiosità premiada perché hoo leggiù ne la prefazion che l’autrice, giusta Rosvita l’è paragonada a Saffo: si Sapho decima est Musarum dulce canentum/Hroswitha scribenda est undecima Aonidum. Stremives no. Foo subit la voltada in milanes: “se Saffo l’è la decima Musa dal “dolce canto”, Rosvita l’è quella di vundes”. El libree el gh’aveva trii coppii. Edizion Garzanti del 1986, 32 ann de anzianità, nanca tant per considerall on liber de antiquaria’. Intant ch’el pagavi insema a Il giro di Milano in 501 luoghi de la Marina Moioli, ediz. New Compton, me sont informà dei me duu liber pubblicaa da la Meravigli: El Liber di Parolasc e Attenti al Gufo. Del primm ghe n’era ancamò, ed eren giamò quatter ann che el se vendeva, del second nanca ona copia. In compens de la Meravigli gh’era ona stravacada de titol su on bancon apposit. Hoo domandà se vendeven. Rispòsta positiva. La gent, incuriosida da tanti titol, la comprava. Gh’era ona donzena de lettor che gh’aveva tutta la collezion. Scommetti che la gh’ha nanca l’editor! (se fa’ per dì).  Ciaccera ti che ciaccera mi salta foeura che el libree el se ciama Davide Guaitamacchi, che insema al fradell Angelo l’è subentràa al pader Adriano, che la libreria l’è stada fondada nel 1963 e che el pader l’era vun di primm organizzator del Premio Bancarella. Guarda caso. Mi hoo presentaa la final del premi a la quarta o quinta edizion, a Pontremoli. Gh’hoo a ca’ ona foto de mi cont la Zanicchi, ancamò prima del “ritocco” alla canappia. La gh’aveva on vestì che adess le vardarìa nanca ma che allora l’era on capo de alta sartoria. Hoo ricordà vun di organizzator del spettacol: Filippini, ch’el gh’aveva ona libreria in cso Beuones Aires davanti al Puccini. Beh, el Filippini insema a Moroni, alter bell personagg de la Milan politica di ann ‘70 e a Giorgio Zoppi, coeugh, m’hann vendù el Refettorio, cabaret ch’el passava per quell di intellettual milanes. Infatti ghe andava tutta l’intellighenzia che la frequentava la libreria Cavour de Renzo Cortina in doa avevi inventà i cabaret letterari. El mond l’è piccol e vun come mi el gh’ha ricord su ricord ligaa all’attività. On quajvun el salta semper foeura a dì che l’e’ el fioeu de…, el cugnaa de…. el fradell de…, la miè del…, la sorella de…, gent che l’ha fa’ part de la toa vida. Te la trovet passand de lì, de là, de su, de gio’, intanta che el campanon del domm el sona i or che passen svelt. L’era l’alter dì el 1970, e semm giamò nel 2018. A la fin de la guerra de cent ann fa. Ho vist Quark, mercoldì vott, e hoo sentì’ el Piero Angela, fresch, pimpant, giovin, ch’el diseva de vess del 1928. Des ann pussè de mi. Magher, in forma, ch’ el sona el Jazz come on professionist (l’ho vist ne la puntata da la settimana passada) col Franco Cerri e Adriano Mazzoletti, amis de la prima ora de I Gufi. Quell che i a portà al Teatrin de Gassmann in trii serad memorabil in doa hann conossuu tutta la crèma di attor de Roma, in doa hann presentà on para de numer del spettacol faa al cinema Teater Fiammetta. Cont lor, da Gassmann el debuttava Gigi Projetti, e ona compagnia formada da Antonio Salines e Magda Mercatali. Sont denter in piena cont i vecc del teater, quij che ‘na volta eren giovin (bella scoperta). Ma l’è che “ ‘navolta, per mi, l’è ancamò adess”. Come se fudessen minga passaa 53 ann. Mezz secol cont tutta la soa storia. <EN> Ma l'è minga finida cont i ricord. Dal 41 al 45 s’eri sfollaa da la mia nonna a Morsano-San Paolo in provincia de Udin, allora, ‘dess lè sotta Pordenon, anzi l’è sotta a nient perché i provinc i hann desfaa. Praticament la guerra l’hoo passada sul fiumm Tagliamento, che l’era minga ona zona de pas, de calma. Vedevi sul ciel la luminaria di scoppi, di bomb, de tutt quell che podeva illuminà el fondal scur dell’orizzont sul fond di camp, hoo vist i tedesch che fusilaven, hann sparà perfina a mi, partisan che faseven la resistenza, hoo vist el dì de la liberazion, i carri armati di alleati che entraven nel paes, i fest per la riconquistada libertà, e in di ann che vegniven depoeu (46-47-48-49-50- 51) in vacanza semper da la mia nonna hoo leggiù ona intera biblioteca, quella “dei miei ragazzi editor Salani”. Ghe l’hoo dit al Guaitamacchi junior, che ormai l’è a drè a diventà senior, e cont on salt el m’ha portà a vedè ona ottantina de liber poggià a la ringhera che la dava nel sotterrani pien de liber introvabil, ingles e frances. In su la scala faseven bella mostra i liber de la mia gioventù, dal Piccolo Lord, ai Salgari, dal Piccolo Vetraio a Robinson Crusoè, edizion De Agostini. Me vegniva la voeuja de comprai tucc per leggii anmò e me sont ricordàa che per la Ricordi, in di ann ‘60, appena finida l’Accademia, hoo registraa ses o sett de quej liber in disch cont la compagnia de prosa de la radio. I primm regii i hoo fa’ faa a professionist come Cesare Emilio Gaslini, Francesco Dama. I alter i hoo fa’ mi. Avevi imparaà el mestèe, anca a taja’ i naster, a montai, a sonorizzai. Adess de la Ricordi gh’è domà el ricordo, ma i matris voeuri recuperai e stampà i Cd per el prossim nadal, e peu dì a quej dell’Agostini se voeuren fa’ on quajcoss cont i alter liber, magara cont el noeuf sistema cjamaa “realtà aumentata”, per dà ona spinta all’acquist de quej che i genitor dovarissen fa’ legg ai fioeu. El temp che passen in lettura l’è tutt robà ai cellular e ai pericol de la strada. E inscì tra règord e règord semm entrà e vegnì foeura da ona libreria che la va per la maggior anca se l’è foeura dal grand gir di librerii comprà e gestii dai grand editor che gh’hann difficoltà a vend come tucc. 

Quest perché anca per el liber, come per el cinema, el teater, i giornai, gh’è sì bisogn del supporto stampa, dell’organizzazion de vendita, del famos cartel “Sale” taccà sui vedrinn, ma se gh’è no on poo de fortuna chi scriv el poeu taccass al tram. «Però se nel moment che el se tacca la se stacca la perteghetta, el tram el se blocca e lù per el contracolp el perd l’equilibrio, el borla in terra con la borsa piena de liber che ghe picchen sul coo dimostrand che se po’ fass mal anca cont la cultura».  

brivio.roberto@yahoo.it