Marta M. Marangoni
e Fabio Wolf
Se sa che a Milan gh’è in progett la metropolitana, però ogni dì sto progett semper pù el s’allontana…". Inscì el cantava cont ironia in del 1939 el noster Giovannin D’Anzi sora i parol de l’Alfredin Bracchi, milaneson anca luu e autor de milla canzon. Perchè questa ironia? El progett de la metro l’era nassuu in del 1913 e ancammò prima in del 1857 pensaven a on’ippovia denter el lett de la Martesana prosciugada. Dopo l’è ‘rivada la guerra e s’ciao, l’approvazion l’è scarligada al 1933.
Poeu in del ‘38 el progett l’è pront, ma la ‘riva on’altra guerra e te saludi! A la fin de la fera la nostra metropolitana la nass in del november del 1964, disegnada di architett Franco Albini e Franca Helg.
La segnaletica l’è del Bob Noorda e la diventarà quella di metropolitan de tutta la penisola. E anca de New York e de Sao Paulo. La emma bianca in sul fond ross l’è on emblema de Milan in del mond. Incoeu el se inaugura el prim tratt de la metro blu. Se podarà ‘rivà de l’aeroporto de Linate fin a Piazza Dateo e de lì ciappà el passante ferroviario per andà indove te voeuret.
La nostra metrò l’è la prima in Italia per estension: pussè de 100 km de rodai. Adess ghe manca solament on bel anell de metro che la gira intorna a la cittaa e la mett in connession i periferii in fra de lor. Forza sindech Peppin Sala! Insomma, cara i noster Giovannin e Alfredin, adess la metropolitana la gh’è e l’è anca on fior a l’occhiel del nost Milan!
Per ricevere le notizie selezionate dalla redazione in modo semplice e sicuro