Quand gh’era el tram de Monscia

Milano, 1 agosto 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Porta Venezia (legg venessia) l’è on quartier de Milan cont on fascino particolar. I do casei quadraa segnaven el limite cittadino, i bastion eren come on baluardo e impediven a la gent de entrà, i giardin pubblich cont el famos Monte merlo, ona specie de altura fada cont i ròcc artificial, degradaven vers el zoo. La zona l’ha ospitaa la prima esposizion internazional, per vess precis el primm expo. Pussè in là, depoeu la piazza che adess se cjama Repubblica gh’era la stazion di Varesin, cjamada inscì perché la faseva arrivà e parti’ i treni che andaven nel varesott. L’era on ramo de la veggia stazion central. Adess lì gh’è ‘na città noeuva, cont prezzi da sball, e on centro, che ‘na volta l’era ciamà ‘direzionale’, che po’ fa invidia a ona New Yorck chicchessia. Mi abitavi in Lazzaro Palazzi, via che la portava da ona part in Corso Buenos Aires (incoeu l’arteria pussè commercial d’Europa, disen. Mi me contenti che la fodess de Milan.), dall’altra in via Lazzaretto, nomm d’on ospedal tegnì in grand cunt perché el ricoverava nel ‘600 domà appestaa. L’epidemia che la risparmiava nissun la finiva denter i mur quadraa cont al centro ona gesetta esagonal che, per miracol, la gh’è ancamò completa de tutt, compres i quindes stanz, diseven, del primm pian. Mi, che fasevi el cereghett propri lì, l’ho girada in long e in largh. L’è contornada da on vespee che ghe dà respir. In Lazzaro Palazzi gh’era nel dopoguerra on mercaa de frutta e verdura, al de là de la via Lazzarett on ristorant dell’Eca (Ente Comunale di Assistenza) cont la prima e la seconda class. In prima gh’eren i tovaj bianch, in seconda rettangol de carta giusta la misura del piatt. Quej de la seconda doveven mangià in pressa per lassà liber i post per on alter turno, quej de la prima doveven sta’ attent a sporcà no la tovaja se no el camerer i e bastonava sui man (scherzi). In realtà el camerer de la prima el faseva servizi cont la giacca bianca, quell de la seconda in camisa. El self service aveven anmò de invental.

Adess almen hinn tutti compagn anca se hinn minga Compagn. Impiegaa, operari, cap offizi, gent comun, hinn tucc in fila cont el vassoio e passen davanti ai addetti alla distribuzione del cibo, salten el primm, el second e mangen prosciutto e melone, mozzarella e pomodori, insalatona. Gh’hann minga la famm che gh’era nel dopoguerra in doa se mangiava primm, second, a podè anca el formagg perché ‘la bocca l’è mai stracca se la sa no de vacca’, pomm o naranz, caffè. Saltaven el dolz come le salten incoeu per minga ingrassà, per tegnì bassa la glicemia, perché l’è alt el colesterolo. In fond a la via Tadino, gh’era el cinema Giardini, trop car per numm tornà dal sfollament. L’era in voga el detto “Voo al Giardini” “Ciolla!” “ tra le coltri e i cuscini” “ciolla!” parola che la gh’aveva el significà del “me cojoni!”.

A fianc on slargo ciamà piazza Oberdan cont on diurno (cess U e D, perucchee,manicur, pedicur, barbee, biglietteria treni, lustrascarp, edicola e on para de stanzett per riposà) liberty, bell de visità anmò adess. Davanti al piazzal, sotta i bastion che in quel ponto degradaven a altezza zero, partiva el Tram de Monscia. El gh’aveva el so’ fascino tanto che gh’han fa anca ona quai canzonetta : “ Sta tornando il grande Amleto, viene sempre in gran segreto, mentre pensa pensa e ponza, arriva il tram di Monza onza onza onza za” e ancora “ El postion de Monza, el dis ch’el trotta pian/ ghe mett trii or e mezza/ da Monscia andà a Milan” e ancora “Bella se vuoi venire sul tram, ma dai, sul tram, ma dai- Bella se vuoi venire a Monza assieme a me” e lei rispondeva “Mi no ghe vegni no, mi go paura de borlà giò.”

Se te ciappavet el dirett te andavet al Rondò de Sesto San Giovanni e poeu per via Casiraghi sul vial Fulvio Testi e te costeggiavet fin a rivà al Parco. Se te ciappavet l’acceleraa a Sesto te andavet driz per San Rocc e ancamò drizz per via Milano. Giamò col tram l’era on viagg, figuremes quand i carrozz eren taccà ai cavall. Ecco la spiegazione dei trii or e mezza . Te podevet ciappà la littorina a la central, smontà a la stazion de Monza de drè all’hotel Falcone. A tornà indrè pareva pussè curta. Col treno te rivavet a la central e da lì in Lazzaro Palazzi gh’eren des minut de strada . Col tram te smontavet sotta i bastion de Porta Venezia (leggi Venèssia). La domenega eren serà al traffic. Gh’era el passeggio del servidorame milanes e l’entrada ai Giardini Pubblich da quatter cancell. Quell al canton del corso Venezia (legg venèssia), taccà a la ca’ de la Sirena che in temp de guerra la sonava per avvertì la popolazion quand passaven i bombarder, cent meter pussè avanti el cancell del cine all’aperto,poeu l’entrada de Monte Merlo in doa gh’era on ristorant, e quella del canton con la via Manin . HANN approvà la legg. Da la linea Lilla con la gionta se arriverà a Monza. Da trii or e mezza a on quart d’ora. Ona bella conquista. L’è la Tav di mezzi pubblici. In fond a la via Tadino sostaven i puttann, Ma questa l’è ‘naltra storia. brivio.roberto@yahoo.it