Quatter pass da fantascienza

Milano, 30 luglio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

On mes senza el milanes e me par de vess a zero de cultura. Sì perché me sont abituà trii volt la settimana a scriv ona pagina e per squas tutt el mes de Luj el vocabolari italian milanes e vicevèrsa l’ha piangiù visin al computer. El segutava a dimm de derbill, de consultall, de trovà el moeud de doprall. E mi dur, l’ unich moeud per vess tal, a lassall saraa. Adess el ridd content e soddisfatt. Passada la paura de vess minga doperà l’ha ciappà de noeuv i so temp. Uei, me par ch’el se faga in quatter per damm quel che cerchi in pressa. Mi so no se l’è suggestion o applicazion pussè professional da part soa, fatto sta’ che se cerchi ona parola cont la ‘a’, quand metti i man sul vacabolari derbi la lettera ‘a’. Inscì per qualsessìa vocabol cerchi una “p” e derbi la ‘p’. ona ‘b’ e se derba la ‘b’. Semm duu robot cont on gran rispett per i omen e gh’èmm denter la famosa legg di robot scritta da Asimov, autor de fantascienza, scienziaa, e personagg squas robot anca lu. L’è de la genìa del Roberto Vacca. Del Brown, del Shekley, del Bradbury. Scriven de fantascienza e intant chi l’è on fisic, chi l’è on matematich, chi on astronomo, on coeugh interplanetari. Hinn bej? Boh! Hoo vist la foto de certi, me sembraven Jerry Luis quand el faseva el professor: oggiai sul nas, vos che la gracchiava, corp on po’ mej del Michelin.

Del rest ciappa Einstein. L’era minga bell, però che fisich! Cicciara e cicciara, fa’ passà el copion e te la chi la famosa legg. Tenti de voltalla in milanes. Inscì ghe doo soddisfazion anche a la sciora Rosa che la se fa domand su domand. E cosa hinn i robot, e perché se veden no in gir, se gh’han la forma d’on omm, se invece l’è domà metall miss insema a ragionà, e perché ragionen, se gh’hann el diploma de ragionatt o hinn inveci geometri , cossa hinn i trii legg de la robotica. Me fermi domà su questi ultim perché me auguri che i lettor sapien giamò rispond lor medemm a i domand de la sciora Rosa. Donca: 1° on robot el po’ minga fa’ dagn a on essere umano, né el po’ permett che, causa el so’ mancà intervent, on umano ‘l poda ricev dagn. 2° on robot el dev vess ubbidient ai ordin che gh’hann daa i uman, a condizion che i ordin siov minga in contrast a la prima legg. 3° on robot el dev protegg la propria esistenza a condizion che la contrasta minga cont la prima e la seconda legg.

Ma tutti i robot del mond gh’ hànn incorporà ‘sti legg? Roberto Vacca el dis dall’alt de la soa scienza e fantascienza che avanti nel temp i robot diventaran semper pussè simil ai uman, anca in di sentiment, in di ragionament, in l’autonomia. Uei, ai inizi de la soa carriera l’ha scritt on romanz intitolà ‘Il Robot e il Minotauro’ che Gigi Vesigna e Gici Ganzini Granata ( gh’hinn pu) cont Roberto Brivio, gh’hàn fa’ la riduzion teatral, mai rappresentada - cont on po’ de fortuna la sarà missa in scena in la stagion 2019/2020- in doa se deciara quell che podarann fa’ i robot, financa l’innamorament , i fioeu- robotitt, la scarica di sens tipo sex and city. “L’è minga per bellezza” el commenta Vacca in italian perfett (l’è anca on linguista e so no quanti ne parla e ne cognoss) in vun di so’ ultim articol. “ L’è per difesa”. Ghe mancaria che la robotica ciappass el sopravvento. L’omm sarìa finì, depoeu ave’ inventà tutt ‘sto ambaradam.

Quand hoo rappresentà al Teater Nuovo “Fantascienza”, on spettacol in doa spiegavi la teoria de la ‘quarta luna’ tirada foeura dal frances Denis Saurat basada sui studji de l’astronomo Hoerbiger (Austria) e da Bellamy (Inghilterra), fasevi la part de George Darwin, fioeu del famos naturalista, domà per cuntà al pubblich che fra 50.000.000 de ann, la Luna la sarà a 550 mila km da la terra. La giornada la sarà formada da 47 giornad de adess. Insopportabilment cald (scommetti che hinn comincià a Luj de quest’ann!). E perché? Ma perchè el mantel atmosferich el bastarà no a protegg el globo dai ragg del so’. E de nott? Gelo a men 30/40. Beh, in tutt ‘sto gasaghee, maree che acceleraran el moto rotatorio, Luna pussè visin a la terra che l’andarà in tocch e ‘sti frammenti formarann on anell pari a quell de Saturno, terremoti, maremoti, territòri vegnù a galla, tsunami, slusciad meteoritich, restarà domà la canzon del Loff Mannaro incassà perché gh’hann toccà la soa dea.

Al licantropo lunare/ quando c’è la Luna piena/gli cominciano a spuntare/ tanti peli sulla schiena . Quella Luna verginella/ dolce soffice intoccata/ è una piccola monella/ ecco pronta un’ululata. – au au au au sono il Licantropo di via Gesù/ au au au au pizzico stritolo e mordo su e giù/ au au au au come vorrei arrivare lassù/ au au au ua quella vigliacca soffrire mi fa. (OPTIONAL)La Domenica del venti/ si rinchiuse dentro casa/ con un forte mal di denti/ ringraziar dovea la Nasa/ che mandando sulla Luna/ quegl’impavidi astronauti/ ha segnato la sfortuna/ dei mannari tutti quanti/ - au au au au da quando sono ‘discesi’ lassù/ au au au au con questi denti non lacero più/ au au au uè sento che il pelo si stacca da me/ au au au uo senza la coda e le unghie che fo? brivio.roberto@yahoo.it​