Se ne po’ pu de vedèi stess facc

Milano, 2 giugno 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Pazienza se on editor cont i so trii canal fondamental e alter de riserva el decid de mett in concorrenza i programm di so’ television (el primm concorr cont el second o cont el terz), vorarà dì che la somma di audiences faa per on film important contra on programm sportiv o on servizi giornalistich interessant o on varietà, aumenta el pubblich di so’ tv. L’andarà a benefizi de la Rai o de Canale 5. El stordiment me vegn quand i canal di duu editor se fann i dispett, es: Montalbano da ona part, la Hunziker dall’altra, De Filippi de chi, Venier de là. Costanzo de…no Costanzo l’è inspiegabilmente de chi e de là. El video spettador, combattù, el seguta a cambià programma senza avè el piasè de veden vun per inter. Già gh’è de fa’ on distinguo sui personagg che ormai, e semper quej, ti e troeuvet sia da ona part che dall’altra e se te set rognà in duu programm , la stessa sera, che se fan concorrenza. Perché sta’ diatriba? Perché se ne po’ pu de vedè i stess facc, sentì i stess opinion, assist ai medemm giudizi, ascoltà i stess paroll e vedè i stess moviment.

Hoo sentì diversi parer in gir cont el me televoto fa’ di telefonad e tutti hinn concord nel dì che l’è on moment confusionari in doa l’è difficil orientass e l’è facil sconfondess, come in politica. A chi l’è che te dett a traa? Gh’hann tutti reson! Fann tucc, come i accordi in maggior e minor che ti e ciappet cont i “rivolti”, i medemm istanz. E gh’hann reson. Ma propri tutti? Par de sì. Beh, on quaj cambiament anca piccol le proponen. L’è come la cusina. Chi la fa’ in on moeud, chi in on alter. Ma te uset i stess ingredient per rivà ai stess piatt. Te degustet, te giudichet, te preciset i savor. “ On gust bon, bonissim, ma mi mettarìa on po’ de… o on po’ de…on ciccinin de…” e giò lacrimm, oeucc ross, frustazion per el giudizi anca personal de ona giuria, de on insegnant, de on giudes. “second mi…” l’è minga personal? e… “mi farìa”? e … “Damm a trà, in trent’ann de cusina hoo semper…”. Se te legget la “Milano sconosciuta” del Paolo Valera, quand la descriv i Bois, te rivalutet anca la pussè infima pizzeria de adess che l’è semper, a causa di ispezion e contravvenzion, linda e netta al confront. Cossa hinn i Bois? Eren local caratteristich in doa te trovavet pittor e poetta a l’ora del disnà e di zenn. L’era on po’ teatral in di descrizion ma el te dava la giusta idea. Second mi Strehler, nel fa la regìa del “Nost Milan” del Bertolazzi, l’ha tegnù cunt de quel che diseva ‘sto scrittor che la critica del temp diseva avegh “ uno stile bituminoso”.

“I Bois o 6015, inscì i ha battezzaa el volgo, rappresenten quaicoss de bizzarr sia come local che come moeud de preparà i ‘cont tanto giust, poscia, posciandra ma forsi l’è mej scriv ‘moeuia’, parola cont l’ironia calibrada per raffigurà quell che cusinaven i coeugh”, che portaven i camerer cont l’aria de sguatter, moeuji come i pitanzin compesà che gh’aveven nel piatt sbattù in ona quaj manera sul taol dell’avventor (forsi sont stà pussè teatral del Valera). Trii servizi: 8, mezzodì, 8 de sera, cioè 20 (vint). Entraven murador, garzon di scuderii pubblich, di fonderii, legnamee, sbianchin (voraria savè chi l’è che l’ha comincià a ciamaj pittor) ecc. Ai dersett (5 bassora) vegniven foeura dal bois a la spicciolada “certi esseri dalla faccia scialba, dall’abito sdrucito, dalla chioma assalonnica (lendenon) che in linea povera si direbbero ‘spiantati’. I primm e i second, anca se senten giò a la stessa mensa, voeuren minga avegh on quaicoss in comun. I manoval perché laoren, i spiantaa perché se tegnen disonoraa, oltraggiaa al contatt de on manoal chicchessia. L’è la miseria che la gh’ha ancamò el falso orgoglio!

Me vegn inment  tutt quest quand leggi i manifest che domanden el 5 per mila dell’opera di fraa con la numerazion di numer di past dà gratis in on ann, di vestìi donà a chi che i e richied, di docc fa’ faa a quej che se presenten sporch e spuzzolent. (Gh’el do ai fraa). El Valera el va’ avanti in italian e mi volti el discors in milanes: Appartegnen al mond di spiantàa tucc quej che gh’hann minga on mestèe o anca quej che n’hann mai esercità vun: pittor senza tavolozza, poetta senza estro, romanzier senza avè mai scritt ona riga, cantanti senza vos, commess senza negozi, ammiragli senza nav, general senza esercit, scrivan de avvocatt eternament a spass, e ancamò camerer, servitor che hann minga sopportà la tracotanza di padron e che per quest hinn stà mandà via dal servizi, insomma gent abituada a vedess covert de strasc, besasc, strigòzz (cenci) e a viv in mezz a la pussèe implacabil miseria. Mi giontaria che tanti voeuren fa ona vita inscì e la scambiarien mai cont quella del benestante. Ne hoo intervistaa vun de fianc a la libreria Hoepli, in piena nott, sbattù long e distes su ona panca de legn, covert de tutt. Gh’hoo dit: “se ghe dessi i danè per anda al dormitori ?” “ In mezz ai barboni? Mai!” el m’ha respondù, e poeu l’ha rincalzà “ nanca se me dà i danèè per andà al dormitori de front (l’è on albergo a 5 stell). L’è on mortori, gh’è no vida. Voeur mett chi, su la strada in doa succed de tutt e gh’è on rumor ch’el te tegn compagnia? Se me manca on quajcoss? Si’ ona volta gh’eren i cobianchi... Quej sì che serviven. Adess? gh’è de rangiass!” Ecco, perché ai elezion comunal hoo faa ona campagna telecine girada da Guido Veronesi per la EBC e mandada in TV. su You Tube, su Facebook, sul me Sito, per diventà sindich virtual. Savii cossa l’era el primm ponto de realizzaa? 2500 cess, per iuttà tucc quej che poden minga andà al bar del rest riservà ai avventor, serrà per la maggior part, o rott per minga derbill a tucc, o spend 1 euro prezios a la stazion domà per cambià acqua. brivio.roberto@yahoo.it