Sogn, sognett e sonamber

Milano, 21 maggio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Gh'è di giornad che, a la faccia dei to’ impegn, te vorarisset doprà per dormì. E a la fin te finisset per fall perché in ogni canton te picchet el sognettin. No, no, l’è minga ona malattia o l’effett de ona quai medesina. L’è sògn, come disen i Ingles, spliin, voeuja de mettes in poltrona, de poggià la testa su la spallera bella alta e piccagh denter ona dormida che quand te se svegliet, anca se hinn passaa on para de minutt, la te sembra ona ronfada de tanti or. L’è bell dormì davanti a la television intant che te cerchet de capì quell che disen i sottoposti del commisssari Montalbano. L’è minga de tucc capì el sicilian. Me domandi certi volt se al post de Montalban, siculo giuraa, ghe fudess el commissari Brambilla o el commissari Carugati e parlassen coi collaborator milanes spettascià, che reazion gh’avariss la stampa, la direzion di grand television, el pubblich. Immagini, petizion, reclamm, moviment, reazion, grida, libell, on tirà via sponsorizzazion, spostament del programm e se el regista e i attor hinn d’accord, cambiament de Red, da la prima a la seconda, a la terza, e semper pussè giò fina al canal de la scola. Se parlom de la Tv de Stato...

Cont i commercial nanca pòness el problema. Lì inscì el programma el fan saltà cont ona scusa qualsessia. La proeuva? El fumett de Celentano. El gh’aveva di difett? Correggej. No. Tegnemel in naftalina. Tiremmel foeura tra vint’ann e femmel passà come reperto storico. Magari, disi magari in sordina, bastava toeu de mezz l’antefatto recitàa mal e cont la sola idea central de fa’ passà l’Adriano senza fall parlà. No, no (vann semper a du a du i “no”, come i Caramba).L’era l’idea del colp de teater. Fa’ minga parlà el protagonista, quell che ipnotizzava l’Italia cont i so’ predich, ma nel contest de la rivista. Minga ona sola, longa che la sembrava el Vecchio Testamento. E l’idea de fa’ passà la gent cont la nav carontiana, bella per ona gag, ma basta lì. Sicchè l’era minga el fumetto sbagliaa, l’era l’antefatto. Poeu in del fumetto troppa carna al so’ che la faseva l’amor. Perfetta eh? Perché i disegn del Milo Manara eren on studi leonardesco, eren morbos, eren provocant. E basta perché me vegn a ment quella canzon goliardica dell’uselin che el s’è posato sulle spalle/ l’usellin battea le alle/ s’è posato sulle tette/ l’uselin battea le alette/ se posato sui ginocci/ l’uselin battea li occi/ s’è posato sulla ..., fuss che sia la volta buona, l’uselin ch’el non perdona. E proprio lì volea volare l’usellin de la comare (2 v). Già ch’el gh’era podeva mettegh disegnada la storia, cuntada dal Walter Valdi, de Biancanev che la se sbiotta in del bagn e i Nani in fila al bus de la serradura che la guarden. El primm el riferiss al compagn che ghe sta’ de drè e quest al compagn e quest al compagn, fina al settim, Cucciolo. “Ecco si toglie il reggiseno, reggiseno, reggiseno reggisen… adesso le mutandine, mutandine, mutandine… che cadono a terra, terra terra terra….ecco si china a raccoglierle, raccoglierle, raccoglierle… si alza, anche a me anche a me anche a me….” Oppur la storia del fraa che l’è adrè a confessà ‘na tosa. “Ecco mi ha toccato il seno.” E poi e poi? “E sceso e mi ha toccato il bellico. “E poi e poi? ‘È sceso ancora fino all’elastico delle mutandine.” E poi e poi? “In quel momento è entrata mia mamma.” Quella …disgraziata!

Vialter pensarii che cont ‘sti fantasii se dorma pocch. No, no. Te vegn de dormì istess. Aiutaa dai giornad, dal cald che l’è minga cald e dal frecc che l’è minga frecc. Giusta temperadura per on’influenza supplementar, ona toss repentina, ona fever tipo 37 e trii che la te sbatt giò pussè che ona de 39, on raffreddor incipient, on das de fa tra nas e fazzolet, tra fazzolett e saccoccia, tra pinolett e sciropp. Te sentet? L’andante con brivio, pardon cont brio, l’è come ona musica, ona barcarola cantada dal Franco Visentin, le chansonnier de la rive gauche del Navili. Un due tre un due tre. Nina mia son barcheroolo son galante e sono gentiile/ sulla mia barca se vuoi se vuoi veniire/ anderemo a far, a far l’amor (2v). E dal momento che l’unich dass de fa l’è quell de cantà o de dormì mi foo la scelta. Dormi. Come disevi prima, de per tutt. Sul divano, su la poltrona, sul sgabell, sentà giò a la taola cont la testa in sul pugn poggiàa al ripian. “Va’ in lett” la te dis la miè. Obbedient te se levet su, ona corsa in bagn a cambià l’acqua e poeu in lett, sora la copertina. La miè la te lassa sdraiaà per el long, la mett sul distes on plaid comprà l’ann passaa a ona svendita e la tira giò i scur. Ecco, te podarisset abbandonass a Morfeo. No, no. Te derbet i oeuc, te ie spalanchet, te saltet giò dal lett, te vet foeura da la camera vosand “vorevi dormì. Minga andà in lett” E inscì te set reussi a vinc el sògn. Adess te dormet pu fin a la prossima rallentada de tension. Ecco, mi credi che el sognet el sia pussè potent del sògn e che el te fassa riposà verament. Dal sogn te se risvegliett tutt incassaa, rabbios. Te ghe l’heet con tutti fina al caffè. Chissà perché poeu. Par ch’el caffè sia la panacea, che te metta voeuja de fa’, che te slarga la ment, che te daga forza. Sarà vera? Me vegn in ment la storia di duu spilòrc, stemègn, taccagn, lèsna, pioeugg, spantegabotton che riessen mai a fass pagà on caffè dal compagn. On di se troeuven al bar. Se guarden interrogativ. Gh’hann paura a parlà. El primm che le fa’ l’è fregaa. Ad on certo ponto vun l’alza i brasc e cont la man spazza l’aria come per ciappà i mosch. L’alter le guarda incuriosii e poeu el dis “Cosa prendi?” “ Un caffè, grazie.” brivio.roberto@yahoo.it