El mond su on marciapè

Il primo quotidiano che parla in dialetto. Ogni settimana lo sguardo affilato in decenni di satira di Roberto Brivio illuminerà angoli della Grande Milano di oggi

Piazza Duomo

Piazza Duomo

Milano, 5 maggio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Milàn l’è on gran Milàn. El titol l’è al maschil, ma quand se parla de Milàn sembra de parlà al femminil. Metti l’accento in su la ‘a’ per minga confond el nomm con quel del Mìlan anca perchè , dato che sont on interista obiettiv, quest’ann l’è minga on gran Mìlan. E allora cosa scernissom: mas’c o femmina? Come la mettom? L’istanza dell’Umberto Faini l’è minga andada avanti, ma sont mi che gh’hoo avù minga temp de organizzalla. El concett? Come se dev scriv in milanes. Dibattito che me piasaria fa’ in on Teater cont dimostrazion dal viv e filmaa, perché anca Milan la gh’ha so’ part nella cinematografia. La dis ona canzon, musicada da on Puglies ch’el stava a Trezzan Esse Enne, conossù in Comun e foeura come Renato Sabatino, el second l’era el cognòmm, “Milan de nott te set ona gran città, per vun ch’el riva da on paes tanto lontan” (Brivio/Marelli/Sabatino ). E de dì? La se po’ no vedè, subissada dal traffic, da la gent che la va e la ven, dai canter avert, dai Ghisa che adess se cjamen Ausiliari del traffico e che te dann la multa con gioia selvaggia, nanca contenuda. Eppur gh’è on quaivun - la canzon “Gh’è anmò quaivunn ch’el gh’ha no la ses’cent e ch’el dorma per terra cont on mucc de gent” (Svampa-Cassano) la gh’entra come i verz a merenda, anca se de gent che la dorma in terra ghe n’è tanta, per necessitaa e per scelta - che de Milan el se fa’ portator de cine-immagin. Hoo vist on quaj so’ documentari allo spazio Oberdan, che quand seri fioeu se ciamava Cinema Giardini. Me ‘spias derbì i parentesi ma scriv on articol l’è come psicanalizzass. Te vett indrèe nel temp e te vegnen in ment rob che faseven part de la toa infanzia. Ricordi che la mia mamma, quand la podeva no comprà i bigliett per andà a ‘sto cine, che pur l’era popolar de terza vision, la diseva “Andemm al cinema Giardini tra le coltri e i cuscini”.

‘Detto’ detto da tucc quei che podeven no andagh. Inscì come per l’alter cine de seconda vision,dall’altra part del piazzal, diseven “ ‘ndemm al Diana sotta i covèrt de lana”. Ma tornemm al documentari. Regista, Organizzator, President de ona associazion ciamada Slow city, l’è l’Ing. Marco Pascucci. In trii ann l’ha bell’e che girà Milàn in squas tutti i bus, i giardinn, i cà, i monument, i document, i particolarità, i bruttèzz, i bellèzz. Perché la nostra città, disen i liber de la Meravigli, l’è bella. “checchè vun el disa”. Anzi, sul ‘disa’, mi e Roberto Marelli gh’emm scritt e poeu hoo registraa per l’Arca Canora organizzada dal Tullio Barbato e da Radio Meneghina, ona canzon che scrivi de seguit: “ Milàn se dis…” (Brivio/Marelli/ Sabatino) Voce: “Milàn disen l’è brutta/ gh’è nanca on monument/ canaij con l’acqua marscia/ e alber de cement/ el verd, el ross , el giald ma del metrò/ e i mmelanes che canten a gogò…” Napoletano: “Me piace ‘sta Milano/ che tiene ‘o core ‘n mano/ mannaggia la miseria i mmilanes!/ Non vedono il Cenacolo/ né Brera né il Castello/ non salgono sul Duomo ‘e ‘sta città!” Milanese: “ Te pias sta chi a Milan/ che ìnsubiss el grano/ te pias ‘sta chi con tutti i milanes/ te pias el cunt in Banca/ e suddifà i pretes/ tant gh’è i danèe sicur la fin del mes” Voce : “Milan e i so’ poetta/ Milan e i so’ cantant/ Milan e i giornalisti/ che disen nient e tant/ Milan gh’è propri tutt sui marciapè/ma per nettaj te troeuvet no i ruè!” Napoletano: “Quasimodo eMarotta/ Montale e pure Gotta/ han preso di Milano una gran cotta/ la Scala, Sant’Ambrogio/ ed il Monumentale/ Milano è veramente ecceziunale” Milanes: “ Sarà ma ‘sti scrittor/hann faa del gran folklor/la Borsa guarden tucc, ohi che dolor/col so’ la gent l’è in corsa/col frecc e cont el smog/ la scappa in ca’ e in di Bar a bev on Grog.” Refrain orchestra indi finalino tutti e tre “ Milan l’è on gran Milàn (2v) Milan gh’è de fidass fa’ minga ingann/ In fin di cunt Milan/ a tucc el streng la man/ indigeni immigrati e bej tosann/ indigeni ecc.

Beh, chi el gh’ha vist i proiezion el sta’ no a elogià la fotografia (che me par bona), el montagg (a volt cont poca fantasia), i parlaa (apprezzabil anca se brillen no de ironia, ma se tratta de on documentari patrocinaa da la zona I, dal Comun, e soratutt faa cont pocch danèe), ma stima i bellèzz del liberty presonnee di facciad, la magnificenza di giardin e insomma quella Milàn segrèta che tutti vorarissen cognoss e che grazie al Pascucci cognosserann. La soa organizzazion la se moeuv come ona saetta. Prima, i so’ filmaa, hinn andaa all’Oberdan, poeu al Centro de Cinematografia, e Domenega 5 Magg, ai vundes, all’Anteo, sala President, ingrèss liber. Hoo vist i link (me senti informatich!) che riguarden el Liberty, el premi per el Documentari pussè bell, i Giardin de Milàn: intrighen. L’è anca la data del “Ei fu…” del Manzon”, nassù a Milàn e da Milàn andà in gir per el mond. Hoo fa’ de tutt in la mia vita men che recità ‘sto poema a ona Milàn che la podaria commemorà ona quaj cossolina del Condottiero. Peccaa che sont foeura città se de no, prima di proiezion, proponevi al Pascucci, de recita’ insèma al pubblic “ Ei fu siccome immobile/dato il mortal sospiro / stette la spoglia immemore/ orba di tanto spiro / così, percossa, attonita/ la terra al Nunzio stà.”

è arrivato su WhatsApp

Per ricevere le notizie selezionate dalla redazione in modo semplice e sicuro