Bragadonn, alter che Hollywood

Milano, 3 maggio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Leggen Facebook e me scriven perché voeuren savè. A quei che ‘l fann sul me indirizzi de posta elettronica, quand l’argoment el se incontra cont on concett che interessa a tucc, ghe rispondi cont l’articol, chi inveci ne voeur fa ona discussion privada el troeuva la riposta ai so’ quesiti semper su Facebook. Domandi scusa, ma podi no occupamm di alter social tipo Instagramm, Linkedin, Tuitter, l’ Amazzom, El tegnom viv, Golden, Tric e trac e Va’ a da’ via el Nas. Bastaria no ona giornada e ona nottada per dagh a tra’ a tucc. Uei, la vita l’andava avanti anca senza questi novitaa. Capissi quej che passen el temp in Metro’ cont el telefonin avert e fann girà messagg e foto avanti e indrè cont el sorris de chi el se ricorda l’occasion che ha motivà ona foto, on messagg, ona notizia.

Anca quej che stann in pè senza ‘tacass ai sostegn laoren de prèssa cont el telefonin. Scriven i messagg cont ona velocità che fa’ impression. Se poeu capita ona frenada improvvisa perché el guidator l’ha vist on segnal, on ombra, on ratt, ona balena, on suicida, e el passegger el borla in terra, se fa’ mal, perd el so’ arness de gioeugh, gh’è subit in ball la causa legal. Basta che chi el gh’ha la responsabilità de tutti i personne trasportà el sia minga ciocch perché inveci de vedè quell che hoo descritt, el ved bottiglion de barbera. L’è success per la Freccia Rossa. N’hann parlà tutti i giornal, inutil tornagh sora. Hinn avveniment che te lassen cont el dubbio. L’alter dì al la stazion Forlanini riva el treno che va’ a Albairaa (col solit ritard de cinq minut, che poeu el diventa des e quindes) e i primm carrozz gh’aveven la porta serrada. Tutti i viaggiator in attesa hann dovu fa’ la corsetta per andà a metà treno e entrà da quej che aveven avert. Te vegn subit el dubbi de andà a vedè come l’è el conduttor, se l’è no come quell de la television. Se gh’è voeur a dì «È in arrivo in ritardo previsto…» torni sull’argoment. Previsto come? L’è giamò previst quand fann i orari e i e stampen? L’è ona prevision che gh’ha fa’ el mago Fox? O la maga Circe? L’è ona prevision dell’areonatica come quej del temp? L’altoparlant el dev dì «È in arrivo il treno suburbano, urbano, nazionale, internazionale, cont la freccia che sfreccia, o che la sfreccia no, in ritard, in anticip (mai!), sul binari tri anziché vott o viceversa, si avvertono i viaggiatori de sta’ a la larga da la striscia gialda, e anca che i primm carozz se derben no, hinn serrà su, e per quèst che se porten cont calma, che intanta semm in ritard, a metà de la banchina de arriv». Me lassi semper ciappà la man dal discors che se libera in de la ment e desmenteghi l’obiettiv principal. In tutt’i casi i viagg gh’entren de prepotenza. Doman hann leggiù sul me Facebook che foo on spettacol al teater de Binagh (Binago, Como), intitolaa Bragadonn. E m’hann domandà se le porti a Milan o come se fa’ per andà in quell Teater, cossa el voeur dì el titol, notizi sul rosc che canta. Donca, andemmm per ordin. L’hann passaa al Carlo Casalini, ex Cab, procurador de serad per tanti artist, e anca capp dell’agenzia che la se occupa de mi, el me propon de fa’ ona regia a duu grupp còral (Semm chi ch’inscì e Scusaritt) rispettivament de Laveno e de Binagh, e magari de cantà on quajcoss del me repertori milanes cont Grazia Maria Raimondi. Hoo accettaa e depoeu el solit schifos success (l’è on me moeud de dì) semm andà in gir per i dintorna e semmm rivà fin a Ciazz (Chiasso) che contrariament al nomm, me par de aveghel giamò dit, l’è ona cittadina calma tant che ai sett or de la sera gh’è in gir nissun. Se trattava quest’ ann de ripet l’esperiment cont on alter spettacol. Hoo pensaa a duu esplorator (Brivio/Raimondi) che capiten in on paes in doa i abitant se risveglien ogni cent’ann per cantà i canzon popolar e tramandaj e chi che voeur sentij. Ona roba del gener l’hann fada a la granda in Brigadoon, on film cont la Cyd Ciarisse, Van Jonsonn, Gene Kelly. Numm gh’emm pensà de fagh anca on po’ de umorismo e l’èmm ciamà Bragadonn, Braga i calzon e Donn che ormai se metten indoss i bragh da omm.

E da questa scusa, ona trentina de corist, in costumm original, canten canzon del repertori popolar: La ciappa la cadrega, Margheritin, La bella la va al fosso, la Ballada del Pittor (I Gufi), La ballati dilli mammi (I Gufi/Brivio) On risott de Operett, La Banda d’Affori, Martino e Marianna, L’Uccellino, E lee la va in Filanda, L’Omm de la verza (rep. Brivio/Raimondi), Susanna la va al ballo, Se l’ha mangià la sposa, la Messa, Mamma mia mi son stufa, Fa ninin popò. Gh’hinn anca Brivio, Raimondi e Ferrari a la fisa. De sorapù el coro el gh’ha on popri compless (do Fisa, ona chitarra, un direttor musical, Gianluigi Arioli , che el se moeuv cont el so’ strument taccà al stomich, e tri organizzator: Maurizio Nova, Ambrogina e Regina). Domandi scusa ai alter ma gh’è minga spazi per nominaj tucc. Insomma ona noeuva vision de la canzonetta che cantaven i noster avi e per avi comprendi i nonni e i nonni di nonni di nonni. Andà a Binagh da Milan? Facil. Se ciappa el treno che va a Malnaa, in Cadorna, da Malnaa al Teater gh’hinn quatter chilometri a pè. E per tornà indree se spetta el treno de la mattina ch’el te porta anmò in Cadorna. Preoccupaves no per el dormì. I poltronn del Teater hinn comod. Numm seguterem a cantà tutta nott. Sanguis, acqua mineral e canzon. Mèj d’inscì per passà on Sabet?! Forsi mèj de numm el passen quella coppia de giovin (85 ann) che se sèrren in camera da la mattina a la sera e come duu pivell invasaa fann l’amor. I parent se lamenten. Hann tirà foeura la sconvenienza, hann accusà la donna de demenza senile, lu de violenza sessuale, stalking e circonvenzion de intregh. Domà perché consumen do confezion de viagra a la giornada. Centdodes euro. Che gh’abbien paura per l’eredità’ o l’è invidia?