E mi sont chi che spetti

Milano, 3 marzo  2019 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Sembra minga cines? L’è per quell che el noeuv “O ci min” el sorrid quand el streng la man al Dònald. Par ch’el diga: “Se m’importa del nuclear. Te doo a trà, el metti in cantina. Tant, fra pocch tutt el mond el parlarà cines, la lengua che la soppianterà l’ingles. Guarda i cartej in gir. Hann invasà i mur, i passonad, i cesad.” Intervègni con gust “ Si, ma gh’han scritt sotta: «Maji». I milanes gh’hann minga paura di triad perché la mafia ghe l’hann in ca’ e la combatten come pocch”. “E i donn? Ai temp de la rivoluzion francesa andaven in gir cont la striscetta nera sul coll per via de la ghigliottina.” “ Adess faran a gara per fass fa’ i oeucc a mandorla al post di tatuagg.” “E valorizzeremm anca i tradizion. Quand girom per i strad cont el dragon long e snodà, l’è minga come portà in gir el biscion milanes? El Tarantasio? El dragh che l’è stà copà da on Sant a cavall in ona entrada del parch de Monza dopo che l’aveva spedì la soa Nessie in Inghilterra? Semm numm cines che tegnom alt el Carneval. Minga come el Comun de Milan che el se vergogna de duu personagg come Meneghin e Cecca, perchè second on quaivun inquinen. Per Milan la milanesità l’è ferma ai E1 ai E2 ai E3.” “ I acculturaa disen che el milanes l’è on linguagg incomprensibil.”

“Mi disi che per certi vers l’è visin al cines. Per esempi «se gh’hinn gh’hinn se gh’hinn no sciao» le disom anca numm ad Hanoi” E chi intervegni ancamò. “L’è Hanoi che l’è sbagliaa. El ver nomm sarìa Hanumm. Ma dato che el sembrava de nominà on Dio egizian avìi preferì tegnì Hanoi, che l’è on giamò sentì del secol passaa.” “Intant” el fa’ on alter interlocutor “ Gh’emm de fa’ on distinguo. Quell che te vedet in foto l’è minga on cines. L’è on nord corean pettenà come el Malgioglio” “ Cossa el cambia. L’è semper on oriental, no?” “Per mi hinn tutti istess. On poo come i svisad del jazz, o quei del rock.” “Ovhei, bestemma minga su ‘sti duu gener de musica sacra.” La discussion l’è diventada seria e compromettente. S’hinn formà cottaria de personne. Voeuri minga famm ciappà da i discussion. “Come se cjamava prima, quand gh’eren i frances? Indocina. Indo perché l’era visina all’India, Cina perché l’era la Cina, Cina, Cin.” “ Ecco… adess el fa anca Cin Cin, informes mei. Zero in geografia” Uei, la conversazion la dilaga. Entren tucc a parlà. E tucc a la ricerca de la battuda. Par de vess a on laboratori de Zelig. “Laboratori? Gh’hinn ancamò?” “Se i cabarettist noeuv voeuren laorà deven tegnii in pè.” “Certo che el Cabaret l’è andà giò, giò, nel lamber, giòo prem” canti “El Postiglion de Monza, el dis ch’el trotta pian, ghe mett trii or e mezza de Monza andà a Milan. Come per andà a Lion”. Emme Elle e semm giamò su la Tav. Puttost che dalla vinta pensen a on compromèss: falla piccola! “ E quest el sarìa cabaret?” “Se te troeuvet l’argoment giust, i battud, se te se impegnet cont la satira…l’è cabaret.” “Ma l’è anca se te parlet del Carneval” “Ma, su no. L’è ‘na festa soppiantada da Halloween. A Milan gh’è el Carnevalon” “Ma l’è la solita storia che ormai tucc a sann. Sant Ambroeus l’ha slongà el Carneval perché i milanes aveven combattù anca in di giornad del carneval roman in maschera” “Com’è? Combatteven in maschera ?” “Si! I mascher de combattiment!” “E poeu l’è minga sta’ San Carlo a slongà el Carneval?” “No, San Carlo l’ha proibì ai donn de montà sul palchscenich” “A proposit hoo leggiù che la posizion pussè noiosa l’è quella de vess sotta quand gh’è nissun de sora” “L’è ona battuda de avanspettacol.” “Però la me fa’ ridd.” “Che differenza gh’è tra Cabaret e Avanspettacol?” “Che l’Avanspettacolo le faseven prima de la proiezion cinematografica” “ E el Cabaret ?” “Adess el fann a tutti i or, speci in Parlament”. Anca lì sonen el Jezz?” “ Sì, Jazzen tucc quii che podarissen fa’ on quaicoss.” “Jezz, Jazz, perché la doppia pronuncia?” Perché gh’è la mania de sdoppià i nomm. Varda la fermada Gambàra diventada Gàmbara, Metrò diventaa Mètro” “Già, gh’è chi dis Colghèit inveci de Colgate.” “E Palmolaiv inveci de Palmolive?!”

Quel de la doppia pronuncia l’è on vizi tutt italian. Se dis Diabolìk, Diabòlik o Diàbolik? Asterìx o A’sterix? Mandrake o Mandreik? Dìlan Dog o Dailan Dog? Wagner o Wag’ner? Media o Midia? Recordemes che Mèdia l’è on vocabol latin, minga ingles.” “E per conclud Euro minga euri” . E fin che se tratta de paroll come questi pazienza. Hinn quej che gh’hann minga la doppia pronuncia che me preoccupen. “ Che tipo de paroll?” “El me amis Giorgio Zennaro n’ha fa’ on elencoche mi volti in milanes cont ona quaj integrazion: inquinament, violenza, crudeltà, ingiustizii, bolgir, gabol, sinister sul laorà, infiltrazion de la criminalità organizzada, discriminazion religiosa..., senza parlà di malann vecc e noeuv, de la disoccupazion, di aziend che saren su, di fioeu che nassen pocch e pu... “Ma va là! Te diset tutti ‘sti robb enciclopedich che hinn domà paroll. Te vedet no in di cartellon i foto de la famiglia reunida, sorridente, contenta perché l’ha gavù on prestit? Te sentet no i sospir de passion che gh’hann nonni, coniugi, fioeu, a la prospettiva de fass da’ danèe da ona banca, da ona finanziaria, da la posta, senza pagà interess per i primm trii mes? Danèe subit, per andà al mar, a fa’ ‘na crociera, a comprà ‘na macchina, la cusina, rinnovà i mobil, infilass in d’on mutuo, mett al mond on fioeu. Se parla no de laorà, de guadagnà, de risparmià, ma de fass imprestà. Che società fantastica! Che te illumina de immens! come el suggeriss l’Ungaretti. Ona vita facile. Anzi: facile.it