I padrun de la melunera

Milano, 19 febbraio  2019 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

La mia storia l’è quella de tanti, l’è quella de Milan, l’è quella de quej che han vorsù entrà in di me produzion, l’è quella de la gent che la faseva part del me ambient e che l’’ha comincià a laorà con mi nell’immediato dopo Gufi, l’è quella de la gent che l’ha frequentà el cabaret del Derby quand la vita di artist, di musicist, l’era proiettada vers el success, l’è quella de numm giovin che entravom a fa part de la progenie di attor e cantant, ingènov e pien de speranz, cont la voeja de rivà ma coscent che ghe sarìa vorsù del temp, tanto temp, tanto studio, tanta anticamera, tanto provà e de chi e de là, andagh a drè a la tradizion teatral che la te diseva de mettes cont i grand per diventà grand, de ciappà pescià in del sedes quand te sbagliavet e quand magari te spuntava foeura el crappin dall’ala e a quaivun el ghe dava fastidi. Hoo pensà a tutt quest, domenega, quand gh’èmm portà insema a Grazia Maria Raimondi el noster grand amis Giusepp Paganini, in arte Gerardo, a vedè “ Bohèmien e Scapigliati” al Teater de la Memoria. “Gh’èmm portaa” perché el giovinott l’è in quella che se ciama Casa di Riposo Redaelli a Vimodron giamò da on para de ann. La vera nomenclatura l’è “Istituto Geriatrico”. L’era pussè poetich “Ca’ de Ripos” perché el titol dava l’impression de vess frequentada da gent stracca che l’aveva abbandonà el mestee per dedicass ai feri desideraa da tanto temp.

Appena diventà attor fevom i spettacol per sostegnì quej che staven in la “Ca’ per Artisti de Bologna”, ona ca’ pocch ospedaliera in doa, passàa i ‘60 (allora eren verament ‘60, minga come adess che paren 40), i artist se ritiraven perchè la vita per lor l’era fada de viagg, de trasfèrte in ferrovia, de pension, de latterii in doa puccià el pan in del latt cald, de famiglii che ghe daven ospitalità, salvo i primm nomm che podeven permettes la pension de lusso o a volt anca l’hotel. Gh’era on teater in doa podeven esibiss se mai ghe fudess vegnuda la voeuja de recità ancamo’. In on film cont Ugo Tognazzi i scène in ‘sto teater gh’ann avù ona descrizion completta insema a la presunzion e la voeuja de vess consideraa anmò on quaivun. Disen che la vita de on attor l’è esclusiva. Ma se l’è stada fada cont passion, l’è come quella de on insegnant, de on maister, de on fantin, de ona massera, d’on offelee. Ciaschedun el gh’ha de ricordà e de rimpiang on quajcoss che per lu l’era essenzial. In Ca’ de Riposo tutti questi robb vegnen a galla. E se te ghet on quaivun che te scolta te podet sfogass, diversamente te divented introvers e chi te sta’ attorna el dis “ vive nel suo mondo”, senza savè che el so’ mondo l’è quest, che bastarìa sfogass, cuntà, tirà foeura la veggia passion per dimostrà che gh’è ancamo’ sangu in di ven. Ecco che quand porti Paganini, che el gh’ha la mia età, foeura di pettol e el vedi sorrid me sembra de aveghi fa’ toccà on tocchel de la vita che l’ha semper faa, viagg, teater per i scoll (l’ha recitaa tanto per i student), de palchscenich, de mostrass, de vess in su la breccia, de dà corp a personagg, i pussè divers che se poda immaginà. E quand podom minga andà a spass, a teater, a incontrà i collega, ghe cunti tutt quell che podi per fagh viv quella porzion che ancamò, pussè fortunà de lu, vivi mi.  Beh, serom lì a parla cont l’Aleardo Caliari, el Meneghin attual, me par, el proprietari del Teater, el programmator, attor, cantant, regista, l’omm semper giustament inrabiaa perché el gh’ha minga dal Comun e da la Cultura quel riconossiment in danèe ch’el dovariss avè, sia perché el ospita attor e cantant professionist, sia perché el mett in scèna cont ona compagnia “scola” commedi cultural senza da’ la preferenza al teater comich ma passand dal classich al legger con indifferenza e a volt bravura.

Disi a volt perché l’è dura senza sostegn finanziari e domà cont incass che anca s’hinn da esaurii basten mai per fa’ la paga, saldà el fitt e el mantegniment da squas trent’ann de quella che l’era ona veggia officina e che adess onora el cortil come teater, a pagà i allestiment che se anca pover gh’hinn semper, i proeuv, la pubblicità (quella, piccol o grand, la voeur tutt e certi volt anca pussee), i tass, i assicurazion, i anticip e ghe giontom el riscaldament o l’aria condizionada e la corrent elettrica. Per sentiss dì da ona quai solerte funzionaria del Comun “Fare il Teatro milanese è razzismo perché esclude tutti quelli che milanesi non sono” (sic). E ‘sta intelligentòna l’ha buttà in de cess Eduardo, Peppino e Titina De Filippo, Cesco Baseggio, Gilberto Govi, Piero Mazzarella, Ferravilla, Musco e on infinità de alter attor che voraria annotà ma ona pagina la bastaria no, che hann comincià cont el dialett, hann girà el stival, hann portà in gir la cultura di lor paes, hann parlà di usi e costmm de la lor gent. Ma la sciora se la va’ in Inghilterra, in Francia, in Germania e la se ferma pussè de ona settimana che lingua la comincia a parlà? E allora, per piasè che la zabetta minga come ona… pardon, s’eri a drè a dì portinara quand la portinara in confront a lee l’è ona gigantessa in cultura e in bonn manière. E che la tira minga a drè quej ch’hinn minga milanes, perché hinn propri lor che onoren Meneghin e Cecca (mi e la Raimondi gh’èmm faa i personagg per circa quattordes ann de fila), el milanes, la Madonnina. Me piasaria che l’andass a la Memoria quand gh’è Mirton Vajani.L’hoo incontrada in del fuaier intant che la mangiava la torta che la mamma de la Domitilla Colombo, ona di interpreti di Scapigliaa che la compiva i ann e l’ha mangiada insema all ‘Aleardo Caliari, a Corrado Bega, a Karin De Ponti, Alberto Grasso, Marta Bergantino, l’ha cùntà in vicendi de sta’ banda de scalmanà per la cultura e la letteratura cont l’accompagnamente de Paolo Beretta, on pianista de eccezion che el sona e fa’ spettacol cont on tappee musical da grand orchestra. La Mirtom, che el Marco Messeri in d’ona mia compagnia cjamava Stilton, l’è on personagg incomparabil. Recita, canta, sona, balla, l’è spiritosa, battutistica, calamborista, ironica, satirica… l’è come la pubblicità del Travaso, quella che ona volta la te colpiva in sui tram. Caustica e in certi moment commoventa. L’è ona donna da ciappà come esempi per la voeuja de viv, de piang e de ridd che la te da’. La dis che l’è a drè a disfass de la soa biblioteca perché la voeur ritirass a la casa Verdi in doa la spetten. Ghe devom cred? Mi me auguri per el Teater italian e milanes, de no. Capii, sciora saputòna del Comun de Milan? Noo, l’è minga del Comun. La sarà ona precaria. Cossa ne sa’ lee di milanes?! brivio.roberto@yahoo.it