Lecit domandàa, cortesia respond

Milano, 3 febbraio  2019 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Mi capissi no la Rai Tv con qual meter la giudica i so’ dipendent specialmente quand hinn bravi. Pussè se sbrighen de per lor, pussè diventen espert, pussè i e lontana o i e ten in friser, forsi con l’idea de sparaj ai spettador cont el solito ritual de paroll “ L’ho tegnù/da in conserva come el Cirio, ma al moment bon l’ho tirà/da foeura.” E quand el dura sto moment? Ona trasmission e poeu ancamò in riserva come ona bottilia de vin. La tegnen lì per ona grande occasion. E quand la salta foeura per la RaiTv la grande occasion? Quand quaivun la crea, la progetta, la presenta e se la politica o i amis se metten in moto, la fan realizzà. E “che la vaga ben” se il destin el fa sì che l’affiden all’inventor, o “che la vaga mal”, quand l’affiden ad alter, che gh’entren nient però hinn nel gir. Ma l’è inscì difficil entrà nel gir? Par de sì. I vecc dirigent sembra che se interessen intant che dann i ultim colp de zappa a l’ortisell, ma tutt finiss nel sorris faa a fustèlla. I giovin poggiaa a la politica cerchen de andà avanti. Hoo affermaa che hinn minga bravi? Noo. Hinn bravissimi ma l’è tal anca quaivun dei desmentegaa. “Presenta on progett” disen “che el poda ciappà denter chi te interessa tirà foeura dal letargo” Semper pussè difficil.

Ona volta on no l’era no, on si l’era sì. Adess gh’è la via de mezz, el ni che te ten in sospes. A volt te disen nanca ni. Quand te se presentet te guarden, salten in pè come se i avess besiaa ona tarantola, te fan festa, salamelecch su salamelecch, a la fin del colloquio te compagnen a la porta col sorris a 32 molar e poeu se fan pù trovà. Disen i agent che se dev romp i ball, continuamente. Ona volta te entravet in di offizi cont ona certa libertà. Ma l’è el cas de dì che hinn pù i offizi de ‘na volta. I donn al portierato la metten giò dura da fatt sentì on pivell, telefonen, te disen de spettà, te fan entrà in ona sala che la pubblicizza le Tecke, te spettet anca des, quindes minutt e poeu te compagnen all’offizi e hinn bon de sta’ foeura a spettat. Parli minga per mi che sont consideraa ona icona, a paroll, ma in general, e in particolar de quej che la fortuna i ha minga basà in su la front ma che gh’hann ona competenza da fa’ paura per quell ch’hann faa in teater, in radio, in tv, in politica, in del giornalismo. Parli anca per Maria Brivio. L’è entrada a la Rai depoeu avè fa’ on cors de dizion a Firenze e l’hann scritturada come annunziatrice annunziadora, per andagh adree a l’onda) al Gazzettino Padano (la sigla la dev vess ancamò la soa), poeu l’è passada a fa’ la Domenica Sportiva ad annonzià i risultà a la fin de la Domenega, che ona volta l’era l’unica giornada per i partii de calcio. Poeu l’hann passada a fa’ i annunci al terz canal TV, e poeu ancamò al second e certi volt al primm. Poeu i annunci i han passàaa a Roma e l’han tegnuda in frigor per squas vott ann senza fa’ nient. Mi ghe disevi “fa la causa, te perdet l’immagin” macchè, lee, fedel a la Rairadiotelevisioneitaliana, l’ha spettà la pension. Adess la cjamen pù. Nanca quand fann i rievocazion. E gh’è nient de pesg che vess ignoraa. Pubblichen foto, cjamen la vegia guardia in trasmission de servizi, ona quaivuna che, pussè fortunanda, l’ha laorà, in di programm de grande audience, la tratten come ona regina ma lee nanca ona apparizion. Sont minga chi a fa’ el paladino per ona donna che la sa difendess de per lee. Ma la giustizia m’inponn de perorà ona causa anca se l’è giamò perduda in partenza.

E come lee la Maria Grazia Picchetti. Ne parla nissun. Ona sera, quand gestivi i teater de Villa Clerici, per ona scoreggetta col Filippo Crivelli (el voreva robb che podevi no daghi) hoo dovù cancellà da la programmazion “Milanin Milanon” e hoo fa’ al so’ post “Milanon Milanasc” domà con Grazia Maria Raimondi. Nanca el pianista. El piano l’hoo sonà mi sui basej del teater piscinin (1500 post, palch scenich 30x 12). In prima fila gh’eren la Brivio e la Picchetti. I hoo ciamaa. Hann improvvisà per on quart d’ora. On success travolgent. Adess la Maria Brivio l’ha inventà on programma per ona radio privada, cont on tecnich a l’altezza de la situazion e on direttor che el capiss, ma el gh’ha no danèe a disposizion. Se tratta de la Divina Commedia del Dante Alighieri cont i comment, i leggiud e la colonna sonora, tutt, de la Brivio. El dì de la trasmission la va’ in offizi ai sett e mezza e ai des l’è giamò pronta per andà in onda. Ovhei, l’ha tirà su el livell intellettual de la radio. Tanti ghe scriven che l’è brava. Alter suggerissen “Mandìì la trasmission al terz canal radiorai, se la ciappen no hinn propri pirla”. E mi che gh’hoo paura de nient la mandaroo.

Depoeu 35 ann pssaa in di studi radioTv, la tosa, se fa’ per dì, la sa el so’ mestee. Intant pubblichi sto’ articol perchè la question l’è universal. Risponden pu. Nanca el Papa o on so segretari l’ha faa per ona presentazion del programma a Radio Vaticana. Chissà quanti come lee hinn desmentegaa da la generazion dirigenzial appèna installada e cont la voeuja de fa’ audience domà cont la fuffa o cont i “solit”. L’articol el leggen, propri perché l’è in milanes. Anzi, de tant in tant, presentaroo quej che me scriven e se lamenten de la stessa nequizia: vess ignoraa. Domà la mort l’è pesg. Ma se parlen minga de ti, prima, figuremes depoeu. L’è per quell che mi voeuri al me seguit on “codazzo di Tram”: Quando Sarò, Brivio/Albertarelli ediz.la voce del Padrone. Quel dì, cont la città bloccada dal me codazzo (almen 100 in fila) ghe sarà on casin che i laor per la MM4 (blu) e quej de “la riapertura dei navigli”, se la farann, passarann come interruzion de dilettant. brivio.roberto@yahoo.it