L’è roba da chansonniers

Milano, 29 gennaio 2019 -

Con questo racconto Roberto Brivio, il Cantamacabro dei Gufi, chitarra, fisarmonica e voce del mitico gruppo dialettal-cabarettistico che animava la Milano degli anni ’60, inizia una collaborazione col Giorno. Ogni settimana il suo sguardo affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

On dì nel lontan 2012 (domiladodes) decidi de mettem in pista per attivà duu teater estiv in quell de Niguarda. Se trattava di teater de Villa Clerici, ona chicca architettonica che la vareva la pena de vess ciappada in considerazion. Tra i promotor gh’era Aldo Colonnello, fradel dell’attor doppiador Antonio che l’aveva lavorà in ona quaj produzion radiorai scritta e diretta da Roberto Brivio. De so’ el gh’aveva la conoscenza de mila attor, la voeuja de tirass foeura come el fradell scompars e quella de onorà la donna de la qual l’era el so’ mentore: Alda Merini. L’hoo presentà anca al me editor de allora, el patron de la Meravigli che insema a Elena Lanterio l’ha pubblicaa cent e passa liber su Milan. In on primm temp l’ha nanca considerà el so liber, poeu, leggiù attentamente, e vist che l’era scritt ben, che la Merini l’attirava ancamò on bordell de pubblic, l’ha pubblicaa. Ancamò adess, a distanza de circa quatter ann el liber se vend ben grazie all’Aldo che el se dà de fa’ cont spettacol, presentazion, in post anca lontan da Milàn, e soratutt a la Merini, ciamadaa nel titol “La poetessa di Navili”.

Nel primm ann de attività hoo tra’ in pe’ on concors de poesia cont la partecipazione de ona vintena de poètta. Particolar curios: m’aveven contestà i 15 euro de iscrizion col dì che in nissuna gara gh’era de pagà per entragh. Fals. Ricevi almen cinq band al mes e tutti imponen ona cifra che la va dai 20 ai 30 euro per partecipazion a ciaschedun de i capitol che fan part de la gara. Se capiss. Per sostegnì i spes, el cost de la giuria, el fitt de la sala per la premiazion e el relativ spettacol final. Ma mi e i me soci (Aldo Colonnello e Angelo Favro) serom trii pirla condizionaa dall’inesperienza nel campo. Però gh’èmm ciamà a fa el President de la giuria Maurizio Cucchi, poètta, giornalista, scrittor e personagg important in la letteratura, e con lù se semm riscattaa. El scriv su Il Giorno. El parla de Milan a piè pagina cont la descrizion di loeugh ch’el voeur fa’ conoss ai lettor. Da giudes l’era particolarment sever. N’ha scartà tanti de poètta improvvisaa! Ma quii ch’hinn stà ammis eren sicur che on quaicoss de quell ch’avéven scritt el vareva. Mi gh’avevi inventà on spettacol in doa i poetta leggeven i poesii assistii da on istruttor. Incoeu se dis coach: on attor che el saveva come fa a leggii come la Maria Brivio già annunziadriz Rai-Tv. Gh’è ‘na regola importanta: tegnì i scansion final e se gh’è minga on punto sostegni’ la vòs, senza conclud, fa’ ona leggera pausa e taccà a legg ancamò su la stessa frequenza tegnuda a la fin del vers. Se sbaglia mai. Ma el poetta generalment el farfoja, el mangia i paroll, l’è semper cont la vòs in calo, se fa no sentì intanta che el cred de vess maester in la dizion domà perché la poesia l’ha scritta lu.

A quel temp el Piero l’era ammò viv. Parli del Mazzarella, l’attor che l’ha da’ a Milàn con generosità la soa bravura, tant de vess considerà tra i Grand. El riposa in ona cassetta al Monumental, in mezz a altri attor, ma el Comun l’ha minga scritt nel Famedio, che mi sappia. Chissà perché?! L’è vun che l’ha raccolt la personalità e la fama del Ferravilla! Misteri di amministrazion. El vedevi on dì si e on dì no. Scrivevom on liber che l’è restaa in ona raccolta de scritt mai finii. Titol: Un Gufo alla corte del Tecoppa. El Maurizio inveci depoeu ona riunion a trii in ona offelleria de piazza Udine, l’ha comincià a scriv per el duo Brivio/Mazzarella. La doveva vess ona noeuva ditta teatral cont la partecipazion de Grazia Maria Raimondi che a detta del Maester l’era on’attrice che la ciappava el public al so’ comparì in scena. Per scarògna la storia l’è finida mal. La scomparsa del grand attor l’ha bloccà tusscoss.

Resta el copion che el Cucchi l’aveva comincià a scriv. “Sono un uomo tranquillo…ma certe volte mi prendono dei mezzi furori. On futtun de l’ostia. Sono milanese, io, un vero milanese…. Ho scelto Milano. L’ho scelta io, quando c’era ancora la nebbia. Anzi, la scighera, che è quella più pastosa, di terra, che viene su dal basso. Mentre la nèbbia, viene dall’alto. …” titol: La collera dei buoni. Prima part confidenz de on barbon. Seconda part, considerazion de on borghes. Prima part lù, seconda part mi. On bel duo. E gh’è on alter duo che el 31 Gennar, a la Galleria Previtali in via Lombardini quattordes (14) el se sottopònn a on intervista che el medemm Maurizio Cucchi el farà. I duu a hinn Brivio e Beruschi, che el volantin pubblicitari indica come chansonniers. L’è vera che mi canti anmò i me canzon e che Beruschi el fa’ l’ospite de chi e de là e i regii de Opera, là, pussè che chi, ma cjamann chansonnier l’è esageraa. Nissun di duu el sona la chitarra. Insema cantom no. Però recitom. E da tanti ann. Brivio a Giugn del 2019 el fa i so’ sessant’ann de teater. Beruschi des, quindes, ann de men. Tutta roba che vegnarà foeura in l’intervista del 31 ai desdott e trenta (18.30). Ghe sarà anca de ridd? Beh, “comic” tucc e duu, po’ vess che ona quaj ridada la scappa. Anzi, squas squas, disi al Brivio de telefonà all’Enrico per mettess d’accord e daa al pubblic quell che el se spetta, vist i duu nomm. El programma el fa part de on progett ch’el contempla ona vintena de intervist del Cucchi a personagg important de la Milan passada e futura. “Dialoghi di Milano”. On calendari da fa’ invidia a tucc: gallerii, teater, circol, librerii, operator de cultura.

Vn de questi l’è Lorenzo Valentino, ch’el se dà on de fa’ rar, per tegni i cordon del temp liber e de la cultura in galleria Previtali. La sorella della sciora Previtali l’è stada ona mia allieva quand insegnavi in di cors de formazion professional istituì da la Region Lombardia per cunt de el Fondo Sociale Europeo. In cinq ann hoo licenziaa squas centvint (120) alliev tra donn e omen: attor, macchinist, scenotecnici, elettrofonici, organizzator, artist de strada. Hann imparà tutt quell che podevi insegnagh. L’ordin, la disciplina, la passion per el teater, la capacità de sviluppà on laor, el sistema de collaborazion, la voeuja de calcà el palchscenich, la bravura, vess semper in bola specialment in di periodi de magra che in ‘sto mestee paren nass con facilità. Inscì chi voeur partecipà ai “menad” de duu che vorarissen stà tra i quinti 120 ann, ch’el prenota. Intervistador e moderator Maurizio Cucchi. Ingresso libero. Liber de cos’è? De entrà, settas giò, scoltà, batt i man, ridd e piang. brivio.roberto@yahoo.it