La verità de chi mena el gess

Milano, 6 gennaio 2019 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Ona volta quand te disevet Leva cont la maiuscola te intendevet el periodo de temp dedicaa al militar. Adess che a militar ghe vann domà i volontari i significaa a hinn divers. Leva, dal verbo levare. Levess via de chi e va de là, levess su, leva (nel senso de tira) via quij man di garòn(cosce) e le “nuove leve”, per dì (ovvero) i personagg che comparissen in di Gossip, che quanto a man se accorgen dopo des, vint, trent’ann de aveghi avu’ in sul corp. E gh’è semper ona lor affermazion che la serviss per fa’ i titol. La Giulia de Lellis, per esempi, la dis de vess “ona donna fortunada, Voi?” A mi, voi, el par on sfottò. Stefano Martino “clamoroso” el seguta a mettes in mostra cont la Belen Rodriguez. Ed ecco la dichiarazion che spettavom cont ansia. “Tornà insema? Sì, gh’hoo pensaa, cara Belen. Sont felis con ti e Santiago”. On amor discrètt, pien de desideri, de voeja de familia. E tutt perché? Perché Belen la salta no addoss a Stefano. Le dis anca la Valeria Marini “Donne siate meno aggressive con gli uomini”. Infatti lee, a dispètt de (malgrado) l’età, la salta addoss a nissun. L’è lì in trepida attesa cont i do’ tett al vento, on vestii cont el spacch abbondant e la scolladura che la riva fin a l’osso sacro. La scolladura senal (al seno) l’è straabbondanta anca in la Francesca Cipriani che la pensa continuament al Walter Nudo. Nudo cont la “N” maiuscola l’è on cognòmm, cont la minuscola l’è come la mamma l’ha faa. Qual di duu? Domanda che la s’è sarà pònnuda anca l’Asia Argento. “On ann terribill”, al ponto che l’è finida cont el Corona pien de tattuagg e de donn. On alter sincer l’è Salmo Shock: ecco “la mia verità”, el dis. “Lascio la musica e mi metto a studiare.” L’ha savù che l’è l’ann de Leonardo da Vinci e el voeur passall cont i oeucc in su i liber. Per podè sta’ al pass. Intant da la soa bocca ona affermazion, come disen adess, virale. La volti in milanes: “ per avè success, te devet minga sta’ in del mezz. Te devet vess verament bravo (questa la saveva anca quell ch’el mena el gess) o fa’ schivi (questa l’è noeuva). Vun de quej che passen per bravi cont la soa vòs nel nas l’è el Ramazzotti che el pensa de desmett cont la musica. L’andarà a cercà la soa verità in alter sit. Quej del computer? Verità!

Parola consumada. Esempi per el Chiambretti cont i so’ verità su la TV che per lù la gh’ha no i dent. La manda foeura domà roba rimasticada, el palinsest l’è lottizzaa e se fann on quaj cambiament l’è semper al ribass perché l’obiettiv l’è quel de vend de tutt, anca i saonett(sic). A la sciora Cesira ghe frega nient. L’è a drè a passà on moment disperà e cont el batticoeur: “la Malena la riess minga a trovà l’amor per colpa del laor”. Per forza, la fa’ la pornostar! Anca l’omm men gelos del mond quand ved la soa donna pastrugnada e che la pastrugna, i oeucc i e sara inveci de faj balà. Quand se troeuva poeu in intimità duu a hinn i cas: o el se eccita o el se incassa. Per evità de incassass i omen eviten de corteggialla e lee la piang.

Lassà el mestee? L’è come dì a Pamela Camassa de lassà perd el Bisciglia depoeu des ann de union. La Show girl, soubrette, attrice e modella che i didascalii di settimanal disen vess proprietaria de on coeur ( l’Esatri le sa?), la pensa a chi el sta’ mal, al bullismo, a la violenza. L’afferma «Lotto per un mondo migliore». Anca numm scombattom. Senza dill. Tucc i dì. Da quand che levom su dal lett a quand ‘ndemm a dormì. E che battalii. Se comincia col lavass i dent, per finì ai pè. La pulizia l’è la prima roba de portà in gir come ona bandera. E poeu cercà de minga sporcà la città, el paes, el prà, la terra, la ca’. Trattà la ruera come se dev. Vess educaa cont el cosiddetto prossimo che l’è minga el Bus che l’è drè a rivà: “Avete perso l’autobus, aspettate il prossimo e amatelo come voi stessi”. L’è tutt lì. Se te amet el prossimo t’è risòlt ogni problema. Te podet anca contrastall, tegnì testa ai so’ idei se i to’ hinn minga quej, ma cont rispètt. El mondo migliore el comincia da lì, dal rispètt, vers la natura, vers i omen, i donn, i lacciott (bambini), i creadur in gener. L’è on concett universal ch’el comprend anca el laor da part de chi le dà e da part de chi le fa, donca(quindi) i danèe e da lor tutt quell che ne deriva, da la fam, all’ingordigia, ai guerr. Se hoo desmentegà on quaicoss domandi scusa. Basta integrall. El principi l’è semper quell. «Ma chi te sett ti che te conciònett (paròla girada che se troeva no nel Cherubini )?» Vun che el cerca de combatt per migliorass cont la speranza de andà mej su tutti i front. E che “irride” se voerom integrà la lengua cont quella de Romeo e Giulietta, ai tronist, ommen e donn, a chi dis de vorè on fioeu per poeu lassal senza guida, a chi el se gonfia i pettoral perchè el gh’ha el “potere”, a chi el seguta a cambià partner perché el fa’ notizia, a chi el va’ in paranoia perché parlen pu de lù, a chi el dà a trà (dà retta) ai sòcial, ai spavaldi che ona volta se cjamaven bauscia, a chi se “profila” su Instagram e alter foineer(tagliole), a chi i didascalii disen che l’è umil quand l’umiltà le sa no in doa la sta’ de ca’. insomma, la visibilità l’è come la merce de on supermercaa, pussè te ghe n’heet pussè te ne vorarisset, al pari de quella in esposizion che te par de podè fann minga a men. Se ghe giontom on tocchelin de Carità, l’è fada. brivio.roberto@yahoo.