La bona azion de on interista

Milano, 9 dicembre 2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

So no come se dis sangh in cines ma l’è el caso de dill. Quand sont andà a girà a la Pinetina, canal dell’Inter , el format de quell che sarà d’incoeu in avanti el me’ motto “L’Interista incassaa” (incazzato), hoo vist insegn in cines. Gh’è anca el progett de cambià i tecc dell’intèr casament a forma de pagòda. L’interist incassaa l’è minga domà on tifos de squadra ma el sportiv in general ch’el spera de vinc ma che l’è anca comprensiv vers i alter che perden o che vincen importa no, basta che abbandonen la maleducazion, l’intemperanza, i parol che serven a nient visto come stann i robb (l’è inutil fa’ on alber de Nadal cont ona fassa che ghe gira intorna e la scritta Juve m…a, quand la seguta a vinc: L’è mej scriv che “God me la mandi good” e sperà che ona quaj volta e anca semper, la perda). Foo on interista che el se incassa cont tucc e daroo ona dimostrazion in on articol che speri el sia leggiù cont i “visualzzazion”, se dis inscì, del SantAmbroeus Social (a incoeu circa 300.000). Ma voeuri minga trattà ‘sto argoment.

Parlaroo del sangh o sangu. Quel che dovarissen spuà i calciador vist i danè che ciappen per giugà mal, quel che spuen i professor d’orchestra quand sonen classica, moderna o Jazz, quel che spuen i metteur en scene (allestitori) de on qualsiasi spettacol, i lavorador che olter al viagg semper in ritard per colpa di ferrovij (che se scusen col dì “ritardo previsto” al pòst de “ ritardo imprevisto”. Perché se l’è “previst” tutti i dì e ghe metten minga ona pezza i ferrovii hinn disfattista, fanigotton, menefreghista. Se inveci l’è “imprevist” se podeva minga calcolal e la scusa l’è bell’e pronta. El sangh infina che se domanda a la gent per fa’ i trasfusion e salvà altra gent (el to’ prossimo) che gh’è ‘n’ha bisogn. Ghe n'è de raccoglitor  de sangu che organizzen giornad de propaganda per la raccolta. E gh’hinn anca quej che se adoperen laorand dai sett or de la mattina ai quattordes (quattordici) del dopodisnà, con tanti ann de volontariato ai spall, per pensà a on quaicoss ch’el verticalizza (termine robà al calcio) questa grand azion parallelament a quella del Telethon e de la raccolta euro attravers el numer televisiv ch’ el cambia a segonda de la destinazion di danè cattà su.

Hoo giamò parlà de lu ma l’è mai finida perchè la soa attività cominciada all’Istituto dei Tumori, adess l’è President di donator all’Ospedal Sacco che come tutti sann el comprend trii nosocomi e magara anca de pu: Fatebenefratelli, Macedonio Melloni, di fioeu in via Castelvetro e me par che ghe sia denter anca el Pio Hotel Trivulzio. Avarii giamò capii che l’è lu: Renato dal Compare. El cognuss tucc i artisti de Milan che se offenden se j e ciama minga. “Note per i donatori” l’ha inventada l’ann passaa. Ghe s’erom anca mi e la Raimondi. La manda avanti quest’ann e el prossim, fintanta che la sarà minga Istituzionalizzada. Me sembra abbastanza piena de artist de primissim pian. Dovevi parlà anca del Premio D’Anzi ch’emm faa saber sera. Ne parlaroo Martedì. Disi domà ona roba: Tony Martucci, magrado i so’ 92, l’è semper grand e grand l’Hotel Hilton Garden Inn che l’ha ospitaa in la Sala Reale, anca se dovaress vess ona incombenza del Comun, sord a la milanesità. Nanca Attila l’era inscì. brivio.roberto@yahoo.it