Da la dottora di ca’ popolar a incoeu

Il primo quotidiano che parla in dialetto. Ogni settimana lo sguardo affilato in decenni di satira di Roberto Brivio illuminerà angoli della Grande Milano di oggi

Una corsia ospedaliera in una delle crociere alla fine del 1800 alla Ca’ Granda

Una corsia ospedaliera in una delle crociere alla fine del 1800 alla Ca’ Granda

Milano, 9 ottobre 2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Milàn di camapnil, di dottor in medesina, di dottor in chirurgia, di ospedal, Milàn rotonda. Bonvesin de la riva el diseva che la struttùra urbanistica a moeud de cerchi l’è el segn de la soa perfezion, la lassa intravedè l’organizzazion “caritativa-assistenziale” ciamada incoeu “socio sanitaria”. El sosteneva anca che la populazion del Basso Medioevo la podeva rivà da cent a dusentmila, visto che la città l’era strutturada per fa’ mangià tucc. Semm al tresent circa. La sanità l’era veduda come assistenza ai pover e come “Arte di cura delle malattie” esercitada da medegh e cerusigh. Sont a drè a legge el liber “Salute e Medicina a Milano – sette secoli all’avanguardia” de Giorgio Cosmacini, filosofo e medico. L’hoo domandà all’editor attravers Carlo Tognoli, el me car sindich de Milan, che conossi fin da quand cont lu a la massima carica del Comun hoo inaugurà Vacanze a Milano insema a Liliana Feldmann e Evelina Sironi al Teatro Burri del parch. S’eri interessaa a la storia ospedaliera de ‘sta città straordinaria che pussè voo avanti a studialla pussè me innamori de lee e l’occasion la m’è vegnuda incontra nel legg in la posta elettronica, la e-mail, l’invid a la presentazion in sala Brigida de palazzo Marino, el 9 Ottober ai desdott. Che bravi, però, a intitolà ona sala de conferenz ricavada dall’appartament del mitico custode Brigida. Per quattordes ann hoo fa el Meneghin con Grazia Maria Raimondi, Cecca. Per quattordes ann gh’èmm varcà la soglia de Palazzo Marino, ricevù dal Brigida cont tutti i onor. Compagnava tucc e duu, impaludaa cont i costum tradizional, in la sala dell’Alessi, famosa per la soa artisticità, e lì spettavom el Sindich insema a tanti scolar cont i lor maester. Prima Tognoli, poeu Pillitteri, poeu Borghini , poeu Formentini, fina a el primm ann, credi, de Albertini.

El liber l’è ona meraviglia. El te fa entrà in ona Milan sconossuda e conossuda nel stess temp. Sconossuda perché fin dall’Introduzion el te parla de la Milan Ospedaliera, de la Ca’ Granda (ospedal Maggior che ona volta l’aveva sede in doa adess gh’è l’Università e speremm che la resta semper lì. Gh’hinn in gir vos su la volontà de portalla in località Expo, ma se po’ no slontanà inscì ‘na Istituzion per occupà spazi che finissen per diventà commercial) de l’assistenza “dalla cuna all’urna”, dalla nascita fina a la mort, del model de sanità per l’Italia intera. Conossuda perché man man che te se addentret in la lettura te riconossed loeugh, moviment, fa’ e disfà, d’ona Milan che l’è stada e che l’è quella della toa vita. Anca la mia: 60 ann de attività artistica, vott teater avert, la formazion d’on rosc (gruppo) storich ( I Gufi), la conoscenza de tutti i politich su la scèna per squas 40 ann (dal 1960 al 2000). E, attenti, l’è minga on volumm de nicchia, come se dis incoeu, o per addetti ai lavori. L’è on romanz ch’el toca anca la politica di temp, che l’incontra personagg dai nomm usaa de spess senza savè quell ch’hinn staa, cosa hann faa (Edoardo Bonardi, Giovanni Allevi, Luigi Carozzi, Luigi Verratti, Paolo Pini, Anna Kulisciov, la dottora di ca’ popolar. La storia la dis che ogni soa visita l’era spettada come ona benedizion.

E ancamò Mangiagalli, Golgi - premio Nobel del 1906 -, Edoardo Gemelli, diventà depoeu padre Agostino dell’Ordine dei Minori, malgrado el se disess Ateo e anticattolico). L’è ona kermesse come la Storia di Teater milanes del Pozzi e Manzella. Se parla minga domà di Teater, ma de quand i hann faa, del periodo social, del perché. Inscì per i ospedal. Gh’è de mezz la guerra, i epidemii, la lotta a la tubercolosi. Ricordi nel 1953, quand la sembrava combattuda e vinciuda, s’eri andà a l’ospedal per ona polmonite, ripetuda nel 1959, che se firmava ona carta cont la cròs de Sant’Andrea, come impegn, caso mai la saltass foeura, a curass e a fass curà. In del ’60, diplomà in recitazion, avevi comincià la carriera cont i spettacol de beneficenza in di ospedal. A quel de Vialba, che adess l’è el Sacco, n’hoo fa’ vun che ricordi anmò. Gh’avevi paura del contagg. Gh’eren i palazzin cont i terrazz in doa la mattina metteven foeura i malaa a ciappà el sol e a respirà l’aria fresca (adess se respira smog e alter porcherii). Roba da Sondalo.

E de pagina in pagin, da Greppi a Ferrari, da la riforma dell’ordinament sanitari in progett, al Policlinico, all’Istituto Nazionale dei Tumori, dal Comun riformista (Cassinis/BucalossiAniasi/Tognoli) se riva a la descrizion di ultim ospedal: Monzino, Humanitas, Auxologico, Galeazzi, San Raffaele e quell fondà dal Veronesi. El romanzo-verità conclud cont ona postilla che a on certo ponto la dis “In questa grande Milano, che da monocentrica intorno al suo Duomo, al suo Castello e al suo Ospedale Maggiore tende a diventare policentrica, altre istituzioni e opere avrebbero meritato menzione. Se questa è mancata, l’autore si scusa accampando, con le esigenze redazionali, le personali lacune”. L’istess disi anca mi per quest’articol. Mi so no se i personagg nominaa hinn religios, ma so domà che per mi gh’hann diritto a stà visin ai grand de la medesina, a Ippocrate cont el so’ giurament, a Avicenna, a Galeno, a Averois. Dante nel quart canto de la Divina Commedia i e mett nel Limbo in doa stann squas tutti compres Socrate. Da lì entreran nel Paradis in doa i Medegh, i Filosofi, i Psicologi gh’hann pien diritto de viv come contrapass per la gent che hann salvaa, istruii e medegà. brivio.roberto@yahoo.it

è arrivato su WhatsApp

Per ricevere le notizie selezionate dalla redazione in modo semplice e sicuro