Incoeu l’è el di’ del Svampa

Il primo quotidiano che parla in dialetto. Ogni settimana lo sguardo affilato in decenni di satira di Roberto Brivio illuminerà angoli della Grande Milano di oggi

Nanni Svampa

Nanni Svampa

Milano, 26 agosto  2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

L’è el dì de la toa commemorazion e per quest te scrivi. Hoo telefonà a Dina, toa miee, per domandagh se la voreva fa’ on quaicoss in memoria propri el dì de la toa scomparsa. L’ha pensà on poo e poeu l’ha dit: “No. Voglio che per un po’ di tempo ci sia silenzio su Nanni.”Hoo capìi e hoo minga insistì. Cèrt che a chi voeur commemoral cantand ona toa canzon, anca se hinn tanti, podom no mett el veto. Sarìa come toeu quella libertà che te piaseva inscì tanto. Me senti fin in colpa. In “Non spingete scappiamo anche noi” gh’èla canzon intitolada “Viva lalibertà”, de Lunari/Patruno. Te la podevet cantà ti, inveci l’hoo cantada mi. Per forza! Te gh’avevet el contratt singol cont la Durium e te voeurevet no fass multà per avè cantà come solista cont la Emi, la ca’ discografica de I Gufi. Se fudess sta’ domà per el spettacol in teater te podevet anca dagh denter, ma la canzon la doveva andà su i disck, che adess ciamen vinile, e allora el se sarìa verificaa on conflitto di interessi che se per i politich cunta come el do de picche, per ona ca’ discografica che la voeur ona vos in esclusiva l’è ona robba da causa legal, de penal cara da pagà.

Del rest, fin da la prima reunion per incid disck, la storia l’è stada missa in cjar. Mi s’eri avvantagiaa perché gh’avevi el contratt come Roberto Brivio (nomm d’art Roberto BI) cont la Voce del Padrone, sotta l’etichetta Columbia, che in seguit la se cjamarà Emi. Eren vegnù foeura on para de 45 giri: “Quando sarò” e “Vorrei tanto”. Sonaven anca in di Juke Box. E poeu on extended (quatter canzon) cont i primm do e “Scheletri” insema a “Va Longobardo”. Uei la gent in di bar la sonava ‘stultima per el ritornell che el diseva “Bevi Rosmunda bevi nel cranio vuoto del tuo papà, non esitare siocca ti mostro io come si fa”…”se te lo dice Alboino, che ti vuol bene, lo puoi tu far / suvvia da’ retta al maritino, se no la testa ti fa staccar, tango!” arrangiament del direttor di edizion Giorgio Gaslini, diventà famos, depoeu per… tutt. Del rest Gaslini (al piano) insema al Patruno (chitarra e banjo) e al De Serio (cbass) l’ha arrangiaa tucc i lp che I Gufi hann registrà alla Voce delPadrone. Ti inveci te seret impegnaa cont la Durium perché te dovevet fa’ l’Antologia de la Canzon Popolar Lombarda, l’unica che gh’è, per el moment, e la resterà tal perché per falla hinn vorsù ann e danèe.

In questi temp, vann i rapp, che venden milion de… Cd?, Vinil?, Singol? Visitazion? Copi?… se sa no de cos’è, ma venden anca se i paroll se capissen al des per cent. Ma i paroll cunten no, cunta la pettinatura, el color di cavej, el vestì casual, i scarp gigant, i tatuagg, l’apparenza minima, el portament sportiv, giovanile, i messagg che voeuren dì nient, la musica che la se ridus a on tum,tum de la batteria, ma la cunta perché quand te se affianca ona macchina cont la radio a tutt volum te vedet el guidator o el navigator, o i ospiti che moeuven la testa avanti e indrè per seguì el ritmo. Invece per ti, come per mi, i paroll cuntaven. E quand scrivevom i canzon trovavom el pel nell’oeuv per fa’ di critich costruttiv. S’erom amis, amisoni e nel stess temp nemis giuraa. Gh’avevom stima l’un dell’alter, podevom sta’ minga tropp temp senza sentiss (parli de quand I Gufi s’eren sciolti perché l’era Agost e el faseva cald). Se telefonavom per capì. Mi che voeurevi riformà el gruppo, ti che te voeurevet no. Mi che disevi che gh’avevom ancamo’ de dì, ti che te consideravet el temp del quartett finì. Chi l’è ch’el gh’aveva reson? Sarìa tropp facil di “Mi”. Te ghe sett no a interloquì. Però, te disi che incontri tanta gent che la ricorda i noster primm temp e i second, quej de A3, quand gh’èmm sbaragliaa audiences national, Rai compresa. L’unica question l’è semper stada la pubblicità. Te l’è semper odiada la pubblicità, anca se numm sérom reussì a fa’ spettacol propri con quella bestia nera che la portava via de tant in tant cinq minut de attenzion.

Gh'è tanta gent che conoss a memoria i noster canzon, che la canta indifferentement “Funeral Show” e “Dagh al Gorilla”, che la se recorda i noster spettacol e la politica che ghe mettevom denter. Ma soratutt la se recorda el noster moeud de fa’ teater, copià in seguit da tanti: scèn proiettaa (serom dal ‘64 al ‘69, temp proibitiv per certi miss en scena), costum ner con de sora on po’ de tutt second el discors, domà in quatter che diventavom vott, dodes e come musica ona chitarra e on cbass tra i quint. La colonna sonora? Domà per rumor, campanell, atmosfer, colp de piatt o de grancassa, clacson. Che concert de clacson quand se cantava “El bamborin de la miè d’on ghisa” e sul fond passaven trenta cappel de vigil su ona corda. Chi l’è che el faseva on teater inscì stringaa in tutt. Gh’era on attor, grand, pien de idei fulminant:Paolo Poli. Pareva che gh’avessom tucc l’istess gust. Lu el giugava coi pigott nummfevom el teatrin di gioppii al centro scena per cantà “la bella Gigogin”. Propri ‘sta canzon l’aveva colpì i spettador de la Nigeria quand semm andà a fa’ on tour e la television local. El dì depoeu l’andada in onda de la trasmission, on cittadin de Lagos, ne la sortida de on supermercaa, el se fa visin per di’ “do you wish a Gigogin?”. El voreva dagh ona tosa in past.

Quanti avventur de cuntà, quanti canzon de cantà, quanti stori de narrà. On’esperienza? In cinq ann ona vida che la sta’ in pè anmò adess. Recitavom pù dal 1981, quand gh’èmm portà a S. Remo la canzon Pazzesco. Ospiti. “Ma numm voeurevom vess in lista insema ai alter cantant, concorr. Magari rivà ultimm ma concorr.” Inveci ospiti per ona sira. Tanto vareva che gh’avessom incis la noeuva canzon ”Pazzesco”. L’era mej fa’ el Neonato, el noster caval de battalia. E a propositi de quest titol usaa da Gigi Proietti, l’era ona trasmission che gh’avevi scritt per A3, quand l’emittente l’era come adess l’è ona reteMediaset. Renzo Tortora, col so’ carisma, l’aveva cjamaa tutt el teater de varietà. Dess che gh’è la moda del Tecchetecchetè, anca A3 la manda in onda i so’ Eroi de la TV. E te vedet passàtutta la Rai in ona television privada. Devi dit che me manchen i telefonad che se fasevom, i confront che cercavom anmò, i me desideri senza speranza de reuniss almen numm trii, vist che el Magni l’era andà nel ‘92. Pensa. S’eri all’Idroscalo a fa’ on Gala de Operetta, con do tenor, la Raimondi che la cantava “Luna tu”, el ballett de tip tap formaa da ses ballerinett del quattordes ann e on fioeu de dodes. Gh’era anca la mia tosa Federika, nel ballett, che l’era coreografàa da Chuck Wider, vun del cast de Gene Kelly. L’è stada propri lee, intant che Manuel Frattini el tip tappeggiava on assolo, a damm la notizia de la mort de GianniMagni. A la fin l’hoo dit anca al pubblich e poeu sont cors al Policlinico insema a la Raimondi cont la speranza vana de trovall salv. No. Me l’han fa’ vedè in d’ona stanza. Stirà su ona barella.

Dì che s'eri sconcertà l’era pocch. Annientà. Stessa impression che hoo provà per ti, quand (l’era la tua ‘na mort annonziada da on quaj di) hoo toccà la bara (arnès che hoo tolt in gir in tanti me canzon cimiterial) in doa te seret denter con tutti i to’ memori, i to’ affett, la toa importanza, la toa vos caratteristica, el to’ carattere, la toa personalità. Devi dì che serom ben assortìi numm Gufi: ti el cantant, Lino el musicista, Gianni elMimo,Mil’attor. Se guardavom in scena per robbàss l’un dall’alter quell che podevom robbà.Mi hooimparà a moeves, a mettem in co’ la passion per i canzon popolar cont el suing del giazz, ti t’è imparà a recità, e inscì Lino, e tucc gh’èmm imparà a moeuvess, a mimà. A la fin s’erom complet l’un cont trii quart di alter. Ona bella storia. Troeuvi in gir, a la fin de qualche performance, spettator che me ringrazien, che ringrazien I Gufi. E ti te disevet che esisteven pù? Mi me sembren eterni. Specialmente adess che on politich ona volta a la testa de on partì e adess senza testa, l’ha comincià a parlà de I Gufi, gufà, gufador, gufologii. El credeva de fa’ i scongiuri. L’ha faa nient. El noster nomm l’è pussè fort de prima. E mi, forsi l’unich, che me senti consacrà ‘me on prèt, continuaroo a tegnill alt. Si, el so’ che te ridet, come i Sant de “Per quel vizi” de Brivio/Albertarelli (Andò su in Paradiso/dov’era sempre festa/ i Santi col sorriso/ scuotevano la testa - per el seguit andìì su you tube, I Gufi a colori -), ma anca se te ghe credet no, mi andaroo fina in fond, se el Signor me darà ancamò on poo de temp. I Gufi resusciteran, e cont lor Svampa e Magni, duu colonn important ne la storia del Cabaret, anca se i media tipo Rai fan finta de nient e continuen a fa’ i dimenticaa. Quanto a MCS, el po’ no scordà che la prima trasmission Radio/Tv l’ha fada cont numm. Ciao. Te saludi e cont mi tutti quej che t’hann vorsù ben e te ne voeuren anmo’. brivio.roberto@yahoo.it

è arrivato su WhatsApp

Per ricevere le notizie selezionate dalla redazione in modo semplice e sicuro