Laorà da vecc per i vecc

Il primo quotidiano che parla in dialetto. Ogni settimana lo sguardo affilato in decenni di satira di Roberto Brivio illuminerà angoli della Grande Milano di oggi

Anziani al computer: nonni 2.0, foto generica (Spf)

Anziani al computer: nonni 2.0, foto generica (Spf)

Milano, 9 agosto  2018 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

El titol voreva vess divers. Parli del me titol. Quell che scrivi per rintraccià l’articol, per condensà l’incipit. “Laorà da vecc per i vecc.” Poeu el me sembrava che fudess minga per la qual indicà cont el termine vecc el passà oltra ona certa età. E allora hoo miss domà “Laorà”. Quand l’homme l’è visin ai sessanta el senti semper ripèt che l’è stracch, che el ved l’ora de lassà l’azienda s’el laorava sotta padron, che el ne po pù de fa tutti i di’, i settimann’, i mes, i ann i stess robb (se ciama routine): leves su prest, laves, prepares, fa’ colazion, ciappa el tram o la macchina, entra in ditta, laora tutta la mattina cont la pausa caffè, tollerada dal cap del personal, fermass a mezdì o a la voeuna, pausa pranzo de un’ora, ripresa del laor fina ai cinq, ai ses, e poeu foeura, riva a ca’ per la zena, preparass se vun el gh’ha de andà al cinema (‘na volta ogni quindes dì), al teater (‘na volta all’ann), cont i amis (de gioin tucc i dì, pussè avanti in di ann, ona volta al mes), tornà a ca’, mettes in lett, dormì, svegliass e el di’ dopo ancamo’ come el dì’ prima.

Che vita! La me sembra spassosa domà a cuntalla. A mi, però, minga a quell che la mett in pratica. E, a guardà ben, anca el divertiment el diventa routine. Anca el sport. L’agonismo. Ogni mestèe el gh’ha i so’ ripetizion, la soa solfa. E anca el ripos, la vacanza. Passaa i primm duu giornad de furore, se tira in long per riva’ a mezdì, per rivà a la sira, quatter vaccad a la television e via in lett in attesa del dì dopo. Certo che te devet mettegh denter on po’ de ginger, de fantasia. La visita a ona mostra, la presenza a on spettacol come se dev, la lettura de on liber, del giornal, la passeggiada cont la miè, la litigada cont i fioeu, la pas con i nevod, mett a post la toa robba, das de fa’ perché te accetten on ‘idea, combatt per affermà i to’ diritt che hinn minga in dirittura de arriv, avegh ona prospettiva per rivà al di dopo, a fin settimana, a fin del mes, de stagion. Se te gh’et no on traguardo, semper, l’è facil borlà nell’apatia. Ogni mestee el po’ avegh i so traguardi: on progett, ona cicciarada, ona lezion, ona meta de raggiong, on viagg, mett via i danè per realizzaa ona prospettiva, appagà on desideri. Inscì, el temp el passa produttiv. Ti te sentet pien de voeuja de fa’, te speret che succeda on quajcoss, te se mettet in condizion de fall succed. E quand te seet su la linea de arriv e te guardet davanti a ti, te vedet on’altra linea. E te se mettet in moto per passalla. L’è quest el significaa de la vita? 

L’è a bon cunt fa passà el temp cont soddisfazion a qualsiasi età. Mi hoo catalogàa tutt el me da fa’ denter tanti cartellett, dall’a a la zeta, magara cont duu o trii A, o altra lettera dell’alfabètt. Dent per dent, second i esigenz, i e foo passaa. Me accorgi che hoo lassà indrè tanti robb che voraria fa’, completà, industrià, e me piang el coeur pensà che faroo minga a temp. Me senti come on affamaa de conclud progett, traguardi. E quest l’hoo minga fa, e quest’alter l’hoo lassaa indrè, quest ancamò gh’hoo de iniziall. Tutti me sembren pressant, indispensabil. Voo foeura coont la borsa, a volt el trolley, pien de roba che pensi de fa’ pert strada, in treno, in metrò. La guardi no, ma gh’hoo de aveghela lì. 

L’è 'na malattia, recognussi e ghe sont denter in pien. Come curalla? Cont i spettacol per quej de la mia età, la terza. Hoo comincià la carriera per i fioeu, a metà strada me sont impegnà cont i ca’ de riposo (a Milan ghe n’è on reggiment) e adess che sont mi in procinto de entragh, seguti. E quand sont sul palchscenich a contatt cont i cosidetti vecc, che ballen, salten, canten, viaggen, se incassen, protesten, viven, me senti a mio agio anca se me vedi(attenti ai paroll, me vedi) gioin. Sì. Gioin che el voeur dì ancamò la soa nel camp del teater, del cabaret, de la rivista, dell’operetta, del musical. Grazie a Dio gh’hoo ancamò la vos (me par anzi che la sia migliorada), gh’hoo la forza de sta’ in pè, de esercità la memoria (ona settimana intera de repertori. Podi comincià al Lunedì e rivà a la domenega cont ancamò canzon de cantà, monologhi de dì, barzellett de cuntà, discors de fa) e sora tutt gh’hoo la rabbia nel corp per i robb che vann no. Ona rabbia che la me tegn in pe’ e me da’ squas semper quel che mi ciami “il solito schifoso successo”. 

Gh'hoo anca on altra fortuna. Quella de avegh al fianc ona prima donna che la me fa’ anca de spalla. Se gh’hoo on cediment ecco che la intervegn a sostegnì el discors. E poensà che la parlava no. Poeu a furia de radio, e teater (televisione poca anzi squas nient), e palch scenich improvvisà l’è diventata quella leonessa che l’è. Parli de Grazia Maria Raimondi che l’ho semper citada ma mai hoo calcà la man su la soa intraprendenza, sicurezza e bravura. Sont minga chi a sviolinà. Chi el voeur constatà de persona quell che hoo dì che vegna doman, Venerdì 10 Agost ai 21, in via Solferino 32 a Monza, al circol Ambrosini, on grand local all’avert in doa on amis e President de l’associazion…. Andrea Magro, l’ha organizzàa per cunt de……. On mes e pussèe de passion e divertiment, cont el ball tri volt la settimana (M-G-Domenega) e on grande spettacol de canzon, de fantasia, de cabaret. Mi sont quell de Venerdì 10, ore 21, ingresso libero, spettacolo all’aperto, dopo una interessante cena a prezzi minimi ecco l’esibizion: Roberto Brivio in Le canzoni de I Gufi ovvero canta con rabbia, con la partecipazion de Grazia Maria Raimondi e de Sergio Ferrari all’accordèon. Cossa foo? Parli di me liber (ne hoo scritt dodes ma metti in gara domà i ultim quatter) Canti i canzon di ultim trii dischi: Canzon Popolar - Canzon scritt per I Gufi - Arii de Operetta. Ghe metti intorna on bel discors comic, tant per fa’ fa’ quatter ridad al pubblic e dipanà la tension. Parlaroo del milanes, giusta el me articol pubblicaa su Il Giorno domenega 5/8. Come foo a mett insema i battud? Semplice, come foo adess. Cominci cont vuna: Scontro frontale fra 500 e 1100, 600 d’avanzo. Voo avanti cont on’altra: Attenzione, dopo la BB Brigitte Bardot e la CC Claudia Cardinale, è in arrivo la PP, non fatevela scappare (se on quaivun el dis che l’e’ veggia nel senso che la fa part del me repertori de quarant’ann fa’, ghe disi che mi ormai sont on vintage e parli da vinile) Consigli: Avete perso l’autobus? Non importa: aspettate il prossimo e amatelo come voi stessi. Ve spetti. Se paga nagott. Organizzà dall’ Associazione Culturale Radio Atva, presidente Andrea Magro, el spettacol come tutt quell che succed nel mes de Agost al circol Ambrosini de Monza pres. Francesco Vincelli, el se ciama R…Estate con noi in via Solferino 22. Se paga no perché gh’è el il contributo del Comune de Monza , Servizi sociali Assessora Desiree Merlini. “Capitooo” el diseva Jerry Calà, on attor che l’è andà per la maggior con i cinema panetton. brivio.roberto@yahoo.it

è arrivato su WhatsApp

Per ricevere le notizie selezionate dalla redazione in modo semplice e sicuro