Fà festa per Capp d’ann in teater

Fabio Wolf

Marta Marangoni

La tradizion la voeur che per Capp d’ann se g’ha de fà ona gran pacciada, el famos cenon de San Silvester che quand che la riva la mezzanott te set giammò bel che cott.

Ma num milanes, che semm sì

in Italia, ma anca vesin a l’Europa, hemm ciappàa on’usanza che a Londra, a Berlin e a Paris l’è in

voga da semper: fà festa per Capp d’ann in teater.

La nostra cittaa l’è piena de teater indove ti te podet

godè de la cultura e mangià anca el panatton cont i attor!

Ma la proposta pussè original per nialter Duperdu, l’è certament quella del Teater Elfo Puccini.

Duperdu fa quatter e inscì num gh’hemm duu fioeu: on mas’cett de 10 ann, el Plinio, e ona femmina de 7 ann, la Dalia. Per Capp d’ann gh’hemm de troeuvà quajcoss che la vaga ben per tucc.

El spettacol “Alice underground” l’è on gran “show” ch’el pias a grand e piscinitt perchè l’è come on carton anemaa. L’è traa foeura del classic del Lewis Carrol, ma trasfiguraa de quej ment folgoraa del Bruni e

del Frongia: on viagg de maraveja, un caleidoscopi de color ch’el celebra la forza de la fantasia.

El spettacol l’è rivaa financa a la centesima replica anca perchè a interpretà la protagonista Alice la gh’è

quella sanguetta de la Elena Russo Arman, ona attris che l’è semper on portent.

Allora per el 2023 i noster auguri a hinn de dagh ona speranza de cambià a sto mond, che l’è tutt

sbagliàa, e fà propi come l’Alice che la rebalta la prospettiva!