El Verzeè de Milan l’era diventaa tropp ingombrant

Marta Marangoni

e Fabio Wolf

El Verzeè de Milan l’era la scola de lengua del Carlo Porta, come el diseva luu. Però al principi del Noeuvcent l’era diventaa tropp ingombrant in de la soa posizion central e se decid de portal indove el gh’era el maledett Fortino del Radetzky, foeura de Porta Tosa. Indove incoeu el gh’è el parch di Marinai d’Italia, in del 1908 se costruiss el primm mercaa ortofrutticolo del noster Paes. In stil “liberty” milanes, “art decò” minimal, a bass cost, ma pur semper elegant e prezios, come la testimonia l’unica soravivenza de tutt el compless: la Palazzina Liberty. Ti te podet avé on’idea de quel che l’era el mercaa, se te vet in via Bezzecca o in vial Molise, all’Ex Macell. L’era on mercaa modern “intermodal”, come se dis incoeu.

Collegaa cont la ferrovia annonaria de Porta Vittoria, cont dusent cavaj semper pront in de la grand stalla de via Anfossi per portà tucc i dì quintaj e quintaj de frutta e de verdura: i cires de Biagrass, i verz de Casalpusterlengh, i figh de la Brianza, i fasoeu de Vigeven. Pussè de mila fachin se affannaven innanz e indrèe per el grand mercaa e tucc se ritrovaven a mangià la trippa in del Padiglion del Caffè, la Palazzina, propi lee. In del 1965, tuttcos vègnen traa giò e la Palazzina la resta lì, desmentegada. ‘Riven Dario Fo e Franca Rame a ciapalla in del 1974 e ghe metten su la “Nuova Scena”. Inscì riporten la Palazzina Liberty al center de la cultura milanesa, indove la staa ancammò adess.