El risott giald l’è entrà in del coeur

Fabio Wolf

Marta Marangoni

In sti dì che l’è ‘rivà el frecc, l’è bell disnà cont on bel risott giald: "quel sole gastronomico che splende sulla bandiera della cucina milanese", come el diseva el Vincenzo Buonassisi. Ma quand l’è che l’è nassuda questa bontà chì? L’era la fin de settember del 1574, el maester fiammingh Valerio da Profondavalle l’era adrée a lavorà a la vetrada del noster Dòmm. La soa fioeula la s’era innamorada de on giovin milanes. La festa per el matrimoni l’era propi lì, in de la fabbrica de la Cattedral. On manoval del Valerio, Zaffràn - inscì soranominà perchè el adoperava el zaffràn per fà i color di veder pussée brilànt - l’era adrée a cusinà el piatt principal del riceviment: el risott. Quand se diss i coss del mond: l’è success che l’incart cont la polvera gialda l’è borlaa giò precis in del pignatton del risott e… magia! Quel ris inscì sbarlusent l’era delizios! E allora el matrimoni l’è minga andà in malora, l’è andà ancammò mej: El capmaster Valerio el g’ha fa la festa al Zaffràn: el g’ha daa el aumento de stipendi. Quel risott, l’è minga de cred! Usma che bon odor! E che color! E inscì el risott giald l’è entrà in del coeur de Milan. E nialter Duperdu hemm scrivuu giò ona canzon sora questa bella leggenda milanesa: "Oh che miracolo che gusto esotico | questo safran macrobiotico | come s’imbeve di giallo il chicco | e come sposa bene il soffritto".