Depeu el quindes l’ann l’è in saldo

Già se sa tutt de quel che faremm, l’è ora de prenotà i regal de Nadal

SI USA ANCORA Da Shirley Temple ai bimbi d’oggi, la letterina  con la richiesta di doni per Natale è ancora in voga. A destra: Nino Ferrer, morto nel 1998, cantava “La pelle nera” hit del 1967

SI USA ANCORA Da Shirley Temple ai bimbi d’oggi, la letterina con la richiesta di doni per Natale è ancora in voga. A destra: Nino Ferrer, morto nel 1998, cantava “La pelle nera” hit del 1967

Torni su quell che hoo giamò dit in questa pagina l’ann passaa. Depoeu el quindes de Agost semm giamò a Nadal. Propri inscì. Come dal Nadal de l’ann passaa semm rivà in on lamp a Ferragost, da incoeu in avanti se riva al Nadal a ona velocità che la Tav se la sògna. Già se sa tutt de quell che faremm a Settember, già in di negozi hann miss foeura da temp i vestii autunnal e quei estiv in saldo, già gh’è chi l’ha presentà i progett di manifestazion pre-natalizi, natalizi, post-natalizi, chi l’è drè a organizza’ l’ultim dell’ann, chi prenota i foeugh artificial, i regal de fa’ ai fioeu e quej de fa’ ai grand, i localitaa sciistich, i alberghi per i settimann bianch e addirittura hoo vist oreves che in del lor negozi accetten i prenotazion de on bisgiò cont accantonament di rate per dovè integrà pocch al moment dell’acquisto definitiv. Ona sòrta de pacch natalizi come se faseva cont el cervellee. E tutt quest dal sedes de Agost in avanti.

 

Hii dà on'oggiada ai titol di avveniment de questi dì’ e a part i prevision del temp che nunzien temporal, diminuzion del cald, i negozi che minga content di saldi estiv metten giamò esposta la robba autunnal e i prenotazion per l’ultim dell’ann, i cartolee e libree che tiren sù el cost di liber de scola, e i supermercaa ch’hinn lì per vend el panetton, el codeghin ,el zampon, i notizi a hinn squas comic. “Ubriaco al volante, la moglie lo prende a schiaffi”. Hoo leggiù l’articol fina in fond. Uei, l’ha sganassaa propri davanti alla pòla che la guardava con approvazion contenuda. “Sì, sì. Te tiri foeura di pest. Te do’ ‘na man a tornà a ca’ ma intant ciappa quest, e quest chi, e quest chi ancamò. L’han dovu fermalla se no ghe rovinava la faccia. Scommetti che se tutti i miee gh’avesser la forza de boxà su la faccia del marì ciocch tradì, tanti prepotenz da part dell’homm finirien. A meno che el marì fudess spiritos. La miè la dis al mari ciocch intant che rientra a ca’ vers i trii de nott. “L’è questa l’ora de rivaa?” “Hoo faa el gir di ges” “E perché?” “Per un discorso divino” “Va’ come te set consciaa, e ciocch per gionta” “dai, dai, fa’ no di stori. Te me spettà vestida in questa guisa?” “Sì, mi quand spetti metti su el vestì de sera” “Dai, disbiottes che te foo chi sul palchè!” “Ma come, in questo stato?” “Perché? Devom andà in Svizzera?”. Altra notizia che on quai quotidian le mett fina in prima pagina. “Belen Rodriguez infiamma Ibiza per il compleanno di Andrea Jannone” “la California brucia ancora, 75 mila ettari andati in fumo” Ven voeuja de commentà “Che forza ‘sta Belen, e che velocità. Da la Spagna a la California in ona fiammada!”

 

E ‘ndemm avanti “La nuova pericolosa moda che avanza anche in Africa: sbiancarsi la pelle”. Sem rovinaa. Nino Ferrer el cantava “Vorrei le pelle nera” e mi recitavi el monologo “Io volevo diventare un cantante negro. Ma ero svantaggiato fin dall’inizio: primo il colore della mia pelle, secondo perché sono di Assisi, patria di Francesco, un cappellone locale in testa all’high parade. Non c’è posto per due.” Per fa’ danèe han fa’ ‘na pomada che combinada cont alter ingredient e spalmada, la sbianca come se sbianchen i dent. Da negher a bianc. Inscì finissen, disen lor, i razzismi. Come l’era quella canzon? “ Illusione… dolce chimera sei tu.” Minga per la sbiancadura, per el razzismo che l’è diventà on sentiment politich, on odio facinoros, on atavismo costruì. Basta no’ cambià la pell per cambià on sentiment. Ghe voeur alter! Danèe per i chirurghi che trasformerann el corp, el nas, i laver, cont l’apporto di ciapp, se gh’hinn e se gh’hinn no, sciao. Come la dis ona canzon scritta cont el Marelli musicada e arrangiada dal Parisini, passada all’osteria e diventada popolar. La portaroo in Serbia in doa gh’è el “festival de la canzon popolar”. A Guca fann anca el festival de la tromba. “Uei, doa te set sta’ st’estaa?” “A Guca. In Serbia” “E te set divertii?” “Sì’, hoo faa ona trombada!” Ghe n’è per tutti, anca per i cultor de la lingua.

 

Hoo leggiù on comment che el parlava de on calciator. Le riporti fedelment. “ Pienamente a suo agio, con personalità e testa alta, il difensore azzurro (parlen del Bonucci tornà a la Juventus) s’è reso protagonista di alcune buone letture tattiche. Spiccando, e non è una novità, nelle aperture illuminanti.” E peu diseven del Brera! Ona volta i offert de laor a eren colorà de humor “ Fabbrica dinamite cerca operaio. Spostamenti rapidi” Oppur “Cercasi segretaria stenodattilo sperimentata, capace iniziativa, possegga possibilmente due lingue” Adess scriven “Air Dolomiti cerca assistenti di volo”. Me immagini i selezion. Tutti che se sbatten giò da “I denti del Gigante”.

LA NOTIZIA pussè bella la ven da la Nuova Zelanda: “Tutti pazzi per gli Avocado! Lisde di addesa a causa dei furdi.” Cuntavi sti’ stranezz l’alter dì a l’Enrico Intra, a la soa miee Fiorenza, e a on ròsc de amis che s’eren presentà perché appassionaa di me canzon cimiterial. On tipo de baita de montagna, visin a Tesserete (Svizzera italiana), raggiungibil per ona strada che l’è mej ciamalla mulattiera, ma on post incantevol, pien de alber, de prà, de aria… svizzera. S’eri andà cont el Guido Veronesi, ormai cù e camisa per via del film che semm a drè a girà, e cont l’inseparabile Maria Grazia Raimondi ciamada impropriament Betty, chissà perché. In 48 ann de convivenza (marì e miee) hoo mai capì la reson de quell’appellativ. El Piero Mazzarella la ciamava cont el so’ nomm d’arte Grazia Maria. El diseva che l’era on’attrice, ona cantante che la sbusava el palch scenich. “L’entra in scena e la diventa subit centro dell’attenzion. Perché la pias ai donn e ai omen.” Second mi i organizzator e i offizi stampa se desmenteghen de lee prima che femm spettacol salvo recredess depoeu. E anca se la fudess el primm nomm in locandina, fann gli gnorri. “Orco can” la dis lee, a la Totò “ hinn squas 40 ann che calchi la scena e me consideren mai”. “L’è che” el diseva on giornalista, “quand se parla de I Gufi se tend a minimizzà el rest del cast. E de I Gufi se parla semper”. E mi de rincalz. “Se invece de parlà tanto i avessen fa’ laorà pussè in television…” el discors el finiss lì perché l’è inutil rivangà.

Intant i visin de ca’ eren rivà cont ona anguria. Gh’era anca ‘na mamma de sett fioeu, giovina, giamò nonna de ona nevodina. Duu dei sett, Paolo e Stefano, saveven a memoria i canzon che hoo scritt per I Gufi: Fa caldo, L’ambroes, La ballati di li mammi, Per quel Vizi, va Longobardo tango e ancamò L’Orango tango e Torsoli de Albertarelli, el compositor di canzon macabre. I èmm cantà tucc. Tra on biccer de vin, ona fetta de anguria, on sorris de l’Enrico, Maester de Jazz e de vita, ona espression de Fiorenza e l’intervent de Grazia Maria che l’avaress canta’ anca l’Operetta. L’ambient l’era pari pari a quell del Cavallino Bianco. Ghe sarìa vorsù l’orchestra, però, o el piano. Ma l’Enrico, in ferie, el s’è stacca dal so’ strument e dai musicist. Cont la chitarra sonata dal Mocetti, anca cont la bravura de vun che el studia al conservatori, l’Operetta se podeva no tiralla in sui cord vocal. Semm al sedes, ma de “sedes” ‘sto mes ghe n’è pocch. A gh’hinn tanti sorris. Giusta quej che serven per augurà Bon Ferragost ai lettor, ai colleghi de Il Giorno (l’unich quotidian che el gh’ha el coragg de ospità, tri volt la settimana, on’ intera pagina in milanes), ai amis, ai parent, e a tucc quej che viven in la mia ment, nel me coeur e diventen i protagonisti di me articol.

Domandi scusa ma hoo minga parlà de la tragedia del pont. La notizia l’è rivada d’on colp. Sont trist, addoloraa. Me dispias. Come tutti i tragedi, forsi, la podeva vess evitada. Varda ti el destin, a volt. L’alter dì i camion sc’entrà in autostrada, Martedì el pont, e prima el terremot in Friùli. Senza cuntà quell che succed in di alter paes. Ma gh’è ona giornada che la vaga via senza disgrazi? Gh’è de disperass.

 

è arrivato su WhatsApp

Per ricevere le notizie selezionate dalla redazione in modo semplice e sicuro