L’enciclopedia tajà giò dai giornaj

Migration

Milano, 26 luglio 2020 - Quand te legget el giornal e te pias ona notizia, se te gh’et voeuja de tegnilla te la devet tajà subit, minga mett el giornal su ona cadrega e spettà el moment giust per fa’el ritaglio. Gh’hoo ona pigna de giornal che parten cont la data del 1 Marz e finissen cont quella d’incoeu. Tucc i mattin me svegli, la guardi, me augùri de laoragh sora. I giornal vanzà se te gh’et minga bisogn de nettà i scarp, sugà per terra, pizzà el foeugh, fà sù di pacch, ti e sbattet denter el bidon de la carta e sciao. Ma on cunt l’è fa ‘sto mestee cont quaivun, on cunt l’è fall a pussè de 180 giornal.

Te ghe mettet ona vita. Fall cont Il Giorno, per esempi. Te tajet “Il Caffè” cont dedrè “La Musica che cambia” e poeu “L’Intervista “ “La tragedia” ”La psicologia” quand gh’è on argoment che te ciappa, “Ciak d’autore”, on quai servizi de “La musica”, la pagina de l’“Estate”, quella del me articol “L’angolo di Milano”, “Gli eventi”, certi servizi de “Salus”, quand in cronaca te fan i spegget per spiegatt come la va ona notizia che la riguarda tass, cambiament, ona legg neouva. E poeu te dovarisset catalogà i pagin per argoment. Se te ciappet l’abitudin de fall tucc i dì te se troeuvet in ca’ ona enciclopedia impagabil, unica, cont catalogà i servizi, i articol, i notizi. Poeu passen i ann e la toa raccolta la diventa on tesor. Mi hoo provà a fall cont i fumetti. Ma hoo minga vorsù rilegaij. Hoo fa’ cinq traslocch e, on numer de chi o numer de la’ la raccolta la s’è desperduda e adess la gh’è pu.

Ma ti pensa: Gordon, Mandrake, L’uomo mascherato, Ciclone, Fulmine, Cino e Franco, Gim Toro, l’Intrepido, Lancio Story, Il Monello, Il Corriere dei Piccoli. Si, gh’hinn i ristamp, ma te voeuret mett? L’unica serie che la m’è restada l’è quella degli Albi D’Oro de la Mondadori, cont i primm Topolino. Per forza. Hinn quatter volumm ligà insema cont tant de copertinn rigid. Me ricordi ona storia con Topolino vestì de Mago che in su la collinetta de on immondenzaio el faseva la magìa de trasformall in on quartier cittadino: gh’era anca on poliziott che camminava in mezz al ruff. El s’è trovà in mezz a ca’, strad, pont che i attraversen, prà, verd, alber, on gesa, lampion. Salt, dolor de pè, faccia stranida, come la mia la prima volta che sont entrà in Milano Due. La stessa idea avuda da Topolino nel 1956/ 57. Gh’hoo abità 26 ann e hoo mai cambià idea. mail: brivio.roberto@yahoo.it