El telefono, el misteri dei vos e tutt quei numer de schiscià

Milano, 1 marzo 2017 - Ona volta te ciappavet el telefono, te cercavet el numer sull’elenco, te telefonavet e te rispondeva direttament chi te voeurevet intepellà o al massim ona segretaria. Risultato, te gh’avevet semper ona conversazion che di volt la vegniva bona. Adess te rispond ona vos che la dis de schiscià l’1, oppur el du, o el tri, el quatter, el cinq, el ses, el sett, el vott e se te voeuret sentì ancamò el menù, el noeuf. Per ciamà l’operador de devet spettà in linea, al des. Prima o dopu el se farà viv. Ona volta te spettavet al massimo trii minut, che sembraven long ‘me la famm. Adess se la te va ben te spettet mezz’ora. L’alter dì hoo spettà on’ora giusta. A la fin l’ha dit pronto, gh’hoo nanca fàa a temp a rispond che la comunication l’è andada via. Lì per lì me sont incassàa ma dopo hoo pensà che podevi minga ciappamela cont ona macchina che la s’era descaregada nell’attesa. Pòra tosa (la macchina) la gh’ha diritt anca lè a on quaj minutt de ripos. E cont pazienza hoo comincià de capp a fàa i numer. Vun, du, trii…hoo schiscià 10 per parlà cont l’operador. L’ha respondu inaspettatament subit, tant che sont restà bloccà senza savè cossa di. Quando gh’hoo trovà al fià per parlà, l’era giamò andà via.

El misteri hinn i vos. Sì, el so, l’è on call center, ma possibil che seguti a parlà cont la stessa vos e che tutti i operador se ciamen Mario e i donn Francesca? E a proposit de telefono el par che el sia diventà indispensabil. Sul metrò su des viaggiator noeuf gh’han el telefono in man, acces, o che parlen o che senten musica o che guarden fotografii o che leggen messagg. Se poeu l’è collegàa cont Internet riessen anca a legg el giornal, a savè quanto tempo ghe voeur per rivà a ca, a legg i barzellett. Quej pepàa poeu a hinn gradìi pussè che i alter. Esempi: «Capissi no. L’è giamò tri dì che sonen a la porta, el se presenta on giovinott el me domanda se gh’he el me marì, mi ghe disi de no, lu el me ciappa el me violenta, el me dis grazie e via senza voltass indrè. Per tri dì. Incoeu ancamò. A capissi no. Cossa el voeur quell lì da me marì!?»

Ghe l'hann tucc, grand e piscinitt, omen e donn, commerciant e ndustriaa, pret e monigh, borghes e militar, scior e barbon. L’alter dì ho senti on barbon che telefonava a ona barbona. «Te set sota al pont de la tangenzial? T’hèe giamò pizzàa el foegh? Quand l’acqua la buj in la tolla butta la pasta. In des minutt rivi. No, no, el pan el porti mì e anca el grana. N’aveva buttà via on sacchett inter ona trattoria. Beh, l’era scadu da on quaj dì ma gh’hera minga la muffa. Bon, bon te disi. S’eri lì che scartabellavi in del ruff davanti a on cervellee quand la ven ona sciora. “Cossa el fàa” la me dis ,“ Metti a post el disordin” ghe rispondi “ Vegnen chi, butten denter de tutt, senza la differenziazion. Ghe voeur ordin anca nel buttà via la roba.” “ E quel pacchett?” la me fa, “ L’è on poo de formagg grattàa che hoo trovà ancamò confezionaa” ghe rispondi, “Ma l’è pien de formigh” la me fa cont on certo schivi, “No, no, ie netti” ghe rispondi cantand la tiritera “ togn togn/ pela rogn /pela figh / capitani di formigh/ pan poss pan fresc, indovina chi l’è quest” e intanta cont i ong, come se fa per coppà i pioeucc, sbassavi el numer. “Tenga, buon uomo” e la me slonga on bigliett de des euro. Ghi hoo chi. Adess, intant che vegni a ca’, al pont, passi dall’osteria senza basej e me foo regalà on avanz de ross. L’altra volta me capità on barbera dell’oltrepo’, se gh’hoo on po’ de cuu e me capita on avanz de Valdobiaddene sem a caval: gh’èmm tutt. On pranzo da signori».

T’è capì el barbon? E num semm chi a fa i schivios, i sninfi. E t’è vist l’utilità del telefonin? Se el gh’era no come te fasevet a savè tutt sto gibilèe. La me vegnuda famm. Voo a sgurà el portarifiuti del Savini. Hoo leggiù ch’el paga no l’affitt al Comun de Milan. S’el paga no l’affitt el paga nanca el personal. Te voeuret vedè che per recuperà danèe camerer, chef, lavapiatt, direttor se fan pacchet cont la roba bona e la ficchen nel porta ruff de drè la cusinna per portalla via quand lassen giò la seggia (a fine lavoro)?