Quand el voeur anca el cittadin debol diventa prepotent

Bisogna ritirà in ball la giustizia, quella vera

La Milano degli anni Sessanta

La Milano degli anni Sessanta

Milano, 2 luglio 2017 - Calciator comprà a 30 milion minim de euro, gent che roba o che l’ha robàa, personagg che deven andà i galera e che magari l’era mej fai lavorà gratis per vun o duu ann, attor, presentator, giornalist della TV che se lamenten se ghe decurten el stipendi ch’el sarìa alt anca se sbassàa, industrial che seguten a giogà i profitt al Casinò, pensionà che sbatten via la pension per giugà ai macchinett, gent che l’ha comprà fufa per or e argent e la mett in mostra, pedofil che se fan giustificà i peccàa e troeuven anca el dottor pront a dagh la patente de malaa sessual, pervertii e vandali che se diverten a spaccà, a trafugà, a fa i writter (legg come l’è scritt), ad agì’ de prepotenza. Gent che la coppa… Ona società in cambiamento! Ona noeuva Sodoma e Gomorra. E numm ghe semm denter. E per on vers o per l’alter se sentom in colpa perché gh’avarissom no la forza de trovà on moeud de denuncia’ cont on spettacol epocal ch’el tirass in ball la giustizia, quella vera, ch’el disess al cittadin debol “quand te voeuret te diventet prepotent anca ti”, che l’amor e la poesia sarien i unic robb per vegni foeura dall’egoismo che l’impera. Incoeu sont stà colpì dai stipendi di me collega pussè fortunàa e quindi pussè bravi. Ma, cassius clay, l’è bravura domà quella che gh’han mis per fa alzà i compens? Unmilion e votcent mila all’ann! Mi i u vist nanca in 60 de ann de spettacol.

Se per ipotesi foo el cunt, quand s’eri su la cresta dell’onda rivavi nanca al 1% , che fan 18.000. E mi, che scrivevi, fasevi i regii a la radio, recitavi, dovevi realizzà on programm de tredes puntàa e poeu spettà ses mes o on ann, prima de fann on alter, e che fadiga. Inveci adess ospitàa, partecipazion, passagg da on canal all’alter (tucc cerchen de fass bell per avègh el protagonist del moment e domandghj i solit robb) e pesg da ona ret a on altra, e peu ancamò fiction (credi che tucc i attor abbien fàa i carabinier), sceneggiàa (che hinn la stessa roba), film per la tv (capissi no la differenza, forsi l’è per fai lavorà pussèe) e peu i serad, i spetacol sporadic tant per dimostrà che fann i pien. El diseva Alberto Lionello “ che vengano in teatro i cosiddetti televisivi, ma che ci restino, che creino pubblico, che dicano qualcosa oltre che a monologare per far ridere con imitazioni, raffigurazioni di difetti a volte anche fisici”. El gh’haveva reson.

El teater te porta via tutt, temp, spazi, vita (le diseva la mia insegnant de recitazion Esperia Sperani, la signora Cipriani alla radio). Se t’el fet regolarment te capità de sta’ lontan dallo schermo grand o piccol ona intera stagion. Dopo on para d’ann el pubblic te compensa cont ona frequentazion regolar. Ma per i organizzator e i proprietari di teater se te fet minga la television o el cinema te ciamen no e allora el gir el picca semper lì. Va ben i alt compens ma almen salvemm el pudor. Hoo leggiù dichiarazion come “Io e gli altri artisti siamo un valore per la Rai, non un peso…” Ciumbia. Ma quei che hinn convint de sto valor hann pensàa che se gh’era minga la Rai a lanciai probabilment adess a eren nient? O pocch? Per mi questa l’è arroganza e superbia bella e bona. Cont quest disi no che deven piegà la testa e ingenogiass. Ma almen de contentass e pensà che on operari quii danèe lì (domà quej d’on ann) i e ved no in tutta la soa vida compres la pension allungada perché la vita la s’è slongada. E adess basta cont i lamentel e parlemm di programm che fann i “sciori” dell’audience. Per mi, l’unich che el sta’ in pè a part on quaj servizi giornalistic, quand i conduttor se parlen no ados, l’è tecchetechete. El te fa’ dì, se te recordet no quel che te vedet: “ma mi in doe s’eri? ”. Capissi anca che se po no per tutta la sera fa el techetecchetè, ma quand el finiss te lassa cont el desideri de vedenn anmò. A fan pocch cabaret, l’è vera, e parli no de I Gufi, che par gh’abbien l’ostracismo televisiv, e si che de roba da scernì ghe ne saria tanta. Ogni tant ona puntada la faria minga mal, ma l’estàa l’è longa chissà che…

 

ECCO, progettavi l’alter dì’ cont el Svampa che l’è obbligàa a restà sul lac maggior, mi e lu, sotta a ona pianta al fresc. Cont on giradisc de vinil al fianc, do altoparlant, ogni tant i mieè che vegnen a interrompi i duiloqui (se soliloqui l’è quell de ona persona sola, turpiloqui l’è quel di parolasc, duiloqui l’è fàa apposta per do personn), e via cont i ricord, i canzon, i sogn, i speranz de viv a long, ogni tant on quaj amis ch’el passa. Pensa che bella trasmission. Costo quasi zero, scenografie: el lac, el giardin, i piant, tutta roba nature, minga de costruì. Material de repertori (ghe’ on offizi Teche Rai cont ona scritta in PP che la te invida a fa’ ricerch). Se la Rai la mett a disposizion on quint de quell che la spend per ona rivista official ghe femm anca i ripres e la postproduzion. Chiavi in mano Brivio/Svampa Show e se voeuren anca el Patruno, ghe femm i ripres da Roma senza nanca spend danèe per viagg e trasferta. Pensa che mond gh’emm ai spall de cuntà. Ona vita anca in caricatura come quei del Prosdocimi che hoo pubblicàa nel me ultim liber “Facce … da spettacolo” vendu, stravendu che ne vedi pu in gir. (L’avran ritiràa e mis in cantina). Ve anticipi ona quai battuda che faseva ridd in di ann ’60, strappada da vun di me liber: “Il pollivendolo mi ha consegnato delle uova così piccole che sembravano uova di bambini” “Improvvisamente è tornata la luce, per fortuna mia perché camminando al buio rischiavo di cadere senza accorgermene,” “Il mio cuore batteva con forza suonando il campanello.” “ Mio nonno mi parlò, la sua mano tiepida si posò sulla mia testa e mi disse…” “Allora, 15.000 persone sentirono ad un tratto sulle loro spalle il peso di quelle cosce gloriose ed il terribile, inebriante, odore di quel sudore che era il profumo dell’amicizia.” “ I bebè si sciacquano in due acque tiepide, poi si mettono ad asciugare in asciugamani di spugna. Non si devono né sfregare né torcere”.

 

è arrivato su WhatsApp

Per ricevere le notizie selezionate dalla redazione in modo semplice e sicuro