La paura de avegh paura. E che la paura la te faga fa di gest che te fariet mai

Milano, 31 agosto 2017 - La paura l’è on stato emotiv de ansia e de turbament dovù a ona situazion de pericol, ma l’è anca determinada da preoccupazion, da apprension o avegh on presentiment ch’el te mett addoss on quajcoss de indefinì (paura che succeda l’irreparabil), o (e per ona volta tant el “vacabolari” l’è minga stitich) o paura de indormentass, de andà incontra a quajcoss de minga piacevol, paura matta, morì dalla paura, mett paura, fa paura, avè el coragg de la paura, la cossidetta temerarietà, audacia, che la nass in on moment de grand pericol. Per mi la paura l’è quella de avegh paura e che la paura la te faga fa di gest che te fariet mai, sconsideràa. E de quella paura mi gh’hoo paura. Paura de on moment de follia che te tira a sbattes giò dalla finestra, paura de fa volutamente mal a quaivunn, Paura de vess intrigà in quaicoss che te ingarbugliss la vita, paura de la mort, paura de rivà no a fà gli auguri a mia miè, Grazia Maria Raimondi, con l’amor de 47 anni tra convivenza, matrimoni, fioeu, teater e stà ben insema, paura de la vita futura, insòma, paura. Quella che te podevet provà dalla lettura di romanz de Poe, o quella di film de Hitchcok, e de alter grandi registi del terror l’è minga paura, l’è “color” a volt romantic come in di Frankestein o Vampire o Loff Mannaro.

Quella che te vegn quand te set de perti e te sentet bordelleri all’improvvis, quand te vedet passà on’ombra ai to spall, quand in cantina se sentet ona presenza, on buff, on rantol, on gemit che te fa soprassaltà, l’è no paura. Ma quand te sentet ona volta el rumor de on terremott, o el sfrigolà d’on foeugh, o anca el frecass de ona cascada, o l’eco di to’ pass in d’on bosc silenzios, te ciappa ona tenaja che la ven su da stomich e la paura, la vera paura la te sommèrg, la te streng, la te tormenta, la te fà impallidì, drizzà i pel, i cavei. Se te st’è ben de coo te riesset a superall, se te scanchignet anca ona cossolina, l’è dura, te devet avè paura di reazion. Mi de quei che gh’hann minga paura, che fan i spavaldi, che creden de vess “il monumento al coraggio” me fidi no. A hinn i primm a scappà. A lassà giò de colp tutt quel che gh’hann in man ai sciacall. Quei sì che gh’hann paura de nient. El me pà me mandava giò in cantina a toeu ona segiada de carbon. Gh’avevi 12 ann e dovevi famm coragg. Mi derbivi la porta lassandola splancada e cont la lampada a petroli (che se la borlava in terra correvi il ris’c de brusà la cà) discendevi i scall, percorrevi el corridor, me vegniva la pell d’oca al pensèe che forsi in quaj anfratto ghe stava on quaivun in agguato, finalment rivavi in la mia cantina, mettevi denter la ciav, entravi e me sentivi al sicur. Caregavi la segia de carbon, derbivi la porta e ripercorrevi la strada fin a la scala cont la stessa apprension de l’andada ma sollevàa per la visina sortida.

Chi l'è dis che la paura te lassa no segn! Anca adess me sogni del percors, ma l’è quell de ona cantina cimiteri e i port dann nella tomba de famiglia. Hoo provà a psicanalizzamm per trovà l’origin dei me canzon cimiterial, di certi me comportament claustrofobic. Nient. Ma scommetti che se andass ancamò in quella cantina la paura la tornaria. Me immagini i psicologi de adess contra el pader che manda el so fioeu in cantina (l’è on esempio sbaglià perché i cantin hinn illuminàa, men sporc, fan no paura, gh’hinn nanca i ratt pien de velen nel corp perchè van a morì lontan), ghe disarissen in di social: disumano, feroce, mostro, inadeguato, atroce, brutale, efferato, spietato, terribile, bestiale, belluino, selvaggio, crudele. No, semplicement on pader che el gh’ha minga paura e che per insegnall al so’ fioeu le sbatt giò in cantina a toeu el carbon. Trauma? Nel ’50 se doveva superà el trauma de la guerra, i bombardament che fina a cinq ann prima teneven in pè’ la gent in di cantin per la paura de vess centrà, i fusilazion, la paura de finì in on grupp de destra e vess mitraglià da quej de sinistra, o de finì in on grupp de sinistra e vess mitraglià da quei de destra. E adess questa paura l’è minga finida. Quand canti ona canzon che ho scritt insema a Svampa cont musica del Patruno e disi “Giù col morale/che schifo stare allegri/giù col morale/la guerra non c’è più/ giù col morale/ davvero non è il caso/ di avere l’indice/ ficcato dentro al naso/ ma oltre al mare ai monti e alle donne/ c’è tanta gente/ che tira madonne.”

Quell “la guerra non c’è più” el sona fals perché dal ’62 a incoeu quanti guerr gh’hinn stàa, quanti tortur, quant paura de morì o de vess imprigionàa! L’unic concett giust l’è che tutt el mond el seguta a tirà i madonn. E a pregaj anca, che faghen finì tutcoss. Che daghen la possibilità de inventà alter mestèe che la guerra, i battali, i scombatt per vinc la loja de la pas; el scontrass de idèi l’è bell ma senza bajonetta, senza pistola, senza prepotenza, senza sègn che porten a la paura. Ed ecco che semm tornà all’argoment dell’incipit slongàa. Se te voeuret  provà l’emozion de la paura comincia ad aveghela in cusina quand te mettet insema la verdura, paura de tajass; al cess quand te se lavet, paura de borlà sulla vasca e de spaccat i dent; quand a ona certa età te legget e te ghe vedet pocch, paura de vedegh pu del tutt; quand te se abboffett senza remission, paura de fa ona indigestion letal; quand te ciappet a sberle on fioeu, paura de rovinagh on quaicoss denter; quand te fet ona imprudenza cont la macchina, paura de fàa on incident mortal; quand te fet l’amor con trasport, paura che te tira nanca i madonn, Regordes che “ Si puo’ morire facendo il Presidente/ si può morire scavando una miniera/ si può morire d’infarto all’osteria/ o per vendetta di chi non ha niente/…si puo’ morire uccisi da un regime/ si puo’ morire schiacciati sotto il fango/ si puo’ morire attraversando il Congo/ o lavorando in alto sul cantiere/… si può morire a furia d’esser magri/ si puo’ morire cercando un ospedale/ si può morire in sevizio militare/o per il solo fatto d’esser neri/… si puo’ morire dicendo Ave Maria/si può morire gridando mondo porco/si puo’ morire per un sorpasso storto/o sotto il fuoco della polizia.” (Svampa/Patruno). Gh’è denter tutta la paura de morì del mond. E se gh’emm desmentegà on quaicoss basta fagh ona noeuva quartina e el gioeugh l’è attualizzàa.