On miracol del gorgonzoeula: l’ho mangià, “l’aglicemia”? Ferma

Dopo la razzia a Milano Food invece del solit tresent, l’era cent

La produzione del gorgonzola agli inizi del Novecento

La produzione del gorgonzola agli inizi del Novecento

Milano, 18 maggio 2017 - Me scriven per damm consili sui argoment che dovarissi trattà in la settimana. Mi ringrazi la bona volontà e i desidèri de tucc i lettor ma de certi argoment ch’hinn stà strausà su internet, uattsap, yu tub, facebuk, tuitter, l’è inutil parlà ancamò. El dì dopo l’avveniment gh’è giamò ona filera de scenett, situazion, calambur, notazion comic, che me senti minga de fa dobbion. Se mai gionti che la notizia da Far West riguard al difendes dai lader la dovaress vess pubblicada domà su Amazon che l’è on termin milanes. Basta spostà i accenti. Es: a màzom, a mazòn, (la z se legg ss). L’alter dì, in attesa dell’approvazion del Senato, i lader, s’hinn miss ai tornej de la metropolitana, travestì de controllor, a fermà i viaggiator. Pontand la macchineta che la individua el bigliett, el percors, el cost, la validità, i timbri, diseven: cinque euro please e…cito . Tutti sborsaven la cifra richiesta. Domà vun, cont la faccia da pirla, l’è stà bon de ribatt: “Eh, no, troppo facile. Io voglio essere controllato.” L’han controlàa. Risultaa: fuori tratta. Gh’han fàa la multa e invece di 5 euro ne ha pagà 70. Ma eren controllor ver? No. Hoo dit che eren lader travestìi! Quand gh’hinn quej ver la gent se comporta come se fodessen lader…la scappa. Per mi hinn lader quej che gh’hann no el bigliett in regola. Sont andà a fa razzia a Milano Food City. Tri euro e des da Vimodron a Rho Fiera, e poeu ’60 euro per entrà on dì, 70 du dì, 100 quatter dì. Mentre fasevi la fila per el bigliètt sentivi che la gent telefonava a destra e a sinistra per entrà gratis. E dagli stand rivaven impiegà, funzionari, dirigent, commess, a portà bigliett su bigliett, cont el permess de visità, senza pagà on centesim, tutta la fera, compres el padiglion de la frutta. Me voltavi indrè a guardà i fruitori de quei bigliett. Gh’aveven no l’apparenza de futuri compratori, anca se i gestor di negozi, i salumè in bianc (quej dei latticini ) hinn riconoscibil per la matita che tegnen tra i orecc. E allora per vess no l’unic pirla ch’el pagava ‘u telefonà al me amis Sergio Poletti, el titolar del Pal Zola e me sont fàa vegnì a toeu. Anca mi sont entrà a fiàa d’oca. E sont andà dirett al so’ stand a saluda’ lu e el so’ gorgonzoeula, bon, ma bon che n’hoo mangià on bordell incurant del me “doc” che me ordina de toccà no i formagg per via del colesterolo alt.

Sarà perché gh’avevi on cal de zuccher, sarà perché davanti a mi gh’era l’immagin del Provasio, la Teresa dei Legnanes, sarà perché el Sergio Zola (mi le ciami iscì) l’è on homm de ona simpatia tutta lombarda, cont ona faccia schietta e familiar, malgrado l’importanza della soa carica, sarà perché hoo mangià inscì de gust sbroffàa de spumant bianc, quand hoo provàa “l’aglicemia”, invece del solit tresent, gh’era cent. On miracol fàa col Gòrgon, l’unic formagg vestì de Zola, come el diseva el compiant Boris Maccaresco cabarettist de la seconda ora. Per mi e per tanti alter l’è antipast, primm, second, terz, verdura e dessert (in cors S. Gottard gh’era l’unica gelateria de Milan che la vendeva gelati al barbera, al frizzantin e al gorgonzoeula). Inscì completti el detto: la bocca l’è mai stracca se la sa no de vacca. E semm rivà  a le dejeuner sur l’erbe. L’avevi organizzà per la festa de la mamma. Mi la mamma ghe l’ho pu ma l’avaria apprezzà de mangià su on praa pan, vin, luganeghin, pasta fregia, patati e pòmm, formagg e caffè col termos. Quanti mamm a fann l’istess. Attenti al praa, però. El dev vess praticabil, nett, lontan dai discaric che la gent “educada” forma sull’erba, lontan dai can che la fan e in poch la netten, lontan dai fumm de scappament, dall’inquinament di orecc provocà dai moto , dai puttann che ne fan on piedaterre. Hoo fàa ‘na proeuva. Per sporcà no la tovaja hoo mis in terra i giornai cont on quaj pes che simulava anca el mangià per fai no volà. E intant che preparavi, l’oeucc l’è ballàa sui titol. “Caccia alle streghe…Esorcist e indemoniàa… Muore sotto i ferri …trucidato dentro la sua gioielleria…Padoan implementa la manovra …Subit m’hinn vegnù in ment i rezip (ricette) che el me amis Alberto Attolini, scrittor umoristic lancià dal liber “Terza Repubblica” l’ha scritt in proposit della implementazion. : “Cetriolo tedesco in culatello nazionale con salsa ai cavolini amari di Bruxelles” roba da dejeuner a Montecituar, e ancamò…Scissione pd: “ribollito alla californiana con primitivo pugliese e parmigiano stantio con pane carasau” e anmò… Assemblea pd: “Zoccolo duro stufato all’olio di balena bianca”. E per finì i piatt personalizzàa e nominatif: Fini: “Pollo alla fiamma di Montecarlo”. Bossi: “Fegato amaro, padano, in salsa verde”. Raggi: “Patata romana bollente con grilli sautè in salsa lombarda”. Me sa che incoeu faròo come al solit on dejeuner in pè sul palchè!

 

è arrivato su WhatsApp

Per ricevere le notizie selezionate dalla redazione in modo semplice e sicuro