Milano, 23 dicembre 2017 - A mi i governant me paren matt. Quand serom in quatter e vun el diseva no a ona proposta el vinceva semper lu e minga perché la minoranza la gh’ha reson, perché se vun el diseva mi ghe sto no e vegni no i alter trii faseven el spettacol de per lor? Podeven no. L’ingagg l’era per quatter e allora nasseven i conflitt. La minoranza quand la voeur no l’è come se poness el veto, e ai alter a hinn fregaa. Quest minga domà in della musica, in di spettacol, ma anca in politica, nell’amministrazion pubblica e nello sport. I privaa invece fan quel che voeuren. I capp deciden e i alter porten a co’. Invece quij sacranon ch’hinn al poter, se metten in testa de fa de la nostra nazion, come l’ha ciamada Dante Alighieri? “Ahi serva Italia di dolore ostello”, ona terra al servizi de tucc men che di cittadin. Hann minga capì che el servilismo i e portarà a vess tratta’ ‘me can. Possibil che la storia, la letteradura, el cinema, gh’àbbien insegnà nient?! Ona spia, on traditor, on doppiogiochista, dopo on po’ de temp el fa’ paura anca a chi l’ha servì e el ris’cia de vess eliminaa malgrado i so’ servigi.

I beneficaa finirann, se i benefizi a hinn minga regolamentaa, per ciappà el soravent e impadroniss de la situazion. Come regolamentàa? Fa’ osservà i noster legg. El me papà me proibiva de montà su on praa ai giardini pubblici perchè el diseva primm che l’era vietaa, second che ciappavi la multa. E mi sui praa ghe voo no anca adess che sont nonno, anzi, gh’el disi anca a i me nevood. Se comincia da lì. Dal pocch. E chi vegn nel paes el dev savè che l’è inscì. Invece numm per andà incontra a tucc femm i pegoroni e tollerem i prepotenz di maleducaa, vuncion, sporcaccion, ribell, fanigotton. Femm de tutt per vess sopraffaa. Adess tacom cont la religion. Ann e ann de tradizion, ann e ann de impostazion, de cultura religiosa e el risultà l’è che devom fà pù i presepi in di piazz, tirà via i crocefiss dai scol e spazi pubblich. Ormai gh’hin tanti religion, tanti atei che, anca se semper in minoranza, deven vinc. E allora Nadal el diventa come el primm dell’ann. Luminari, alber panetton, la scoa porta fortuna, i gioeugh, ma via el presepi. E inscì i professoron, intellettualon, han decis che tutta la tradizion del Nadal l’ha dev vess conformada al mond semper pussè pover de ricordi, de canti popolar.

Poch a poch cantarem canzon stranger che parlen di usi e costumi di Paes che hinn a drè a faa la conquista silenziosa. Fra pocch ghe sarann pu anca i terroristi perché saremm integraa cont lor e ghe sarà pu bisogn de tirà bomb per vendetta o sollevà l’attenzion. La vendetta l’avaran già fada. El sembra on raccont de fantascienza ma se andì a fond a la question ve accorgiarii de andemm incontra all’apatia total, a la remission, a vess servi invece che padron de cà. E allora parlaremm pu de la Nascita e dimenticaremm anca Guido Gozzano che l’ha scritt ona poesia esemplar. E mi proeuvi a voltala in milanes (vedi box, ndr).

Capìi? Voeuren distrugg la letteratura, la poesia, la pittura, l’architettura. Per invidia. Invece de vardà in cà soa volten i problema ciappand denter i noster ingenui governant. El me l’è on discors de bonsens, de rispett per la nostra nazion che se savì no, la se ciama Italia, minga Estera. E per mostrà che mi escludi nissuna usanza ecco ona storia per l’alber de Nadal. L’era on abete che el gh’aveva miss tutta l’estàa per cress. Appena scopazzuu (robusto) ona mattina de December el sent che on quaicoss de guzz el ghe taja i radis. Depeu on omm le carega sul tecc dell’auto e le scarèga in ona cà in doa pader, mader e trii stevenin tacchen ad adornal cont nastri, lus, ball d’argent. pacchettin, e, sota, metten tanti regal. Che soddisfazion, che meraviglia! L’era al cald. Minga nel frecc e pien de nev! Per on po’ de dì el va avanti a vess content, peu ghe ven set. Ma nissun ghe dà de bev. Inscì el comincia a perd i gugg, e i ramm a diventà giald e secch.

La nott de la vigilia l’era moribond. El dì dopo el se sentì contornà da ona furia de allegria, de gioia, de canzon natalizi, e peu… silenzi. Tucc a mangià e lu in fin de vita ch’el piangeva cont i ramm squass a terra. Improvvisament el se sent toccà da ona man de fioeu. L’era quella del Bambin del presepi. «Abete, piscinin me mi, te voeuret tornà nel to’ bosch, cont i to’ fradei ch’hinn ancamò là? Dai che volom insema da la finèstra dervida per cambià l’aria. Adess che l’è passaa el moment di regal, ghe importa pù nient de ti… e…nanca de mi».