Milano, 19 dicembre 2017 - Domeniga 10 Dicember disevi che tucc coreven a cercà regal de Nadal anca se mancaven i danè. Hoo fà on gir per i supermercati de la mia zona, ghe n’è almen quindes e de questi, cinq grand grand, che te se sperdet denter. Tucc pien de gent con i carrej pien de mercanzia. Passen dent la giornada! Guarden, comperen, mangen, fan giugà i fioeu, se dann appontament cont i amis, fan la fila ai cass senza lamentass. El Super l’è no domà on mercàa ma l’è on loeugh de ricreazion, on punto d’incontro per”i consigli degli acquisti”, la speranza de trovà prezzi convenient; di volt gh’è dent anca el Cinema e in di corridor a fan musica e clownerii. Hoo constatà che i danèe gh’hin e la gent i e tira foeura in di grandi occasion e quella del Nadal l’è talment granda che tucc se riversen per i strad, i negozi, i grand magazzin. Che differenza cont el Nadal di noster nonn. On noranz, quatter figh secc e al massimo on liber. E gh’eren canzon straordinari che me recordi anmò. 

Brivio (canta)- “La nott de Nadal/ quand nass el bambin/ la par la battaglia/ de Solferin/… e tutti i donnet/ fan tirlicch e tirlecch/ i san nanca lor/ in doè sbatt i zibrett… E tutti i pastor a sonen la piva/ a hinn nanca bon/ de dagh l’oli d’oliva… Oi leri oi lerin oi lellera/ oilerin oi lerin oi lerà/” “Piva piva/ l’oli d’oliva/ gnacca gnacca/ l’oli ch’el tacca/ hoo mangià trii boeu e ona vacca/ ona sgorba de insalata/ ona sgorba de fasoeu/ Oh che odor/ Oh che odor”. Raimondi: “Minga per faa la pittima ma ti t’el set cossa l’è el Nadal?”. Brivio (el seguta a cantà)- “ Nadal? L’è la festa in general/ a la mattina on busecchin/ cont adrè on biccer de vin/ a mezdì on capponscell/ cont adrè on risottel/ a la sera on panetton/ cont adrè on quaicoss de bon. Raimondi - “E andaremm tucc in lett a tomborlon”. Brivio- “Oh Gesù d’amor acces/ a mangià semm doma in des/ ma a pagà ghe voeur trii mes”. Raimondi - “Che el signor te benedissa col scovin bagnà de pissa”. Assieme - “Oh signor di poarett/ quell di sciori el gh’ha i cornett/ quell di fràa l’è disperaa/ quell di monigh l’èè scappà”. Raimondi - “Oh, me car Gesù Bambin/ femm trovà on quaj bell’omin/ ch’el sia drizz, ch’el sia stort/ basta ch’el sia de ona quaj sort!”. Insema (cont ritmo rock)- “Maria la lavava, Giusepp el stendeva, el bambin el piangeva, pel frecc ch’el gh’aveva ”. Raimondi - “Taci mio figlio, che adesso ti piglio”. Insema - “La nev dai montagn la borlava giù/ Maria cont el vel la quattava Gesù”.

Se voeurom andà a fond s’accorgiom che el Nadal l’è portator de bonumor. Voeurì on esempi? “ Al Primm de Dicember Sant Ansan/ protettor de chi va pian el va lontan . Al Quatter santa Barbara Beata/ la protegg chi l’è ch’el mangia l’insalatta. El Ses San Nicolò, che cont i so’ pomm tucc i mal el manda giò (sta per via) . Oca, castegn e vin/ fa Nataa anca i sciavattin.” “Fa Natal cont i ciapp de l’Animal” Coss l’ha dit sciora? Che sont sporcaccion Per via di ciapp? I ciapp a formen el cosciotto del Pollin, del Pollinon. Gh’è on famos proverbio milanese ch’el dis “ December gran torment/ denanz el te giazza/ de drè el te offend” L’è vera che i proverbi a hinn la saggezza de tutti i temp, ma a hinn principalment la saggezza di noster vecc. Eh! i temp a hinn cambiàa. Adess quand l’è Ross de Sera, se spera pù, i poarett a se disperen. Tanto va la gatta al lardo che… s’el porta via. Chi va al Mulin el se infarina con quella del Mulino Bianco. Dove entra il sole se slavassa tutt. Una mela al giorno la poden magià tucc, do’ te fan vegnì la nausea. Cielo a pecorelle… se la va ben l’arriva ‘na bomba d’acqua che insema a la tromba d’aria fan casin, desquatten i tecc, allaghen i cantinn, fan cascà i alber secch, massen la gent. “In Settember el cald el gh’è pu’ se schiscia l’uga col vin e col cù.” D’inverno anca se a “Dicember ormai l’è Nadal/ a hinn tucc content/ ma el portafoeuil el sta’ mal”. 
“Uei, Gina, cossa t’è preparà per el cenon de Nadal?” “Se dovevi preparat! Cont la pension che gh’emm, l’unica roba l’è on oeuv in ciappa.” “Sperem ch’el faga minga mal!” “T’è faa la battuda. Ridom? Recordess che l’oeuv del dì de Nadaa el fa guarì el venter de chi ghe l’ha malàa” <EN>

Cont i proverbi l’è mai finida e a fallissen mai perché gh’hann mis pussè de cent ann a faj. Per esempi: “ A Nadal, el dì el se slonga on pass de gall!” e per el pranzo o la cena “Nadal senza la luna , chi el gh’a do vacch ne mangia voeuna”. “Uei sciura Gina, hann dit che a Nadal in Gesa fann fina trii Mess (per mi l’è Pasqua n.d.r.)… e allora la capirà perché gh’è l’obbligo de mangià per trii. Cosa la prepara incoeu?” “Per la pitocaja (l’antipasto) luganeghitt, cassoeula e gran vinaia, on bell risott giald per primm, oss bus cont la polenta per second e panatton per el desert, insema a torron, rosolìi e… mostardon”. Raimondi - “Vostra Santità… papa Giulio… san Giulio Papa, el mond el celebra la Nascita del Redentor in divers dì. Me sembra che ghe ne sia tròpp. Gesù Bambin nassù per tanti occasion”. Brivio - (cont cadenza papalina) “In che ann semm?” Raimondi - “Nel tresentrentases (336), D.C. Dopo Cristo”. Brivio - “Mi, Papa Giulio, decreti che de chi in avanti Gesù el nass el 25 December” Coro - “Canta, canta rosa e fior/ l’è nassù noster Signor/ l’è nassù in Betelemm/ senza fassa né patel, senza fassa né lenzoeu/ per fassà sto pover fioeu/ senza fassa né cussin/ per fassà sto pover bambin”. 

E per chi le savess no, el culto del Presepi l’è comincià in del 1223 in ona grotta a Greccio per opera de San Francesc. E siccome el gh’era no el Metano, el riscaldament l’era a fiàa, minga d’oca (per dì che l’era gratis), ghe pensaven el Boeu e l’Asnin. E i ravioeu l’è mej andà a mangiaj a Cernusc sul Navili. Lì gh’è la contadina che i a inventaa. Raimondi - “M’era vanzada ona sfoeuja de pasta. Hoo comincià a tajalla cont ona rondela che gh’avevi in del cassett. M’è vegnù in ment che gh’era nella madia on pignattin con denter la carna vanzada del dì prima. L’hoo missa sora i listell de pasta con l’ntenzion de daghela al gatt, al can…ma dai listell colava el condiment. Allora hoo quattà su tuscoss cont alter listei, e se sa, la pasta la se tacca… hoo dit “Va’ fioeu!” han capì “Ravioeu” ed ecco che hinn nassù i Ravioeu de Nadaa. (da la “Memoria di anzian” de Brivio/Marelli. On spettacol scritt per la manifestazion Buon Natale Terza Età, rappresentada al Teater Liric, quand l’era minga confezionà come on pacch, o gh’eren minga i discussion tipo “le ciappi mi, no mi”. El teater el funzionava e i Anzian le impieniven per vedè el Spettacol sia al 25 che al 26 December, cont per premi on panatton a cranio). 

brivio.roberto@yahoo.it