Milano, 21 novembre 2017 - La mia memoria l’è corta e magari hoo giamò toccà l’argoment in quaj articol passaa ma ona lettera mandada a Luca Goldoni – de lu sont ammirador fin de quand leggevi i so’ liber consigliaa da Carlo Cattaneo, attor, socio ne la Bricat (Brivio/Cattaneo) nassuda per fa’ disk de prosa depeu i me esperimentazion con la Ricordi. El me diseva, prima ancamò de diventà el marì de Lina Volonghi, moster sacro del teater italian, “varda che el Goldoni el tratta argoment che poden diventà testi de cabaret”, e minga doma lu. Le diseva anca Velia Mantegazza, quand ai primm temp dell’Intra’s Derby Club, la rappresentava un mond de fantasia cont i magattèll, gioppii, giioppin a grandezza d’omm – da on so’ lettor, certo Piero Mei. El contenuto de la lettera el parlava de la Goliardia “qualcuno la rimpiangeva e qualcuno no: dica la sua”. La stessa sensazion che l’ha provaa Luca Goldoni l’ho provada mi. On salt nel passaa. La paura a la Cattolica de vess matricola. De vess vessaa. De dovè pagà lo scotto senza avegh el becch d’on ghell. E intant vess attiràa dal sistema che vecc laureaa me cuntaven, compres el desideri de mett la Feluca. Sont andà fuori corso senza provà questa emozion. La Goliardia la stava per fini? Mi s’eri all’Uni nel 58/59/60, el 68 cont el scioglimento di ordin universitari l’era ancamo’ de vegni, e dato che l’è nassù in Cattolica, se sentiva no el prurito de la prenatalità. E anca quand sont entraa in Bocconi nel ‘64/65 hoo mai avu la soddisfazion de viv ‘sta Goliardia.

Dumà a Torin, a Padova, a Lucca, a Livorno, a Genova, ona vintena de student vegniven a fa’ casin (teater esaurii), bloccaven i port, faseven andà foeura el pubblic e requisiven tucc e quatter numm Gufi per andà insema all’osteria a bev e cantà i canzon goliardich. «Bimbe belle facciamo all’amore/ ch’è la cosa più bella del mondo/ chi non… ama nel tempo giocondo/ quando è vecchio lo…non lo farà più/» E peu «Gaudeamus igitur/juvenes dum sumus/ quand jucundamm juventutem/ quand profundam senectutem/ nos habebit humus/». Sto inno cantà in tutt el mond in latin el riess a damm moment de commozion. Ebbene scior Pietro Mei, la soa lettera la m’ha portà nell’ann 2006, quand hoo miss in scena “I canti Goliardici” cont i paroll integrall. 21 artist sul palchscenic, vestii, travestii, regolarment i omen de donna, cont ona regia (de Brivio) improntada a la rivista, a la manera di Legnanes, de la Baistrocchi de Genoa, di Operett goliardich de Siena. Scene di Michele Chiapperino, on geni. L’aveva inventà on cartonàa, pitturàa cont lo stile Dada, e on scalon largh vott meter cont i basell davanti e de drè. Debutto al Mazda Palace (ex Palatrussardi). Me spettavi circa 4000 student. Hinn vegnù in 1200. Tucc de la mia età, de la mia generazion. Avevi programmà de fall in 47 città universitarie. Hoo cominciaa cont Torino (Teatro Nuovo), Bologna (teatro delle Celebrazioni). Me sont fermà prima de andà a Genoa, Pavia, Parma, Piacenza, Padova, Trieste, Verona… i giovin vegniven no. Hoo pagà ona ditta de ricerche de mercaa per savè el perché.

Saveven no se eren I Canti Goliardici, el Papiro, la Feluca, la Lustrazio, el gioegh de la matricola! Conosseven nanca i color de le facoltà. Hoo dovù desmett. Gh’eren tropp danè de impegnà per pubblicizzà l’avveniment. Combattevi on altra volta contra i Molin a vent, come el Don Chisciotte. Avevi stampà anca 1.000 t shirts cont el titol e la scritta “Pene al pene” per faa capì che i testi eren integral. Gh’hoo ancamò el naster registrà dal coro. On dì faroo i CD e cont el material fotografic anca on DVD. «fate largo che passano i giovani/ i seguaci di Bacco e di Venere/ coi cappelli color d’ogni genere/ e la fava rivolta all’insù…!» Gh’è on amis expert de goliardia che l’ha scritt on liber, come mi del rest, cont la storia e i tradizion, on dì l’intervisti, se ciama Franco Ressa. E intant me sont mangià squass tutt el spazi per l’articol. Vorevi parlà del grand success che gh’èmm avù mi, la Grazia Maria Raimondi e el Sergio Fisa alias Ferrari, a la trattoria Arlati, in del sotterrani adibì a Cabaret cont tant de pedana. La gent che la vosava bis, i man che cercaven de toccà i me, come se fa cont i reliqui. Tutt in milanes. Capiven tucc. Cantaven cont numm i me canzon che hoo scritt per I Gufi e quej del D’Anzi. L’era de beneficenza, compres part de la zena. Me senti minga on profittador per avè fa’ pubblicitàa. Sperem de avegh l’istess success giovedì 23 Novembre a Villa Scheibler, Quarto Oggiaro. L’ultima volta che gh’hoo dà on spettacol l’è stada quand el gh’era come assessor a alla cultura Philippe Daverio. Mi e la Raimondi fasevom Meneghin e Cecca. Daverio quand hoo dit che me saria piasù l’ann depeu avegh al fianch i alter Meneghin e Cecca ancamò viv (Mazzarella, Magni, Rossi, De Angelis) l’ha ribadii che ne voreva cent de coppie per dimostrà l’universalità de la città e di so’ personagg. 

Ingresso libero. Anca chi beneficenza. Organizza la Noesis. Associazione cont on motto “ I dialetti hanno un’anima comune”. Chi a Milan gh’è l’anima meneghina. E numm parlaremm e cantaremm in meneghinn. Come l’altra sera al Museo del Cinema in ona manifestazion organizzada dalla giornalista Paola Ciccioli in onor al D’Anzi e a Liliana Feldmann cont la proiezion de ona intervista che la concludeva cont la canzon “La Gagarella del Biffi Scala” e el film “Voglio Vivere così” con Ferruccio Tagliavini. Uei, sembraran cronich de nient perché tocchen no assassini, guerre, sparatori, scoppi de bomb. A proposit han scritt su Internet che el staff del Talent Show con la Maria de Filippi, la giuria, i maestranz, han pientà tutt in del temp de ona proeuva, per on allarme bomba. Fals, ma i precauzion hinn mai assee. E allora cont el me spirit macabro hoo pensaa a on ver scoppi ch’el distruggeva i scen. La polizia la ciappa el bombaroeu. All’interrogatori el se discolpa sostegnend che l’era on concorrent e che la soa prova l’era quella de fa brillà ona bomba. La giuria, ciamada al commissariato, la podeva domà dì «Tu si que vales».

brivio.roberto@yahoo.it