Perdes in una rutunda per el piasè de parlà in una cunferenza stampa

Milano, 19 settembre 2017 - Incoue gh'hann ancamò significaa i conferenz stampa? Mah! Gh’hoo i me dubbi. Prima de tutt l’orari. Se te fet la conferenza ai des l’è trop prest, se te la fet ai vundes te spacchet la mattinada, se te la fet ai dodes “femm in pressa perché gh’è de andà a mangià”, se te la fet alla voeuna te devet offrì on rinfresco rinforzato, cont el ris’c che, dopo, cont la paciada de antipastitt sfizios accompagnà cont el bianc fresc o spumant giazzàa o vin ross temperatura ambiente, che la conclud cont el risottin giald, o i penn a l’arrabiada, invidàa e giornalist faghen la fuga per “impegn pomeridian” e a la conferenza resten ona dounzena de personne ch’hinn i to’ parent, i amis fraterni, i collaborator che hann impientà cont ti la conferenza. E i giornai? “Hinn minga vegnù, ma hann ricevù tucc la cartelletta stampa cont i notizi, i fotografii, el dèpliant che per fall t’è vendù la camisa. Fa’ la conferenza ai desdott? Dipende dal luogo. Eh sì, perché se te la fet in on sit religios te conveign scriv “segue messa” e chissà perché tanti se denoncen atei, se te la fet in d’on restaurant l’è mej che te scrivet ore 18.30, segue cena. Se te la fet in d’ona libreria ai sett e quindes (19.15) te devet mucalla perché el librè el serra su dato che i dipendent van a cà. Se te la fet alle 21 te devet falla seguì dallo spettacolo.

Per mi l'è mej mandà i comunicàa ai giornai e telefonà per ricordà che te gradisset la pubblicazion. E anca quella la dev avè i so’ temp. Ona settimana prima, el comunicàa finì in d’ona pila che tucc i dì la impila alter comunicàa, a l’è trop prest; tri dì prima dell’avveniment la sarìa ona roba giusta ma a detta dei preparator de la pagina, in doa la dovaress vess pubblicada, l’è trop tardi. L’unica l’è quella de ingaggià on offizi stampa ch’el gh’abbia i entradur, ma anca lì gh’è de fàa on distinguo. Gh’e’ ona canzon cantada da I Gufi e scritta da Svampa che la dis “Che bello quando le barche si chiamavano Rosina e Anna / ed io andavo sul lago/ tre mesi da mia nonna…..Che bello quando giravo/ per i prati in bicicletta/un cartoncino tra i raggi/ pareva una motoretta/…. Che bello sarebbe fare/ l’artista in una mansarda/… Adess per parodialla mi cantaria “Che bello quando portavi/ il comunicato in redazione/ trovavi chi ti accoglieva/ e ti faceva un’articolone” “Che bello quando aspettavi/ fremente dopo la prima/ l’uscita del giornale/ con la critica e un titolo in rima”. Eh sì. Te finivet a teater e te andavet al ristorant dopo spettacol.

A gh’era el Dollaro, el Santa Lucia, el Quadrante, Michele e Marisa, el Pam Pam, el Rosengarten e alter quatter o cinq. I Attor eren tucc lì, cont l’amministrador de la compagnia che l’andava a fa’ i gir in di giornal e el portava fresc de stampa quell cont la critica del spettacol. Pareva de vess nel pien de on de quei film musicàl american del dopo guerra, quei col Fred de Stir e Ginger Roggia, col Gin Chelli e la Ave Giardin (Ava Garden), coi strillon di giornal, i roeud di locomotiv che giraven sui nomm di città che faseven part de la torunèe. Ma per tornà all’argoment, sabet a Bollà (Bollate), ai ses or (diciotto) hoo partecipà a ona conferenza-intervista in piazza. Gh’eren i bancarell con dent tutta mercanzia per la manifestazion ciamada Onda D’arte, gh’era on palch scènic, on impiant de microfoni, la Radio Città di Bollate che la trasmetteva in diretta (el nomm del programma l’era in stranger “Step by step 3.0” ), Andrea Magro, organizzator de la part artistica, on para de dirigent de l’Accademia Nel centro della Musica de Cusan Milanin: Paolo Pellegatti, direttor artistic (intervistàa) e Beppe Iapirino, amministrador; Roberto De Marchi cabarettista de la seconda ora, trent’ann de carriera, comic ver (l’è quell ch’el fa ridd cont nient), amis, passant, interessàa.

La curiositàa l’era che sont stà intervistàa sul palch scenic domà per la radio ma cont i microfoni avert su la piazza. Sarà per la vos, sarà per l’impiant, la gent la se fermava a scoltà i bambanad che disevi. Rispondevi ai domand del conduttor Fabio Bartola e de Maria Gloria Manzoli Alla Consolle, che la speakerava ona volta a Radio Meneghina, giust quand mi e la Raimondi serom Meneghin e Cecca. La prima domanda l’è stada “Leggiamo Il Giorno, ma dobbiamo farcelo portare da Milano perché l’edizione che vendono a Bollate non pubblica i tuoi articoli. Come trovi tutti quegli argomenti? Da Febbraio a oggi, li ho contati, sono quasi ottanta” “ L’hoo spiegà in on “L’angolo di Milano”. L’è ona question de Incipit. Tiri a man el prim che me capita in ment e voo avanti. Gh’hoo tanto de di.” “ Fa’ on esempi…” “Damm on argoment …fa finta de vess l’Incipit. Te me facilet l’invenzion del seguit”.

Domanda: So’ che te gh’heet telefonà al Magro perché te seret in ritard.” Risposta: mi dormi mai de dì, pocch anca de nott, ma de dì me sembra de perd temp. Incoe gh’avevi ona mezzora de respir e me sont addormentàa sul computer. Hoo telefonà all’Andrea per famm indicà la strada pussè svelta. Me l’ha indicata e mezz’ora dopo s’eri in Bollà. Me foo la domanda: “trovato facile la strada?” E rispondi: “No, perché sti sacranon prepost a la manutenzion di strad, a la rotonda de la prima sortida dalla superstrada, gh’han minga mis el cartel cont scritt Bollate. Ma porco can, te metten Rho, te metten on alter nomm che recordi pu, perché no Bollate. Ma sti canaja creden che tutti sien in grado de rivà a Bolàa? E quand te set denter te vedet i cartej con scritt “cimiteri”, “hospedal” ma no quej cont scritt “Centro” o “Municipi”. E l’è minga domà a Bollà, anca in alter città. E poeu perché scriven Monza strada 45/7 (numer inventà perchè recordi no quell che l’è scritt suj cartell) e non Tangenziale Nord ingresso per Monza?! Han fàa i rotond e se gh’et no el smartfone ma on semplice tom tom, te riesset minga a definì i rotond! Numm automobilisti che femm questa strada on para de volt all’ann e minga tucc i dì, voeurom legg i cartell. Anca tri o quatter in fila, anca de fàa el gir de la rotonda on para de volta per leggii, ma cont i indicazion giust. T’hee vist el to’ Incipit cossa l’ha scatenà? I cartei ghi aveva anca Dante nel so’ percors per l’Inferno e Purgatori, semper accompagnàa dal navigator Virgilio. E mi che sont studios ho capii el vers “per me si va nella città dolente…” Dolente perché hann minga mis i cartej! O no?!

brivio.robertoyahoo.com