Parlà de Nanni Svampa, quand la Bocconi se ricorda di so fioeu

Milano, 17 settembre 2017 - El me telefona Enrico Intra. Da squasi on ann e forsi anca pussè, sem diventà amis, come se dis, cu e camisa. De peu ch’emm passà squasi ona vita a vedess no, dopo l’Intra derby Club, Castiglioncello e l’Intra’s al Corso, gh’emm pù trovà moeud de retrovass. Lu per la soa strada e mi per la mia. Si, ona quai volta se semm vist sul palch scènic ma on ciao, on embracement, per dill a la parigina, e peu via, mi per el cabaret, l’operetta, la gestion di teater, i liber de scriv, i disk de fa pubblicà, corr adree a la stampa, a l’immagin, fa i proeuv di noeuv spettacol, cercà de vendej (chi dis che la vita dell’artista ch’el se autogenera l’è facil el po’ andàa scoà el mar), cercà i contatt giust cont la radio, la television, el cinema; lu per mandà avanti el so’Jazz, la scola de Jazz diventada in pocch ann Università del Jazz, i concert, e tegnì el tutt al de sora del livell di scole, appassionà i student de musica, insegnagh lor a leggela, a sonala, a intepretala, a fann diventà per ognidun on fatto unich.

«Senti maestro». « No, verament el Maestro te set ti». «Ma tu lo sei per acquisizione. Dopo una certa età, con un’ esperienza come la tua alle spalle, il termine Maestro è un diritto». «Meglio della laurea honoris causa?». «Meglio. Maestro per anzianità di servizio, per quello che hai dato, che continui a dare, per la cultura, e anche per la ridivulgazione, la comunicazione» «Va bene. Non mi aspettavo una dotta dissertazione sul termine. In cosa esserci utile?». «Come esserci? Se mai esserti». «Sent Enrico Intra, cossa podi fa per ti?». «Venire a colazione domani con me e Maurizio Franco alla Bocconi. Vorrebbero commemorare degnamente Nanni Svampa, ex Bocconiano, laurea in Economia e Commercio». «Mi, Economia e Commercio, l’ho fada a la Cattolica». «Invece lo Svampa era ateo e l’ha fada alla Bocconi». «E va ben, ch’el vaga per el pranzo». Uei, saletta privada al ristorante di lusso nel sotterraneo, mi Intra, Franco e Salvatore Grillo. On professor che ormai el po’ considerass el sostegn de l’Università pussè rinomada d’Italia, che la gh’ha alliev che vegnen a studià da tutti i part del Stival e d’Europa e del Mond. Vess bocconiano l’è savè che cont quella laurea te troeuvet de laorà sicurament. Vess stà bocconiano l’è on pregio.

E Svampa l’è stà bocconiano anca se el diseva che l’aveva studià de dottor in Economia e Commercio per contentà so pader, e che a lu de quella laurea ghe ne fregava pocch. Che bell tornà indrè ai temp universitari. All’entrada on pianofort a mezza coa. «Era quello che abbiamo usato ai primi tempi della nostra scuola musicale», el dis Enrico Intra con el sorris che esprimm la simpatia de semper. El se mett a la tastera e el comincia a sonà la canzon che semm a drè a scriv. Domà on accenn per discut sulla strofa oregiabill che second lu la gh’ha ona somiglianza cont on altra canzon scritta da lu. zMi plagio, capisci?» Fo nanca in temp a discut che arriva Salvatore Grillo per menann a mangià. Sont restà impressionà nel vedè che pussè de cent student in moviment se fermaven no per savè chi l’era quell matt che el s’era miss a sonà. Avarissen perdù del temp! Sigura. Salvatore Grillo impenetrabil ma simpatich squas come l’Intra, senza tanti preambol el sbotta: «Mi ve do’ l’Aula Magna, el palch scènic, l’impianto audio, la lus, la possibilità da fa vegnì 400 personne e per el rest rangivess». Danè? Ona sverza. L’è ona vostra manifestazion. Voeuri savè nient. Mi l’Enrico e Franco se semm dà on’ogiada a indicà che l’era la solita storia. Tucc inscì. Spettacol gratis. Ma gratis anca l’entrada del pubblic, allora. Salvatore Grillo che l’aveva capì l’intesa rampognada, tra ona forchettada de risott giald e on tocchelin de cottoletta, semper a la milanesa e cont l’oss, el fissa la data prima che ghe fuss on ripensament.

Fine ottobre per dà temp al Comun de organizzass e fa’ ona commemorazione al Consili. Per el spettacol se vedarà chi ciamà e chi inserì. Gh’è giamò ona trentina de richièste. Tutt quest oggetto de on articol? Beh, el gioeugh el var la candila. L’è minga considerà, parli semper de Nanni Svampa, insema al Mazzarella, al Valdi, al Jannacci, el portator de la milanesità? E allora fasemighi festa. Commemoral la sarà la festa di milanes e soratutt del milanes, lenguagg, dialett, lengua da Accademia de la Crusca. Me sembra giust che el Comun, la Bocconi, e magari qualche altra Istituzion, prima che la bagarre dei tributi fada da artist, che magari l’aveven nanca conossu, la se approfitta per fa spettacol coi so’ canzon e cont quei scritt per I Gufi. E chi, ghe sarìa, de dì quell che on doman el farà part de la soa anedottica. Quand semm partii, nel visin 1964, giamò cont el nomm de I Gufi, mi incidevi per la Voce del Padrone cont el nomm de Roberto BI e lu per la Durium. El primm disk l’è stà fàa per la Combo cont i arrangiament del M° Trama. El me contratt l’era ancamò de rinnova’ ma el so’ l’era in pien avanzament, tant ch’el doveva incid tutta la storia de la canzon popolar. E alora per minga creà incident mi cantavi i so’ canson e lu el faseva per el coro, salvo casi particolari. Quand poeu gh’emm fa i dischi per la Voce del Padrone (Emi) cont i arrangiament de Giorgio Galsini, nasuu in sala d’incision all’impronta ma cont el so’ talento pianistico, la storia l’era men grave e allora lu come Gufo el incideva apertament e come Svampa el continuava cont la Durium. La vita artistica de numm quatter (Brivio, Magni, Patruno, Svampa) che semm stà al 25% fondator de I Gufi, l’hoo vissuda in diretta. E quand ne parli, vist che ne parli mi, sont semper in prima persòna. Me dispias per quei che disen che approfitti dell’occasion per mettem in mostra. Se voeuren me pronunci pu. Ma chi el po’ savè ‘ste memorie? Patruno? Sì, ma l’è l’istess. Per i maligni e i cattiv el se mett in mostra lu, nel cas.

brivio.roberto@yahoo.it