El sett la Prima de la Scala el vott ona serada. Teater, musica e ricordi

Milano, 7 dicembre 2017 - Ambroeus, La Scala, I Scusarit e Intra. Par el titol de on film di ann '70: Pupe, pugni e pepite cont la gionta de Intra che el gh'è semper denter. Ciola, hoo tirà a man on film de nient! La regia l'è de Henry Hathaway, cont Capucine, Stewart Granger, John Wayne, Francoise Fabian. Ghe n'è di alter cont el titol simil. Pugni Pupe e Pallottole con Eddie Constantine, Pugni Pupe e Marinai de Daniele D'Anza cont Murizio Arena, Alberto Bonucci, Paolo Ferrari, Gloria Paul, Ugo Tognazzi. Pugni Pupe e Karatè di Aristide Massacesi, Pugni Pupe e Dinamite di Pierre Grimblat con Eddie Constantine. Domà che nel titol d'incoeu gh'hinn minga i bott de la madontena che se dann per le Pupe ed el rest. L'è Giovedì' 7 Dicember e l'è Sant'Ambroeus el patrono de Milan. I Giargianes le ciamen SantAmbròs. Per i milanes oltre che vess 'na figura leggendaria l'è on sant che el dà l'inviada a do' manifestazion important: la consegna di Ambrogitt d'or e di Benemerenz e la Prima de la Scala. Fa' nient se la stagion scaligera l'è giamò cominciada o appèna finida. El sett l'è la inaugurazion offizial. La giornata di oeuv marsc tirà dal Capanna tanti ann fa. Adess, salvo ona quaj manifestazion estemporanea, i facinoros tiren no i benis de gess, nè vegnen cont i squittaroeu, roba de Carnevaa. Adess, magari, comperen el bigliett per fa Buuu a la missa in scena. Ma dovaria no vessigh problema per l'Andrea Chénier de Giordano.

Intant mi pensi  al vott, dì de l'Immacolada Concezion. Gh'hoo ona serada da fa per l'associazion I Scusaritt che la se troeuva a Binago in provincia da Comm. A hinn comasch ma voeuren 'na roba milanesa. Me giamò capitàa, ma l'era in Sicilia, a Catania. On teater el me scrittura e come clausola el mett che dovevi cantà canzon milanes e minga perché gh'era pubblic de pendolar ch'el vegniva de Milan, ma perché a eren curios de savè se capiven on quajcoss. La gent l'è meravigliosa. A hinn domà dirigent de la Rai, de Mediaset e de la Sett che fan story per el dialett, salvo che el sia minga romanesch, napoletan o sicilian. La Sicilia peu la se stima col linguagg usà da tucc i Montalbano. Ogni tant se capiss nagota, ma capì no l'è de moda! Camilleri el gh'ha semper avù reson. Mi l'ho conossù a Roma quand numm Gufi gh'emm debuttaa al Teater Fiammetta in doa aveven fàa Tevere Blu, cast formà dai rappresentant de la nobiltà romana. Tonino Nediani on commediografo rappresentaa al Teater del Corso de Milan (quell sotta al Bar de I Trii Gazzell) da duu attor che hinn ancamò su la breccia: Miriam Crotti e Roberto Brivio, el m'ha portà a mangià in d'on ristorant cines insema al Camilleri. “Quest” el me fa Nediani “ a l'è on scrittor che el se farà strada”. Profezia avverada. La gh'avù ona grand idea, scriv i liber in Sicilian e tegnì duro contra i critich, i malalengua, i trinciagiudizi, insomma quej che adess hinn ciamaa “opinionisti o critich”. E allora, el vott Dicember, dì de la Madonna, saroo al Teater de Binago per fàa ona milanesada cont Grazia Maria Raimondi, partner fissa che la borbotta quand le dev recità Gregori e la Francesca, e Sergio Ferrari all'Accordéon che l'è ona fisa italiana de Stradellà (hoo usaa l'accento frances come Castà, come Carlà). Uei gh'è anca on coro ch'el voeur cantà cont mi i canzon del D'Anzi. Gh'hoo preparà cinq ritornell: Nostalgia de Milan, I Tosan de Milan, El Biscela, Lassa pur ch'el mond el disa, Madonnina cont la storia del Giovanin al Pavillon Dorè e al Triannon.

Cossa gh'entra  Enrico Intra El gh'entra perché l'hoo interpellàa per vegnì a sonà on poo de Jazz ma el po' no perché el va a sonà a Cagliari. El m'ha dit che da quand l'ha superà i ottanta le ciamen per tutta Italia e anca all'ester e cont la scusa de dagh on premi a la carriera ghe fann fa' el concert. E lu, el sona, el cunta su de la soa vita, semper legrios. Gh'emm discuss l'alter dì a causa de Louis Armstrong. Lu el sostegniva che l'era el pussè grand de tutti i temp. Mi disevi che quej jazzista de nomm vegnù depeu de l'homm tromba eren grand istess. Se semm lassà cont l'amar in bocca. Tant che el m'ha scritt ona lettera che ve reporti (a lato) pari pari. E CONCLUDI cont on poo de pepite (pepite, quej de la corsa all'or… del Tisin). “La canzon erotica, come sann tutti, l'è fada cont on ritornell e una o pìù scrofe” “Osteria de Firenze, secol XV. Ueilla se bev, se bev. L'è rivaa el botticelli” “Polifemo el viveva in on paes in doa la roba la costava un occhio de la testa” “Trapiant de organi: da ona gesa a l'altra” Definizion final… “Stempiaa l'è vun che l'è restà senza gesa”. brivio.roberto@yahoo.it